ЦIыху гъащIэм сом мини 100 хуигъэзат

КъБР-м щыIэ МВД-м Уголовнэ къэлъыхъуэныгъэмкIэ и управленэмрэ Урысей гвардием и управленэу КъБР-м щыIэм и гуп хэхамрэ (СОБР) я лэжьакIуэхэм яубыдащ нэпсеягъэм къыхэкIыу и цIыхугъэр зыукIыну хэта републикэм щыпсэур.

Республикэ МВД-м и УР-м и лэжьакIуэхэм къаIэрыхьат илъэс 32-рэ зи ныбжь налшыкдэсым нэпсеягъэм къыхэкIыу илъэс 42-рэ зи ныбжь и цIыхугъэр иукIыну мурад зэриIэм теухуа хъыбар. Ар езым зэрыхузэфIэмыкIынур къыгурыIуэрти, ахъшэкIэ зэфIэзыхын къищтэну триухуащ.
БзаджащIэр къыщIагъэщу и гурылъ фIейр къызэпаудын папщIэ укIыгъэр игъэзэщIэн хуэдэу уващ УР-м и лэжьакIуэр. Полицейр хуэзащ а цIыхухъум, Iуэхум тепсэлъыхьу ахъшэр къыIихыну. И пащхьэ къитыр хабзэхъумэ IэнатIэм и лэжьакIуэу имыщIэххэу, цIыхухъум абы иритащ сом мини 100.
Ахъшэр зэрызэIэпахыу УР-м и лэжьакIуэхэм, КъБР-м щыIэ Урысей гвардием и управленэм и гуп хэхам и зауэлIхэр ящIыгъуу, шэч зыхуащIыр яубыдащ.
Урысей Федерацэм СледствэмкIэ и комитетым СледствэмкIэ и управленэу КъБР-м щыIэм уголовнэ Iуэху къиIэтащ УФ-м и Уголовнэ кодексым и 33-нэ статьям и 4-нэ Iыхьэм, 30-нэ статьям и 1-нэ Iыхьэм, 105-нэ статьям и 2-нэ Iыхьэм и «з» пунктым ипкъ иткIэ.
Яубыда цIыхухъур иджыпсту щыIэщ Налшык къалэмкIэ УМВД-м пIалъэкIэ щаIыгъ и изоляторым.

КъБР-м щыIэ МВД-м и пресс-IуэхущIапIэ.
Поделиться: