1980 гъэм Мэзкуу щекIуэкIыну Гъэмахуэ Олимп Джэгухэм и гуащIэгъуэу зыщыхуагъэхьэзыр бадзэуэгъуэ (июль) мазэм и пэщIэдзэм Къэбэрдей-Балъкъэрым хыхьэ Тэрч къалэм пэмыжыжьэ Белоглинское къуажэм щыпсэу Хъущтхэ я унагъуэм дунейм къыщытехьащ пелуан теплъэ зиIэ щIалэ Iэбыдэлъэбыдэ. ЦIыхум и натIэм къритхар хуэгъэфэщэгъуейщ, ауэ Къытщхьэщытым фIэкIа зыми ищIакъым илъэс 28-рэ дэкIмэ ар дэтхэнэ зы спортсменри зыщIэхъуэпс Олимп чемпион хъуну.
ЕпщыкIубгъуанэ лIэщIыгъуэм адыгэхэм къатепсыха гуауэм лъэпкъ куэдым хуэдэу дунеишхуэм щызэбгридзащ Хъущт лъэпкъри. Абыхэм ящыщ унагъуэ куэд щопсэу Адыгейм, Къэбэрдей-Балъкъэрым, хамэ къэрал зыбжанэм. Псоми я гъащIэр къызэрекIуэкIар зырызыххэущ, ауэ я лъабжьэр, я къежьапIэр зыщ - Шапсыгъырщ. Абы щыIэщ Хъущтхэ я къуажэ Кичмай Ин жылагъуэр. Пекин щекIуэкIа Олимп Джэгухэм текIуэныгъэ къыщызыхьа Хъущт Аслъэнбэч ирагъэблагъэри, япэу щыхьэщIар, дауи, лъэпкъкIэ зыщыщ а щIыналъэращ.
2008 гъэм и гъэмахуэм алыдж-урым бэнэкIэм-кIэ килограмм 96-рэ зи хьэлъагъхэм я гупым олимп чемпионыщIэ къызэрыхэхъуам и хъыбарым зэщIищтащ Тенджыз ФIыцIэм и Iуфэм щыпсэу шапсыгъхэр. Ар спортым цIыху псори - дихьэххэри, абы пэжыжьэхэри - щызэщIигъэуIуа махуэт. Абы икъукIэ щыгуфIыкIащ Сочэ къалэм и ТIуапсы районым щыпсэу Хъущтхэ я лъэпкъышхуэр.
Аслъэнбэч и ехъулIэныгъэм иригушхуа къуэш лъэпкъым къыбгъэдэкIыу Къэбэрдей-Балъкъэр Республикэм спортымрэ туризмэмкIэ и министр АфIэунэ Аслъэн телефонкIэ ехъуэхъуащ шапсыгъ «Адыгэ Хасэм» и тхьэмадэ КIэкIыхъу Мажид. Зэман дэкIри, Урысей Федерацэм алыдж-урым бэнэкIэмкIэ и командэ къыхэхам Адлер зыгъэсэныгъэхэр щрагъэкIуэкIыу Хъущтым УФ-м алыдж-урым бэнэкIэмкIэ и федерацэм и унафэщIхэм я гъусэу Сочэ къыщызэIуихащ бэнакIуэ цIэрыIуэ Карелин Александр и цIэр зезыхьэ спорт пэшыш-хуэ. 2008 гъэм и спортсмен нэхъыфIу къызэралъытам и щыхьэту а махуэхэм ящыщ зым ди лъэпкъэгъум къыхуагъэфэщащ бэнэкIэмкIэ дуней псом щынэхъ лъапIэ дыдэ тыгъэр - «Зэрыбанэ дыщэ фащэр». Дыщэпс зытегъэлъэда статуэткэр абы къритащ Сочэ къалэм и унафэщIу а зэманым щыта Хьэту Жамболэт.
