Дунейм щыхъыбархэр

Урысей Федерацэм и
Правительствэр токI

Къэралым и Правительствэм и УнафэщI Медведев Дмитрий дыгъуасэ хэIущIыIу ищIащ Правительствэр зэрытекIыр.

УФ-м и Президент Путин Владимир щIышылэм и 15-м Федеральнэ Зэхуэсым зыхуигъэзащ, илъэсым къриубыдэу къэралым къыпэщыт, и пщэ дилъхьэж къалэн нэхъыщхьэхэр щыубзыхуауэ. Президентым гулъытэншэу къигъэнакъым зыкъом щIауэ жылагъуэр зытепсэлъыхь Iуэхугъуэри - къэралым и Конституцэм зыхуэфащэ зэхъуэкIыныгъэхэр хэлъхьэным теухуар. Абы и лъэныкъуэкIэ къыхигъэщащ Правительствэр убзыхуным нэхъ хэкъузауэ бгъэдыхьэн зэрыхуейр, а Iуэхум Къэрал Думэри зэрыхэтыпхъэр. Путин Владимир жиIащ, Правительствэм и УнафэщIу щытынум и кандидатурэмкIэ Къэрал Думэм ечэнджэщ къудей мыхъуу, ар гъэувынми хабзэубзыху органым и нэIэ тригъэтыну и пщэ зэрыдэлъхьапхъэр. Апхуэдэ щIыкIэкIэ, къэралым и политикэ системэм зихъуэжыну къудейкъым, атIэ гъэзэщIакIуэ, хабзэубзыху властхэр нэхъ быдэу зэдэлэжьэнымкIи сэбэп зэрыхъунур къыхигъэщащ Путиным. А псори нэхъ зэпэщу къайхъулIэн папщIэ, Правительствэр зэрытекIыр зи чэзууэ къилъытащ Медведевым.
«Дэ, Правительствэм хэтхэм, къэралым и Президентым Iэмал еттын хуейщ абы Федеральнэ Зэхуэсым Зэрызыхуигъазэм къыщигъэува къалэнхэр зэфIэха хъун папщIэ зыхуэфащэ унафэхэр езым къищтэну. Абы ипкъ иткIэ икIи Урысей Федерацэм и Конституцэм и 117-нэ статьям тету къэралым и Правительствэр зэрыщыту и къулыкъум токI», - жиIащ Премьер-министрым.
Путиным Медведевыр зи УнафэщI Правительствэм хэтхэм фIыщIэ яхуищIащ я къару къызэрихькIэ зэрылэжьам папщIэ икIи министрхэм захуигъэзащ, ПравительствэщIэм хагъэхьэнухэр наIуэ къэхъухукIэ, я къалэнхэр пIалъэкIэ ягъэзэщIэну.
«Сэри фIыщIэ фхуэсщIыну сыхуейщ иджыри къэс зэфIэвгъэкIахэм папщIэ, фи лэжьыгъэм кърикIуахэм арэзы сызэрытехъуэри къыхэзгъэщыну сыхуейщ, - жиIащ Президентым. - Псори къывэхъулIауэ сыхужыIэнукъым, ауэ Iуэхуу щыIэр зэфIигъэкIыну зэи зыми къехъулIакъым».
Апхуэдэуи Путиным жиIащ ШынагъуэншагъэмкIэ советым и УнафэщIым и къуэдзэ къулыкъур игъэувыну, ар Медведев Дмитрий хуигъэлъэгъуэну зэримурадыр. ДяпэкIэ Медведевым жэуап ихьынущ къэралым зыхъумэжыныгъэмрэ шынагъуэншагъэмрэ къыщызэгъэпэщыным пыщIа IуэхухэмкIэ. А къулыкъур игъэувын папщIэ законым зэхъуэкIыныгъэхэр хэлъхьэн хуей хъумэ, ахэр депутатхэм къыдаIыгъыну зэрыщыгугъри къыхигъэщащ Президентым.

Зыгъэпсэхугъуэхэм къыздахьа хэщIыныгъэхэр къабжыж

ИлъэсыщIэм и пэщIэдзэм къэралым и цIыхухэм кIыхьу зэрызагъэпсэхуам къэралым и экономикэм хэщIыныгъэу иритар къабжащ. Махуэшхуэхэм къриубыдэу къэралым и IуэхущIапIэхэм я зэхуэдитIыр лэжьакъым, продукцэу къыщIагъэкIми процент 15 - 20-кIэ кIэрыхуащ.

«Илъэс къэс Урысейм и щIымахуэ зыгъэпсэхугъуэ кIыхьхэм я зэранкIэ сом триллион 1,3-рэ фIокIуэд», - жиIащ «БКС Премьер» кампанием и финанс аналитик Дайнекэ Сергей. ХэщIыныгъэхэр нэхъыбэу къэзышар продукцэм елэжь, хъугъуэфIыгъуэ къыщIэхыпIэхэм, промышленность хьэлъэм епха IэнатIэхэр зэрымылажьэрщ. ИлъэсыщIэм и япэ лэжьэгъуэ тхьэмахуэр махуитI фIэкIа зэрымыхъуами сом триллионищ хэщIыныгъэу къихьауэ къалъытэ экспертхэм.
Апхуэдэу къагъэлъэгъуащ зэманыр пщIэншэу зэрагъакIуэр яхуэмыхьыжу лэжьэн щIэзыдзэжахэри куэд дыдэ зэрыхъуар - цIыхухэм я процент 58-м, зыгъэпсэхугъуэр нэхъ кIэщI ящIмэ нэхъ къащтэу, я IэнатIэхэм пэрыувэжащ. Илъэс къэс апхуэдэ хэщIыныгъэхэр къэзыхь махуэшхуэхэм къэралыр хуэмейуэ къалъытэ абы теухуауэ зэупщIахэм я нэхъыбэм. «Ди къэралри абы щыпсэухэри апхуэдизу къулейкъым, сом триллионхэр къимылъытэну, ахэр жьым хаутIыпщхьэну», - жаIэ абыхэм.

