Абхъазым и президент Хаджимбэ
Рауль и къулыкъум текIащ
Апхуэдэ унафэ абы къищтащ и Хэкум зэпIэзэрытыныгъэр щытепщэ хъужын папщIэ.
Дызэрыщыгъуазэщи, махуэ зыбжанэ ипэкIэ Абхъазым щытыкIэр щызэIыхьауэ цIыхухэр щызэрызохьэ. Республикэм и Iэтащхьэм и унафэ щIыкIэр зигу темыхуэхэр уэрамым къыдыхьащ, я мыарэзыныгъэр къагъэлъагъуэу икIи президентыр текIыну къагъэуву. Езыхэм зэрыжаIэмкIэ, абыхэм яхуэхьыжыркъым махуэ къэс зыIууэ гугъуехьхэр, я псэукIэр хэпщIыкIыу зэремыфIакIуэр, республикэм зэрызимыужьыр.
Оппозицэмрэ абыхэм я телъхьэхэмрэ щIышылэм и 9-м республикэм и президентым и администрацэм и унэм ебгъэрыкIуащ, щхьэгъубжэхэр хакъутыкIри, унэм щIыхьащ, ауэ цIыху губжьахэр республикэм и президентыр щылажьэ пэшым нагъэсакъым хъумакIуэхэм. Уеблэмэ абыхэм Iэщи зыIэрагъэхьауэщ къызэратар хъыбарегъащIэ IуэхущIапIэхэм.
Фигу къэдгъэкIыжынщи, Хаджимбэ Рауль Абхъазым и президентщ 2014 гъэм къыщыщIэдзауэ. 2019 гъэм и фокIадэм ар етIуанэ пIалъэу а къулыкъум хахыжауэ щытащ. Апхуэдэу щытми, оппозицэм зэрыжиIэмкIэ, хэхыныгъэхэр щекIуэкIым, IэIэтым кърикIуахэр щызэхалъхьэжым хабзэр къызэпаудащ. Хаджимбэ Раулрэ абы и ныкъуэкъуэгъуу щыта Квициние Алъхъэсрэ зэрызэщхьэщыкIар зы процентым тIэкIу щIигъукIэщ - тIуми хэхакIуэхэм я процент 50-р я телъхьэ мыхъуауэ.
«Апхуэдэу щытми, къэралым и президенту Хаджибмэщ къалъытар, - жеIэ «Абхъаз зэкъуэт» оппозицэ партым и унафэщI Шамбэ Сергей. - Иджыпсту ди деж щекIуэкIыр зыхузэфIэкIхэм къулыкъур е мылъкур яхуэмыгуэшу зэныкъуэкъуу аракъым - цIыху псоми я мыарэзыныгъэр зэуэ къракIутауэ аращ».
Къэралым зэхъуэкIыныгъэхэр щрагъэкIуэкIын папщIэ кърахьэжьа къаугъэм и зэран цIыхухэм емыкIын, Абхъазым лъы щамыгъэжэн, щIыналъэр мамыру щытын папщIэ ича лъэбакъуэу жиIащ Хаджимбэ и къулыкъум зэрытекIыр.
Абхъазым и суд нэхъыщхьэм щIышылэм и 10-м унафэ къищтащ илъэс кIуам и президент хэхыныгъэхэм кърикIуахэм арэзы темыхъуэным теухуауэ икIи зи чэзу хэхыныгъэхэр къэралым гъатхэпэм и 22-м щыIэну игъэуващ.
Абхъазым и Парламентым - ЦIыхубэ Зэхуэсым - щIышылэм и 13-м иригъэкIуэкIа зи мычэзу зэIущIэм республикэм и президентым и къалэнхэр пIалъэкIэ игъэзэщIэну и пщэ ирилъхьащ премьер-министр Бганбэ Валерий.
Мелардырыбжэхэм къахохъуэ!
ИлъэсыщIэ гуфIэгъуэ дауэдапщэхэр къэралым щызэфIэкIащ. ЦIыхухэм я нэгу зэрызрагъэужьын, я гукъыдэжыр къызэраIэтын Iуэхугъуэ куэдкIэ гъэнщIауэ щытащ 2020 гъэм и япэ махуэхэр.
Гъэ дызыхыхьам и пэщIэдзэм гуфIэгъуэшхуэ зыхэзыщIахэм ящыщщ лотерейкIэ ахъшэшхуэ къызыхэхъуахэр. «Столото» кампанием цIыху куэд игъэгуфIащ щIышылэм и 1-м - япэрауэ, нэхъапэм ди къэралым зэи къыщымыхъуауэ, ягъэджэгуащ зэуэ сом мелард къызэрыпхьэху хъуну билет. Апхуэдэуи, мелуан зырыз хъу саугъэтуи щэ ягъэджэгуащ, сом мин бжыгъэ къызыпэкIуа адрейхэм нэмыщI.
ЩIышылэм и 1-м екIуэкIа зи чэзу 1316-нэ лотерей гъэджэгугъуэм и саугъэт нэхъыщхьэр къэзыхьар наIуэ къэмыхъуауэ зэбгрыкIыжауэ щытащ «Столото»-р езыгъэкIуэкIахэр. ЦIыху куэд дыдэм яфIэгъэщIэгъуэн хъыбарыр хэIущIыIу щыхъуар щIышылэм и 3-рщ - абы щыгъуэщ сом мелард къызэрихьар Бартош Надеждэ къыщищIар. Ар Москва областым хыхьэ Юдинэ къуажэм щопсэу, лотерей билетыр абы къыхуэзыщэхуар и пхъурщ. Апхуэдиз ахъшэмкIэ ищIэнумкIэ щеупщIым, Надеждэ жиIащ ар зыхэт хьэрычэтыщIэ Iуэхум зегъэужьыным зэрыхилъхьэнур, абы щыщ IыхьэкIи псапэ зэрищIэнур.
Нобэ
♦Урысей Федерацэм СледствиемкIэ и комитетыр къыщызэрагъэпэща махуэщ (2011 гъэм)
♦Википедием - ИнтернеткIэ къагъэсэбэп щIэнгъуазэм - лэжьэн щыщIидза махуэщ (2001 гъэм)
♦Хорватиер къэрал щхьэхуэу къыщалъыта махуэщ (1992 гъэм). Европэ Зэгухьэныгъэм хыхьэ къэралхэм ящыщу 12-м къалъытащ ар щхьэхуиту зэрыщытыр.
♦Мысырым жыг щыхасэ махуэщ
♦1759 гъэм Британие империем и тхыдэ-археологие музейр (Лондон дэтщ) цIыхухэр щIыхьэу зыщаплъыхьыну хуиту къызэIуахащ.
♦1831 гъэм Урысей промышленник цIэрыIуэ Демидов Павел «щIэныгъэ IэнатIэм зегъэужьыным хуэунэтIауэ» саугъэтыр игъэуващ.
♦1897 гъэм Урысейм дыщэ ахъшэ щызекIуэу щIидзащ. Сомыр дуней псом щынэхъ лъэщ дыдэ валютэ хъуат.
♦1943 гъэм Пентагоным - США-м зыхъумэжыныгъэмкIэ и министерствэм - и унэр ухуэн яухащ.
♦1955 гъэм Китайм и Iэтащхьэхэм унафэ къащтащ езыхэм я ядернэ Iэщэ ящIыным теухуауэ. Япэ апхуэдэ бомбэм и лъэщагъыр къэралым 1964 гъэм игъэунэхуауэ щытащ. Илъэсищ дэкIри, водород бомби ящIащ.
♦2006 гъэм Чилим щыяпэу а къэралым и президенту цIыхубз хахауэ щытащ. Ар Бачелет Мишельщ. 2014 гъэм гъатхэпэм и 11-м ар етIуанэу а къулыкъум пэрагъэуващ икIи 2018 гъэм гъатхэпэм и 11 пщIондэ лэжьащ.