ТхьэмахуитIкIэ Адлер щекIуэкIыну къыкIэлъы-кIуэ зыгъэсэныгъэхэм Аслъэнбэч Франджым къилъэтыкIри къэкIуащ, чемпионым зэрихабзэу, гугъущэ демыхьу 2009 гъэм и дунейпсо Кубокыр къихьри. Зигъэпсэхуну зэман абы иIэтэкъым, иджы ди къэралым и командэ къыхэхам щIэгъэхуэбжьауэ зыхуегъэхьэзыр мэлыжьыхьым екIуэкIыну Европэм и чемпионатым. Спортсменхэм я махуэр IэпэдэупIэ имыIэу гуэшащ. Нэхъапэм къагъэлъэгъуа зэфIэкIхэм емылъытауэ абы псори тетын хуейщ. АрщхьэкIэ, Кичмай Ин жылэм и нэхъыжь-хэм щрагъэблагъэм хуэгъэщIэхъуакъым:
- Сыхьэт зытIущкIэ сыкъиутIыпщыфынумэ ди тренер нэхъыщхьэм сепсэлъэнщ, - жиIащ Аслъэнбэч.
Абы и нэгум иплъагъуэрт и адэжьхэр щыпсэуа щIыпIэр зригъэлъагъуну, зригъэцIыхуну, и Iыхьлы шапсыгъхэм япсэлъылIэну зэрыщIэхъуэпсыр. АрщхьэкIэ ар зэпыпщэну икъукIэ гугъут.
- Зыгъэсэныгъэхэм я программэр БэнэкIэмкIэ федерацэм зэхегъэувэ, абы къыхэкIыу зэхъуэкIыныгъэ хэплъхьэнухэмкIэ Мэзкуу уечэнджэщын хуейщ. Дэ ди Iуэхум зэи цIыкIуфэкIу хэлъкъым, - игу къегъэкIыж Хъущтым и тренер Къардэн Анзор. - Ауэ Аслъэнбэч жэуаплыныгъэшхуэ зэрыхэлъыр къалъытэри, дыкъаутIыпщащ. Фи фIэщ зэрыхъун, апхуэдэхэр къыщыхъур мащIэ дыдэрэщ. УнафэщIхэм къалъытащ абы и къежьапIэри - командэм хэтхэр щыгъуазэщ бгырыс лъэпкъхэм я хабзэхэм, унагъуэ зэхущытыкIэхэм.
- Аслъэнбэч олимп медалым зэрыхуэкIуа гъуэгуанэр икъукIэ гугъут, - къыпещэ адэкIэ Къардэн Анзор. - Командэ къыхэхам езым ипкъ иIэжщи, абы ухэхуэныр лэжьыгъэ хьэлъэщ. Пекин дыщыкIуэнум ипэ къихуэ илъэситIым зыми шэч къытредгъэхьакъым дэ къэралым и цIэкIэ Олимп Джэгухэм дызэрыщыбэнэфынум. Аслъэнбэч и зэIущIэ псори къабзэу къихьырт, и хьэрхуэрэгъухэм зы очко закъуэ фIэкIаи яритакъым. КъищынэмыщIауэ, ар хуитакъым щыуагъэ гуэр IэщIэкIыну - апхуэдэу ущытыныр икъукIэ хьэлъэщ.
Тренерым къызэрилъытэмкIэ, Хъущтым и хьэлыфIхэм ящыщщ зы Iуэхум зытриухуэу адрейхэр лъэныкъуэкIэ иригъэкIуэтэкIыфыныр.
- Алъэнбэч сытым дежи дахэу, удэзыхьэхыу мэбанэ, - жеIэ Къардэным. - Iэмал куэд ещIэри, ахэр и хьэрхуэрэгъухэм я зэфIэкIым елъытауэ къегъэсэбэпыф. Абы и дэтхэнэ зэIущIэри гукъинэж, псори дэзыхьэх мэхъу.
Пекин щригъэкIуэкIа япэ зэIущIитIым яужькIэ, цIыху мин 15 зыщIэс пэшым дикторым Хъущтыр къыщригъэблагъэм, псори IэгуауэшхуэкIэ абы пэджэжащ. Абы и бэнэкIэм кIэлъыплъыну зэIущIэхэм къекIуалIэрт нэгъуэщI къэралхэм я командэ къыхэхахэм я тренерхэр.
Алыдж-урым бэнэкIэмкIэ профессиональнэу Аслъэнбэч зигъэсэн щыщIидзар гувауэщ - илъэс 23-рэ хъууэщ. Абы и пэкIэ и ныбжь щIалэ цIыкIухэм хуэдэу къыщыхъуа къуажэм щылажьэ лъэпкъ бгырыпх бэнэкIэмкIэ секцэм зыщигъэсащ. АдэкIэ ерыщу щыпищащ еджапIэ зыщIэтIысхьа Къэбэрдей-Балъкъэр мэкъумэш академием. Куэд щыгъуазэкъым Хъущтыр а спорт лIэужьыгъуэмкIэ республикэ зэхьэзэхуэм и домбеякъ медалыр къихьауэ зэрыщытам.
Нэхъапэхэм абы, зэрыжаIэщи, уафэгум вагъуэ къыщиубыдыртэкъым - дунейпсо чемпионат, олимпиадэ жыхуэпIэхэм егупсысыххэртэкъым. Игу къызэригъэкIыжымкIэ, район чемпионатми зэи щытекIуакъым.
Аслъэнбэч и анэр пэщIэдзэ классхэм я егъэджакIуэщ, и адэр щIалэ цIыкIур илъэситху хъууэ дунейм ехыжащ. Унагъуэм сабиищ къыщыхъуащ: шыпхъу нэхъыжьрэ къуэш нэхъыщIэрэ иIэщ. Спортым и япэ лъэбакъуэхэр Хъущтым щрагъэчащ тренерхэу Битокъу Юрэрэ Цырхъ Анзоррэ. ЕджапIэ нэхъыщхьэм «технолог» IэщIагъэр щызригъэгъуэтащ. IэщIагъэ нэхъыщхьэ игъуэта иужькIэщ абы бэнэкIэм и зэман псори щыхухихар.
Нэхъапэм зыми ямыцIыхуу щыта Къэбэрдей-Балъкъэрым и бэнакIуэ щIалэщIэр къэралым и командэ къыхэхам и тренерхэм ягу дыхьащ икIи я гъусэу зигъэсэну ирагъэблэгъащ. АдэкIэ абы зэхуихьэсу щIидзащ нэхъ лъапIэныгъэ дыдэ зиIэ медалхэр. Нобэ Хъущтыр дуней псомрэ Европэмрэ я чемпионщ, УФ-мрэ хамэ къэралхэмрэ я зэхьэзэхуэ зыбжанэм щытекIуащ, дунейпсо классымкIэ спортым и мастерщ.
- Аслъэнбэч Олимп медаль нэхъ лъапIэ дыдэр къызэрихьынум шэч лъэпкъ къытесхьэртэкъым, - жеIэ Къардэным. - А фIэщхъуныгъэр сэ къыздаIыгъырт командэ къыхэхам и тренерхэми - щIалэр сытым дежи текIуэныгъэм хъущIэкъурт, ар ди лэжьыгъэм щынэхъапэхэм ящыщщ. ЦIыхугъэ и лъэныкъуэкIэ уеплъмэ, куэдым ар ягу ирохь - Аслъэнбэч цIыху зэIухащ, гу къабзэщ, пцIырэ фэрыщIагъэрэ илъагъу хъуркъым. Абы хуэдэхэм щхьэкIэ жаIэ: захуагъэм и телъхьэщ - лей къызытехьэхэм я къыщхьэщыжакIуэщ.
Пекин и дыщэ медалыр Аслъэнбэч къыхуихьащ езым фIэкIа зыми къыхуэмыгъэсэбэп бэнэкIэ Iэмал гъуэзэджэм - «бгырыпх зэдзэкIа» зыфIащам. Мы спорт лIэужьыгъуэм хэтхэр щыгъуазэщ ар зэбгъэхъулIэну хуабжьу зэрыгугъур. КъызэрымыкIуэ къарумрэ Iэзагъымрэ къищынэмыщIауэ абы папщIэ егъэлеяуэ псынщIагъ пхэлъын хуейщ, къыпщхьэщыс хьэрхуэрэгъум напIэзыпIэм укъыIэщIокI, зэщIыбоубыдэ, алэрыбгъум къытыбочри, уи щхьэмкIэ щхьэпрыбодз. Апхуэдэ Iэмалыр Аслъэнбэч хуабжьу дэзыхьэх адыгэ бгырыпх лъэпкъ бэнэкIэм куэдрэ ущрохьэлIэ.
Хъущтым и «бгырыпх зэдзэкIам» дуней псом и спортсмен цIэрыIуэ куэд ихьащ. Иужьрейхэм ящыщщ Олимпиадэм и финалым щыхигъэщIа нэмыцэ абрагъуэ Энглих.
- Псори езыр-езыру къэхъуащ, - игу къегъэкIыж Пекин и чемпионым. - И Iэр къыщишиям къысхуэмыIэтынкIэ шэч къытесхьат. АрщхьэкIэ секIуэтэкIи хъунутэкъыми, къарурэ ерыщагъыу сиIэр зэхэслъхьэри, си хьэрхуэрэгъур щхьэпрыздзащ.
… Мамайкэрэ Кичмай Инымрэ я зэхуаку километр щэщI дэлъми аращ. Мыбдежым Сочэ и нэшэкъашэхэм щыщIедзэ икIи абы къыхэкIыу гъуэгуанэр сыхьэт нэблагъэкIэ зэпыбоч. Зэманыр пщIэншэу ямыгъэкIуэду адэкIэ макIуэ олимп чемпионым дэщIыгъухэр - Дыгъэмыс, Лоо, Вардан (убыххэр УэрдэнкIэ еджэу щытащ), Детляжкэ (ДетлIэкъуей), Осокэ (Iуэсэкъуей), Головинкэ (Щыхьэп). Шахэ псым и аузым дыщынэсым Хъущтыр нэхъ псалъэмакъыншэ, хэгупсысыхь хъуащ. Ар икIи гурыIуэгъуэщ - адэжь щIыналъэм япэу ущихьар игъащIэ псокIэ гум къонэ.
Головинкэ и деж бгымкIэ яунэтI. Хъущт Аслъэнбэчрэ Къардэн Анзоррэ яхуэзэну Кичмай Иным къыщызэхуэсат гъунэгъу жылэхэм щыпсэу шапсыгъхэр. Яхэтт абыхэм Хъущтхэ я лIыкIуэхэри - нэхъыжьхэри щIалэгъуалэри. Мы къуажэм пщIэшхуэ щызиIэ Хъущт Заур и пщIантIэм пщэдджыжьым жьыуэ Iэщ щаукIат, адыгэ шхыныгъуэ IэфIхэр щапщэфIырт. Кичмай Иным и махуэшхуэт!
Ахинтэм жылагъуэм щыпсэу ХьэщIэмызхэ я унагъуэм щызэрахьэ ХьэщIэ лъапIэхэм я тхылъым Аслъэнбэч тхыгъэ щищIащ. Шапсыгъхэм къахуэкIуэ дэтхэнэри мы щIыпIэм къыщызэтеувыIэ хабзэщ. Унагъуэм и нэхъыжь ХьэщIэмыз Хьисэ езым хьэщIэр кърегъэблагъэ. Iэмал имыIэу яхутопсэлъыхь Тенджыз ФIыцIэ Iуфэм щыпсэу адыгэхэм я къекIуэкIыкIам, хабзэм, зэхэтыкIэм. Унагъуэ музейм щызэхуэхьэса хьэпшыпхэр мы щIыпIэм игъащIэ лъандэрэ щыпсэу шапсыгъ адыгэхэм я лъэпкъ-щэнхабзэ зыужьыныгъэм и щыхьэтщ. Бгырыс хабзэ уардэм, адыгагъэ нэсым теухуауэ мыбы ящымыгъупща блэкIам я пэщIэдзэ дерсхэр щат.
Адыгэ жьэгум бгъэдэсу Хъущтымрэ Къардэнымрэ шапсыгъ шей гуакIуэм ефэрт. Псом хуэмыдэу абыхэм яфIэгъэщIэгъуэнащ ХьэщIэмызхэ я лъэпкъ жыгыр: лъэдий лъэщым къудамий къыхокI, абыхэм гъэчхэр я куэдщ…
Лъэпкъ хабзэр иджыри ткIийуэ щаIыгъ Джылахъстэнейм къикIахэм псори яфIэхьэлэмэтт. МэзыдэкIэ зэщIэбла хьэгъуэлIыгъуэ ныпым сыт къикIыр? Дауэ фызышэр зэрекIуэкIыр? УпщIэхэр куэдми, жэуапхэр зэпкърыхат икIи гурыIуэгъуэт.
Урыс-кавказ зауэм ехьэлIа Iуэхугъуэхэр илъэс къэс щекIуэкIыр Кичмай Инырщ. Абы къыщызэIуахащ адэжь Хэкум папщIэ зи псэр зыта адыгэхэм я фэеплъ сын. Абдеж дыдэм щытщ фашизмэм пэщIэтурэ хэкIуэдахэм хуагъэувари. Аслъэнбэч куэдрэ хэплъащ къэзымыгъэзэжахэм я унэцIэхэр зытет пхъэбгъум. Абы Хъущтхэ ящыщу тIощIым нэблагъэ итт.
Куэдрэ щытащ хьэщIэхэр адэжьхэм я фэеплъ сыным и деж. Дауи, я нэгу къыщIэуващ Шахэ псым и Iуфэхэм урысыдзэр къыщитIысыкIын и пэкIэ адыгэ жылагъуэ блыщIым щIигъу абы зэрыщыпсэуар. Иджы ахэр зэрыхъужыр 3 къудейщ… Лъэпкъым игъуэта хэщIыныгъэр пхуэмыIуэтэнщ икIи къыпхуэмыпщынщ.
- Мыпхуэдэ щIыпIэхэм укъыщыхута иужькIэ псалъэхэр къомэщIэкI, - жеIэ Аслъэнбэч. - Дэ дызэрыгушхуэн тхыдэ дахэ икIи гууз диIэщ. Гуапэщ шапсыгъхэм ар зэрахъумэр, нобэрей щIэблэм зэрырагъащIэр.
Кичмай Иным и кум щызэхуэсат нэхъыжьхэр, щIалэгъуалэр, школакIуэхэр. Абыхэм Хъущт Аслъэнбэч ирагъэблагъэрт.
- Мыбы псори сыщалъхуа къуажэм щыхуэдэ дыдэщ, - жиIащ Аслъэнбэч, и благъэ куэдым сэлам ярихыурэ.
ЩIыпIэ еджапIэм и унафэщI Гуашэ Аслъэн Хъущтымрэ Къардэнымрэ школым щIешэ. Мы гъэм зи ныбжьыр илъэс 85-рэ ирикъуну еджапIэм и теплъэми Олимп чемпионым и къуажэм дэтыр игу къегъэкIыж.
- Мыпхуэдэ дыдэ школ тIорысэ цIыкIущ сэри сыщеджар, - жеIэ Аслъэнбэч. - Ди классым еджакIуэу тху дыщIэсауэ аращ.
ХьэщIэхэр классхэм ящыщ зым щIашащ. Абы щызэхуэсат школыр зэрыщыту. Псалъэмакъ гуапэхэм, хъуэхъухэм я ужькIэ Джылахъстэнейм къикIахэм мэзыдэм къыхэщIыкIа шапсыгъ нып, еджапIэм и гербыр хэщIыхьауэ, тыгъэ хуащIащ. Дауи, абы еплъыхукIэ Кичмай Иным щыщыIа лъэхъэнэр игу къигъэкIыжынущ.
Апхуэдиз цIыху къуажэ клубым куэд щIауэ щызэхуэсатэкъым. Олимп чемпионымрэ абы и тренерымрэ Iэгуауэ инкIэ ирагъэблэгъащ. ХьэщIэхэр, дауи, жьантIэмкIэ щагъэтIысащ.
Уэздыгъэр ягъэункIыфIри, экран иным дуней псор зыщыгъуазэ теплъэгъуэхэр къиуващ. Абы адыгэ щIалэ Хъущт Аслъэнбэч и хьэрхуэрэгъу псори олимп алэрыбгъум щыхегъащIэ. Еплъхэр, езыхэр бэнэныгъэм хэту фIэкIа умыщIэну, мэгузавэ, хэти къыщолъэт, икIэм-икIэжым, псори зэрогъэкIий. Ар Аслъэнбэч финалым щытекIуауэ аращ!
- Зызумысыжынщи, си пщIыхьэпIи къыхэхуэнтэкъым Аслъэнбэч адэжь щIыналъэм апхуэдэ пщIэ лъагэ зэригъэгъуэтауэ япэ дыдэу къыщедгъэблэгъэну, - жиIащ лъэпкъым я нэхъыжь, Кубаным (Псыжьым) щIыхь зиIэ и журналист Хъущт Аслъэнбий. - Аслъэнбэч дигъэгушхуащ, дыкъызыхэкIа ди лъэпкъым, Хэкум папщIэ нэхъ пагэж дищIащ. ЕхъулIэныгъэхэр нэхъыбэжу дяпэкIи уиIэну, шынэхъыщIэ! Адэжь Хэкум къаруущIэхэр къыпхрелъхьэ!
- ДрипIейтейуэ Аслъэнбэч Пекин дыщыкIэлъып-лъащ, абы папщIэ дыгузавэрт, текIуэныгъэ къихьыну дыщIэхъуэпсырт, - къыпещэ Тенджыз ФIыцIэ Iуфэ щыпсэу шапсыгъхэм я «Адыгэ Хасэм» и тхьэмадэ КIэкIыхъу Мажид. - Адыгэхэм лIы цIэрыIуэ куэд дунейм къытрагъэхьащ. Иджы абыхэм ящыщ зыщ ди чемпион телъыджэр!
Апхуэдэ псалъэхэм Аслъэнбэч Iэнкун ящIат. АрщхьэкIэ псалъэ къищтащ:
- Тхьэр арэзы къыфхухъу, апхуэдэу лъагэу сызэрыфIэтам, сызэрывгъэлъэпIам папщIэ, - жиIащ абы. - Олимпиадэм сыщыIэу утыку сыщихьэм и деж псом япэу сегупсысырт сыкъызыхэкIа лъэпкъыр, къуажэр, республикэр си щIыбагъ къызэрыдэтым, ахэр къызэрысщыгугъым. Аращ къару къысхэзылъхьари. АдэкIи абы сытетынущ.
Тенджыз ФIыцIэ Iуфэ щыпсэу шапсыгъхэм я деж къэкIуэну куэд щIауэ иIэ хъуэпсапIэр зригъэхъулIауэ, «Шапсыгъ» лъэпкъ ансамблым и гукъыдэжыр нэхъ иныжу къиIэтауэ зэIущIэ дахэр иухащ. Ар гукъинэж нэс ящыхъуащ абы хэта дэтхэнэ зыми.
ИужькIэ Аслъэнбэч щхьэхуэу щыхьэщIащ Хъущтхэ я деж. Дауи, къагъэуват шыгъупIастэ Iэнэ берычэт, щаIэтащ абы хъуэхъу Iэджэ, куэдым щытепсэлъыхьахэщ.
Алъандэрэ илъэсипщI дэкIащ. Абы щыгъуэм къэщIэрэщIэжа зэпыщIэныгъэхэр ягъэбыдэ зэпытщ. Ахэр щIэх-щIэхыурэ зэкIэлъокIуэ, зэролъагъу, зэрощIэ. Иджыблагъэ, бадзэуэгъуэм и 1-м, Хъущт Аслъэнбэч и ныбжьыр илъэс плIыщI щыхъу юбилейри зэдагъэлъэпIащ. ГуфIэгъуэ куэд Алыхьым задригъэIэт!