Нобэ

Сабийхэм къагупсыса, зэпкъралъхьа Iэмэпсымэхэм я махуэщ
395 гъэм Урым империер тIууэ - КъуэкIыпIэрэ КъухьэпIэу - зэгуэкIащ.
1921 гъэм РСФСР-м и ЦIыхубэ комиссархэм я советым унафэ къищтащ «УэгукIэ гъуэгуанэ зэпычыным теухуауэ». МафIэгухэм, автомобилхэм, нэгъуэщI транспорт лIэужьыгъуэхэми къахэхъуауэ щытащ кхъухьлъатэхэр.
1934 гъэм Свердловскэ, Челябинскэ областхэр къызэрагъэпэщащ.
1945 гъэм 1-нэ Белорусскэ фронтым и дзэхэм Польшэм и 1-нэ армэр я дэIэпыкъуэгъуу Варшавэ къалэр нэмыцэ зэрыпхъуакIуэхэм къыIэщIагъэкIыжащ.
1991 гъэм Перс псыдэжыпIэм щыщIидзащ «Къумым къыщыхъея борэн» зауэм.
1994 гъэм НТВ телекомпанием и нэтынхэр къагъэлъагъуэу щIадзащ.
1995 гъэм Японием и Кобе къалэм щIыр ин дыдэу щыхъеящ. А гузэвэгъуэм хэкIуэдат цIыху 6400-м щIигъу.
1706 гъэм къалъхуащ Америкэм щыщ политик, щIэныгъэлI, тхакIуэ, США-р къэрал щхьэхуиту зэфIэувэным и лъабжьэр зыгъэтIылъахэм хабжэ Франклин Бенджамин.
1847 гъэм къалъхуащ урысей щIэныгъэлI, дунейпсо аэродинамикэ щIэныгъэм и лъабжьэр зыгъэтIылъа Жуковский Николай.
1863 гъэм къалъхуащ актёр, режиссёр, егъэджакIуэ, театр гъуазджэм зэхъуэкIыныгъэшхуэ хэзылъхьа, «СССР-м и цIыхубэ артист» цIэр япэ дыдэу зыфIащауэ щыта Станиславский Константин.
1939 гъэм къалъхуащ техникэ щIэныгъэхэм я доктор, профессор, ЩIДАА-м и академик Щомахуэ Лев.
1933 гъэм къалъхуащ франджы уэрэджыIакIуэ, актрисэ цIэрыIуэу щыта Далида.
1942 гъэм къалъхуащ физико-математикэ щIэныгъэхэм я доктор, КъБКъУ-м и профессор, ЩIДАА-м и академик Темрокъуэ Анатолий.
1942 гъэм къалъхуащ езыр дунейм къыщытехьа США-м и мызакъуэу, дуней псом цIэрыIуэ щыхъуа боксёр, олимп чемпион Мохаммед Али (и цIэ-унэцIэ дыдэр Кассиуc Марселлус Клейщ).
1950 гъэм къалъхуащ уэрэджыIакIуэ цIэрыIуэ, жылагъуэ лэжьакIуэ ПащIэ Еленэ.
1956 гъэм къалъхуащ шэрджэс еджагъэшхуэ, химие щIэныгъэхэм я доктор Темырдащ Зэуал.
1945 гъэм къалъхуащ урысей тхакIуэ, УФ-м гъуазджэхэмкIэ щIыхь зиIэ и лэжьакIуэ Альтов Семён.
1960 гъэм къалъхуащ урысей композитор, уэрэджыIакIуэ цIэрыIуэ, УФ-м гъуазджэхэмкIэ щIыхь зиIэ и лэжьакIуэ Николаев Игорь.
1961 гъэм къалъхуащ совет шахматисткэ цIэрыIуэ, дунейпсо чемпионкэ, СССР-м спортымкIэ щIыхь зиIэ и мастер Чибурданидзе Майе.
1966 гъэм къалъхуащ КъБР-м щэнхабзэмкIэ и министрым и къалэнхэр зыгъэзащIэ, КъБР-м щIыхь зиIэ и артист, Къэбэрдей-Балъкъэрым и Къэрал саугъэтыр зыхуагъэфэща, культурологие щIэныгъэхэм я кандидат Къумахуэ Мухьэдин.
1968 гъэм къалъхуащ урысей спортсменкэ, Олимп джэгухэм атлетикэ псынщIэмкIэ тIэунейрэ я чемпионкэ хъуа Мастерковэ Светланэ.
Дунейм и щытыкIэнур
«pogoda.yandex.ru» сайтым зэритымкIэ, Налшык пшэр техьэ-текIыу щыщытынущ. Махуэм хуабэр градуси 2 - 4, жэщым щIыIэр градуси 5 - 4 щыхъунущ.

Лъэпкъ Iущыгъэ:
Уигъуэмэ гъусэ бгъуэтынщ.

Зыгъэхьэзырар ЖЬЭКIЭМЫХЪУ Маринэщ.
Поделиться:

Читать также:

27.03.2024 - 15:00 НОБЭ
26.03.2024 - 08:01 НОБЭ
25.03.2024 - 12:07 НОБЭ
22.03.2024 - 15:54 Псым и махуэ