♦1622 гъэм къалъхуащ франджы драматург-комедиограф, актёр Мольер (и цIэ дыдэр Жан Батист Поклещ).
♦1795 гъэм къалъхуащ урысей дипломат, драматург, усакIуэ Грибоедов Александр.
♦1850 гъэм къалъхуащ урыс математик, тхакIуэ Ковалевская Софье.
♦1890 гъэм къалъхуащ адыгей усакIуэ, композитор, IуэрыIуатэдж Кубэ Шэбан.
♦1891 гъэм къалъхуащ урыс усакIуэ, тхакIуэ, зэдзэкIакIуэ, критик Мандельштам Осип.
♦1912 гъэм къалъхуащ къэрал, политикэ лэжьакIуэ, КъБАССР-м и Министрхэм я Советым и УнафэщIу 1957 - 1969 гъэхэм щыта Ахъуэхъу Аслъэнбий.
♦1913 гъэм къалъхуащ псыщIагъырыкIуэ кхъухьым и унафэщIу щыта, Совет Союзым и ЛIыхъужь Маринеску Александр.
♦1917 гъэм къалъхуащ актёр, СССР-м и цIыхубэ артист Лебедев Евгений.
♦1918 гъэм къалъхуащ Мысырым и президенту щыта, Совет Союзым и ЛIыхъужь Насер Гамаль Абдель.
♦1923 гъэм къалъхуащ актёр, режиссёр, СССР-м и цIыхубэ артист, Хэку зауэшхуэм хахуэу хэта Весник Евгений.
♦1925 гъэм къалъхуащ совет тхакIуэ, Социалист Лэжьыгъэм и ЛIыхъужь Носов Евгений.
♦1929 гъэм къалъхуащ США-м цIыху зэхэгъэж щащIу мыдэным и бэнакIуэ лъэщу, зи фэр фIыцIэхэм я къыщхьэщыжакIуэу щыта, Нобель и саугъэтым и лауреат Кинг Мартин Лютер.
♦1931 гъэм къалъхуащ Дагъыстэным щыщ композитор, дирижёр, СССР-м и цIыхубэ артист Кажлаев Мурад.
♦1932 гъэм къалъхуащ пшынауэ Iэзэ, Къэбэрдей-Балъкъэрым щIыхь зиIэ и артисткэ Бырмамыт Гуащэкъарэ.
♦1936 гъэм къалъхуащ КъШР-м щэнхабзэмкIэ щIыхь зиIэ и лэжьакIуэ, тхакIуэ, IуэрыIуатэдж, жылагъуэ лэжьакIуэ Шэрджэс Алий.
♦1945 гъэм къалъхуащ композитор, УФ-м и цIыхубэ артист Дунаевский Максим.
♦1956 гъэм къалъхуащ СССР-м спортымкIэ щIыхь зиIэ и мастер, IэжьэкIэ къежэхын лIэужьыгъуэмкIэ олимп чемпионкэ хъуа Зозуля Верэ.
♦1957 гъэм къалъхуащ урысей журналисткэ, теленэтынхэр езыгъэкIуэкI, Урысей телевиденэм и академием хэт, «ТЭФИ» саугъэтыр щэнейрэ зыхуагъэфэща Сорокинэ Светланэ.
♦1966 гъэм къалъхуащ урысей режиссёр, продюсер, сценарийхэр зытх Кончаловский Егор.
Дунейм и щытыкIэнур
«pogoda.yandex.ru» сайтым зэритымкIэ, Налшык уфауэ щыщытынущ. Махуэм хуабэр градуси 2 - 4, жэщым щIыIэр градуси 3 - 2 щыхъунущ.
Лъэпкъ Iущыгъэ:
Дыгъужьым ишхыр и фэкIэ епшыныж.