ДУНЕЙМ ЩЫХЪЫБАРХЭР

Олимп Джэгухэр ягъэIэпхъуэ

Дунейм кIуэ пэтми нэхъри зыщызыубгъу узыфэм - коронавирусым - цIыхухэм къахуихь ныкъусаныгъэхэм, зэхуэмыхъуныгъэхэм иджыри зы къахэхъуащ. Токио мы гъэм щекIуэкIын хуейуэ щыта Олимп Джэгухэр зэрагъэIэпхъуэм теухуа унафэ къащтащ гъатхэпэм и 24-м. ЦIыху мелуанхэм - спортсменхэми абыхэм я зэфIэкIхэм еплъыну хуейхэми - къахуэмыгъэсу зыпэплъа а спорт махуэшхуэхэр дызыхуэкIуэ 2021 гъэрщ щрагъэкIуэкIынур.

ДУНЕЙПСО Олимп Комитетым и унафэщI Бах Томасрэ Японием и премьер-министр Абэ Синдзорэ зэрызэгурыIуам арэзы техъуащ Токио щекIуэкIыну зэхьэзэхуэхэм я къызэгъэпэщакIуэ комитетым и унафэщI Ёсирэ Мори, къэралым Олимп джэгухэмкIэ и министр Сейкэ Хасимотэ, Токио и Iэтащхьэ Эрикэ Коике сымэ, нэгъуэщI къулыкъущIэхэри. Абыхэм къыхагъэщащ COVID-19 вирусым и зэранкIэ дунейм къыщыхъуа щытыкIэм икъукIэ зэригъэгузавэр икIи Олимпиадэм сыт и лъэныкъуэкIи хуэхьэзыр хъуами, ар ягъэIэпхъуэныр зэрыIэмалыншэр.
Фигу къэдгъэкIыжынщи, Японием и къалащхьэ Токио ХХХII гъэмахуэ Олимп Джэгухэр щыщекIуэкIын хуейт мы гъэм и бадзэуэгъуэм и 24 - шыщхьэуIум и 9-хэм къриубыдэу.
Олимпиадэм къыхуагъэсэбэпыну ухуэныгъэу Токио иIэм хуэдиз зэи зыщIыпIи щагъэхьэзыракъым. Псалъэм папщIэ, 2012 гъэм Лондон къыхузэгъэпэщар 31-рэт зэрыхъур, 2008 гъэм Пекин, 2016 гъэм Рио-де-Жанейрэ яIар ухуэныгъэ 37-рэт. Токио 42-рэ хузэфIэкIащ. Абыхэм ящыщу 8-р щIэуэ яухуащ, 24-р зэрагъэпэщыжащ, пIалъэкIэ къагъэсэбэпынуи 1 ящIащ. И гугъу щIэпщIыххэни щыIэу къыщIэкIынкъым ахэр псори сыт и лъэныкъуэкIи зыхуей зэрыхуэзам - спортсменхэми зэхьэзэхуэхэм кIэлъыплъынухэми я тыншыпIэ псомкIи къызэгъэпэщауэ зэрыщытым. ЩIэуэ яухуа Олимп стадионым цIыху мин 68-рэ атлетикэ псынщIэмкIэ зэхьэзэхуэхэм щеплъыфынущ, футбол зэпеуэхэм деж мин 80 ихуэнущ.
Олимп Джэгухэр дызыхуэкIуэ илъэсым и гъэмахуэм екIуэкIынущи, а ухуэныгъэ телъыджэхэм я дахагъми, спортсменхэм я зэфIэкIми цIыхухэм гу щахуэну Iэмал яIэнщ, Тхьэм жиIэмэ.

УФ-м гуэдзыр щIыдагъэм нэхърэ нэхъ лъапIэ щыхъуащ

Зы тхьэмахуэ зэхуакум къриубыдэу гуэдз тонным и уасэр сом минкIэ щыдэкIуеящ Урысейм - сом мин 13,3-рэ хуозэ иджыпсту. Ар щIыдагъэм нэхърэ нэхъ лъапIэщ зэкIэ. Апхуэдэ нэхъапэм къэмыхъуауэ аращ экономистхэм жаIэр. КъызыхэкIари, долларымрэ еврэмрэ хэхъуэу, сомым и пщIэр зэрехуэхарщ.

ДУНЕЙПСО сату щIыпIэхэми щыдэуеящ иужьрей зэманым гуэдз уасэр. А щытыкIэр къалъытауэ, гъавэр хамэ къэралхэм езыщэжхэм ар къызэращэху уасэри къаIэтащ. Гъавэ зиIэ дэтхэнэри иджыпсту хущIэкъунущ фейдэ нэхъыбэ къыпэкIуэу ар зэрыригъэкIыным. Урысей мэкъумэшыщIэхэри яужь итщ я гуэдзыр зэращэным: абыхэм сэгъуэр зэрызэфIагъэкIын мылъку зэрагъэпэщын, апхуэдэуи хъумапIэхэр къаунэщIын хуейщ, гъавэщIэр къаIэрыхьэмэ щIагъэзэгъэн хуэдэу.

Нобэ

Театрым и дунейпсо махуэщ
Урысейм и МВД-м и къэрал кIуэцI дзэхэм я махуэщ
1945 гъэм
Бирмэм и лъэпкъ армэм зыкъиIэтащ икIи я къэралыр япон зэрыпхъуакIуэхэм къыIэщIигъэкIыжащ.
1968 гъэм, зэрыса кхъухьлъатэр Владимир областым къыщехуэхри, иукIащ дунейм и япэ космонавт, Совет Союзым и ЛIыхъужь Гагарин Юрий.
1990 гъэм Инджылызым и къалащхьэ Лондон къыщызэIуахащ Конан Дойл Артур и тхыгъэхэм я лIыхъужь Холмс Шерлок и музей.
2011 гъэм Урысейр гъэмахуэ зэманым техьащ - УФ-м и Президенту а зэманым щыта Медведев Дмитрий Iэ щIидзащ щIымахуэ, гъэмахуэ зэман жаIэу сыхьэтхэр ирамыгъэкIуэтэкIыным теухуа унафэм.
Нэмыцэ физик цIэрыIуэ, Нобель и саугъэтым и япэ лауреат Рентген Вильгельм Конрад къызэралъхурэ илъэси 175-рэ ирокъу.
1881 гъэм къалъхуащ урысей тхакIуэ Аверченкэ Аркадий.
1886 гъэм къалъхуащ революционер, политик, къэрал лэжьакIуэ Киров (Костриков) Сергей. Ар 1934 гъэм яукIащ.
1927 гъэм къалъхуащ совет пианист, виолончелым Iэзэу еуэу щыта, дирижёр, жылагъуэ лэжьакIуэ цIэрыIуэ, СССР-м и цIыхубэ артист, УФ-м и Къэрал саугъэтыр зыхуагъэфэща, «Грэмми» саугъэтыр тхуэнейрэ зрата Ростропович Мстислав.
1925 гъэм къалъхуащ КъБР-м и цIыхубэ усакIуэ Балъкъэр Фоусэт.
1948 гъэм къалъхуащ урысей актёр, УФ-м и цIыхубэ артист Жарков Алексей.
1951 гъэм къалъхуащ 1990 - 1996 гъэхэм Урысейм нэгъуэщI къэрал IуэхухэмкIэ и министру, УФ-м и Къэрал Думэм и япэ, етIуанэ хэхыгъуэхэм я депутату щыта Козырев Андрей.
1963 гъэм къалъхуащ США-м щыщ кинорежиссёр, актёр цIэрыIуэ Тарантинэ Квентин.
1983 гъэм къалъхуащ урысей лыжник, биатлонист, паралимп чемпион плIэнейрэ хъуа Зарипов Ирек.

Дунейм и щытыкIэнур

«pogoda.yandex.ru» сайтым зэритымкIэ, Налшык уфауэ щыщытынущ. Хуабэр махуэм градуси 9 - 12, жэщым градуси 3 - 5 щыхъунущ.

Лъэпкъ Iущыгъэ:
Хьэпшыпышхуэ умыдзи, псалъэшхуэ умыутIыпщ.

Зыгъэхьэзырар ЖЬЭКIЭМЫХЪУ Маринэщ.
Поделиться:

Читать также:

27.03.2024 - 15:00 НОБЭ
26.03.2024 - 08:01 НОБЭ
25.03.2024 - 12:07 НОБЭ
22.03.2024 - 15:54 Псым и махуэ