Экономикэр электрокъарукIэ тэмэму къызэрегъэпэщ

«Россети Кавказ Ищхъэрэ» зэгухьэныгъэм и къудамэ «Къэббалъкъэнерго» IуэхущIапIэм 2019 гъэм къриубыдэу Къэбэрдей-Балъкъэр Республикэм электрокъарууэ къыхуиутIыпщар абы япэ ита илъэсым елъытауэ киловатт-сыхьэт мелуан 21-кIэ нэхъыбэ мэхъу. Ар нэгъэсауэ яхурикъуащ ди щIыналъэм электрокъарур къыщызыгъэсэбэпхэм.

МЫ ЭНЕРГИЕ лIэужьыгъуэр кIуэтэху нэхъыбэу къыщIагъэсэбэпым и щхьэусыгъуэр социальнэ IуэхущIапIэхэм, псэупIэ хьэблэщIэхэм зэрызаубгъурщ, промышленностым зэрызиужьырщ. «Къэббалъкъэнерго» IуэхущIапIэм и унафэщI Къарэ Муртаз зэрыжиIамкIэ, цIыхухэм я псэукIэр зэрефIакIуэм хуэдэ къабзэу абыхэм къагъэсэбэп электрокъаруми хохъуэ.
Зэблэу къыхэмыкIыу цIыхухэмрэ IуэхущIапIэхэмрэ электрокъарур къаIэрыхьэн папщIэ «Къэббалъкъэнерго» IуэхущIапIэм къигъэсэбэп сетхэр зэпымыууэ зыхуей хуагъазэ. Энергетикхэм апхуэдэ лэжьыгъэу нэгъабэ сом мелуан 202,3-рэ и уасэ зэфIагъэкIащ. Электрокъарур зрикIуэ линэхэм ящыщу километр 410-м нэблагъэ капитальнэу зэрагъэпэщыжащ, кIапсэу километр 388-рэ, пкъоуэ 1650-рэ зэрахъуэкIащ. Жьы хъуа икIи къэбгъэсэбэпыну шынагъуэ зыпылъ Iэмэпсымэхэр зэхъуэкIынымкIэ программэм тету зэфIагъэкIа лэжьыгъэхэр сом мелуан 17 и уасэ мэхъу.
Къэбэрдей-Балъкъэр Республикэм и Правительствэм ирищIылIа зэгурыIуэныгъэр нэгъэсауэ игъэзэщIэн папщIэ «Россети Кавказ Ищхъэрэ» зэгухьэныгъэм щIыналъэм энергиер къэгъэсэбэпыным хуэгъэзауэ къыщыхъу зэхъуэкIыныгъэхэр и зэманым къелъытэ икIи абы ипкъ иткIэ зыхуеину псори елэжь.