Налшык къалэ рэп-фестиваль щрагъажьэ

«Дай Vibe» фIэщыгъэр зиIэ рэп-фестиваль мы махуэхэм щрагъэжьащ КъБКъУ-м. УэрэджыIакIуэ ныбжьыщIэхэм я Iуэхур диIыгъыну къеблэгъат «ВагъуэщIэ» проектым и финал Iыхьэм пхыкIа Атабиевэ Малика.

Iуэхум и къызэгъэпэщакIуэр КъБКъУ-м щеджэ Ервас Астемырщ. Къыхэгъэщыпхъэщ илъэс кIуам Кърымым щекIуэкIа «Таврида Арт» фестивалым щIалэщIэм и проектым гулъытэ зэрыщигъуэтар. Ар гъэзэщIа хъун папщIэ Астемыр ЩIалэгъуалэ IуэхухэмкIэ къэрал агентствэм мылъкукIэ зыкъыщIигъэкъуащ.
«Дай Vibe»-р - ар зэфIэкI зыбгъэдэлъ творческэ цIыхухэр къыхэшынымкIэ, рэп жанрым тету зи дуней еплъыкIэр уэрэдкIэ къэзыIуатэ ныбжьыщIэхэр утыку къихьэнымкIэ IэмалыфIщ. ГъэщIэгъуэну Iуэхум хэлъыр ягъэзащIэ уэрэдхэри макъамэхэри езыхэм я IэдакъэщIэкIыу зэрыщытырщ.
Зэпеуэм и япэ Iыхьэм къэпщытакIуэу хэтахэщ КъБР-м щыIэ ММЦ-м и унафэщI Жаным Саидэ, ЩIалэгъуалэ правительствэм щэнхабзэмкIэ и министр Хьэгъэжей Иринэ сымэ. Апхуэдэу Iуэхум кърихьэлIащ ShowroomQueens Тинэ щыгъынщапIэ тыкуэным и лIыкIуэри.
Фестивалыр Iыхьищу зэщхьэщыхауэ щытщ. Абыхэм пхыкI ныбжьыщIитхум Iэмал яIэнущ бжыгъэр зи лъабжьэ платформэхэм къэтын хуэдэу я IэдакъэщIэкIхэр ирагъэтхыну.
«Дай Vibe» фестивалым и къыкIэлъыкIуэ Iыхьэр гъатхэпэм и 2-м зэхэтынущ.