Гупсысэ телъыджэхэр къэзыгъэщI сурэтхэр

Гъэлъэгъуэныгъэхэр

Ткаченкэ Андрей и цIэр зезыхьэ СурэтыщI гъуазджэхэмкIэ музейм иджыблагъэ къыщызэIуахащ сурэтыщI Iэзэ Уянаев Аслъэнджэрий и IэдакъэщIэкIхэм я гъэлъэгъуэныгъэ.

- Сызэплъа сурэтхэм къызгурагъэIуащ Уянаевым и лэжьыгъэхэм къыщигъэлъагъуэр езым и гурыгъу-гурыщIэхэр зэрыарар. лэч плъыфэбэхэмкIэ абы къегъэщI дуней телъыджэ, зэмыфэгъу. А Iуэхум гу лъатауэ къысщохъу мыбы къекIуэлIа дэтхэнэми. Сыщогугъ Аслъэнджэрий сурэт щIыным хуэзыгъэушэ Къэбэрдей-Балъкъэрми щыIэу, - жиIащ КъБР-м щэнхабзэмкIэ и министрым и къалэнхэр зыгъэзащIэ Къумахуэ Мухьэдин зэIущIэр къыщызэIуихым.
Уянаевыр къыщалъхуа щIыналъэм нэхърэ Урысейм, хамэ къэралхэм нэхъыбэу къызэрыщацIыхум, къыхуащI пщIэ лъагэм тепсэлъыхьащ КъБР-м и СурэтыщIхэм я зэгухьэныгъэм и тхьэмадэ Темыркъан Геннадий.   
- ИкъукIэ гъэлъэгъуэныгъэ телъыджэщ, гупсысэ куу зиIэ теплъэгъуэщ тлъагъухэр. Уянаевым и лэжьыгъэхэр къыбгурыIуэн папщIэ,  гукIэ зыхэпщIэн хуейщ.  Абстракцэ къабзэм и жыпхъэм ит сурэтхэр ди республикэм куэдрэ щыплъагъунукъым, абы къыхэкIыу, мы лэжьыгъэ щIэщыгъуэхэр зей сурэтыщIым фIыщIэ хуэсщIыну сыхуейщ, - жиIащ Темыркъаным.
Уянаевым теухуауэ теленэтын зыгъэхьэзырауэ щыта журналист Мишаевэ Ахузат  къыхигъэщащ сурэтыщIым и IэдакъэщIэкIхэм мыбдеж  нэгъуэщIынэкIэ зэрыщеплъыжар.
- Мы сурэтхэм щхьэж езым пэгъунэгъу гуэр щилъагъунущ.  Аслъэнджэрий, упсэу, уефIэкIуэну ди гуапэщ! - жиIащ абы.
КъБР-м и Лъэпкъ библиотекэм и унафэщI Емуз Анатолэ къыщыпсалъэм къыхигъэщащ гъуазджэм куууэ хэзыщIыкIхэм захимылъытэжми, выставкэм щилъэгъуар телъыджэ зэрыщыхъуар, икIи библиотекэм и лэжьакIуэхэм, езым къыбгъэдэкIыу сурэтыщIым фIыщIэ хуищIащ.
- СурэтыщIым и IэдакъэщIэкIхэр ассоциативнэ реализмэу къегъэлъагъуэ. Пэжщ, абы сурэт щIын щыщIидзам  къыхиха унэтIыныгъэр зыхуэдэр куэдым къыдгурыIуатэкъым. Зэрытлъагъущи, и гум жиIам едэIуа IэщIагъэлIыр къэпцIакъым, ар дуней псом къыщацIыху сурэтыщIщ. Мы гъэлъэгъуэныгъэ  екIур къызэзыгъэпэща ЩэнхабзэмкIэ министерствэм фIыщIэ лей хуэсщIыну сыхуейщ, - жиIащ КъБР-м и Iэтащхьэм и чэнджэщэгъу Уянаевэ Iэминат къыщыпсалъэм.  
ЗэIущIэм и кIэухым Уянаев Аслъэнджэрий  къызэхуэсахэм фIыщIэ яхуищIри, «Сурэтхэм набдзэгубдзаплъэу феплъыну фыкъыхузоджэ!» - псалъэхэмкIэ захуигъэзащ.

Сурэтхэр Къарей Элинэ трихащ.

 

 

 

 

 

Щомахуэ Залинэ.
Поделиться: