Полицейхэм йогуапэ

Кинолог центрым и лэжьакIуэхэм Налшык и школакIуэхэм папщIэ зыплъыхьакIуэ къызэрагъэпэщащ. Абы къыпэджэжу полицейхэм къапэплъэрт усэхэмрэ я IэкIэ ягъэхьэзыра хъуэхъу открыткэхэмрэ Хэкум и хъумакIуэм и махуэм и щIыхькIэ.

ЩIалэгъуалэр Хэкур фIыуэ ялъагъуу гъэсэным теухуауэ ирагъэкIуэкI Iуэхухэм хыхьэу, КъБР-м щыIэ МВД-м и Кинолог IэнатIэм узэщIауэ зыщаплъыхьащ Налшык къалэ дэт лицей №2-м и класс нэхъыщIэхэм щеджэхэм. ШколакIуэхэм Iэмал ягъуэтащ IэщIагъэлI-кинологхэм я лэжьыгъэм зэпкърыхауэ зыщагъэгъуэзэну. НыбжьыщIэхэмрэ абыхэм я егъэджакIуэхэмрэ папщIэ ар къызэригъэпэщащ «Центр детского туризма академия путешествий» IуэхущIапIэм.
Зыплъыхьыныгъэм и пэкIэ кинологхэр яхутепсэлъыхьащ я лэжьыгъэм, хьэ гъэсахэр зэрыхэтым щIэпхъаджагъэхэр къэмыгъэхъуным, ахэр сэтей къэщIыным.
АдэкIэ полицэм и лэжьакIуэхэм ягъэлъэгъуащ хьэ гъэсахэм я жыIэдаIуагъэр, лъэпощхьэпохэр къызэрызэранэкIыр, щIэпхъаджащIэхэр къызэраубыдыр, мэкIэ хьэпшыпхэр къызэрагъуэтыр, абы Iэщэхэри наркотикхэри хыхьэу.
IэщIагъэлI-кинологхэм кърагъэблэгъахэм ирагъэлъэгъуащ хьэ гъэсахэр щаIыгъ вольерхэр, Центрым и пщIантIэм дэт клиникэр. Мыбы ветеринарым хьэхэр щызэпеплъыхь, еIэзэн папщIэ псэущхьэр изоляторым ирагъэтIысхьэри и узыншагъэр зэфIэувэжыху абы щаIыгъ.
КъыкIэлъыкIуэу полицейхэм гуапагъэ къапэплъэрт: щколакIуэхэр абыхэм къахуеджащ усэхэм икIи я зэIущIэм и фэеплъу Хэкум и хъумакIуэм и махуэм теухуа я IэдакъэщIэкI сурэтхэр тыгъэ къыхуащIащ.
НыбжьыщIэхэмрэ абыхэм я егъэджакIуэхэмрэ Кинолог центрым и лэжьакIуэхэм фIыщIэ хуащIащ къыхузэрагъэпэща зыплъыхьыныгъэ гъэщIэгъуэным папщIэ икIи жаIащ мыгувэу аргуэру зэхуэзэну зэрыщыгугъыр.
 Iуэхум и кIэухыу фэеплъ сурэтхэр зэтрагъэхащ.

 

 

 

 

Зыгъэхьэзырар Уэрдокъуэ Женящ.
Поделиться: