Урысеймрэ Абхъаз Республикэмрэ щIыхь зиIэ я артисткэ, Адыгэ Республикэм и цIыхубэ артисткэ, Къандурым и цIэр зезыхьэ дунейпсо саугъэтым и лауреат Нэхей Тамарэ 1960 гъэм ЕджэпсыкъуеищIэ къуажэм къыщалъхуащ. Курыт еджапIэ нэужьым щеджащ гъуазджэхэмкIэ институту Краснодар дэтым, Ростов къалэм Рахманинов Сергей и цIэр зэрихьэу дэт консерваторием.
Адыгэ Республикэм и «Ислъэмей» къэрал ансамблым и уэрэджыIакIуэхэм яхэтащ Нэхейр, иужькIэ «Адыгэ» ГТРК-м музыкэмкIэ и къудамэм и унафэщIу илъэс зыбжанэкIэ лэжьащ. «Зы махуэкIэ - къуажэм», «Щэбэт» теленэтынхэр нобэр къыздэсым ящымыгъупщэжауэ цIыхухэм ящIэж. Ауэ ар къызыхуигъэщIар сценэрщ, и гъащIэм и нэхъыбэри абы ирихьэлIащ.
Нэхей Тамарэ лъэпкъ гъуазджэм и вагъуэщ жыпIэмэ ущыуэнукъым. Абы и уэрэдхэр теухуащ лъагъуныгъэм, цIыху зэхэщIыкIым, гухэлъ къабзэм. УэрэджыIакIуэм и макъ гурыхьымкIэ жиIэ уэрэдхэр едаIуэхэм я деж нехьэсыф, зэхрегъэщIэф. Аращ ар псоми фIыуэ къыщIалъагъури.
Бэрэтэр Хьэмидрэ КIыргъ Юрэрэ зэдауса «Бжьыхьэ фIылъагъуныгъэ» жыхуиIэ уэрэдыр зыгъэзэщIэн лъыхъуэхэу щызэхихым, композитор Натхъуэ Жанхъуэт абыхэм яжриIат Мейкъуапэ дэт Адыгэ щэнхабзэмкIэ унэм щылажьэ Нэхей Тамарэ деж кIуэну.
«Пщащэм и макъыр Iэтащ, дахэщ, зы уэрэдым и мызакъуэу, нэхъыби абы къывжиIэну лъэкIынщ, фызыIэпишэнщ», - къажриIат Жанхъуэт Бэрэтэрымрэ КIыргъымрэ.
«Бжьыхьэ фIылъагъуныгъэ» уэрэдыр цIыхубэм яхэIуащ, нэхъри зиIэтащ, дуней псом фIы дыдэу къыщацIыху «Катюша»-м ещхьу, Адыгэ Республикэм щыжаIэуи хуежьащ. Журналист КъумпIыл Светланэ игъэхьэзыр нэтынхэм языхэзыр къыщызэIуихым, а уэрэдыр япэ дыдэу щыIуауэ щытащ.
Адыгэ Республикэр Краснодар крайм къыхэкIыжа къудейуэ, «Ислъэмей» ансамблри къызэрызэрагъэпэщрэ куэд мыщIауэ, абы и унафэщI хъуа Нэхей Аслъэн пасэрей уэрэдыжьхэр ди зэманым езэгъыу, «псэщIэ яхилъхьэу» игъэувыжырт. Апхуэдэ уэрэдхэу, зи гугъу тщIы ансамблым Нэхей Тамарэ къыхидзэу, адрейхэр дежьууэ, игъэзэщIахэм ящыщщ «Мэзгуащэ», «Цэрацэ» «ЩыртIым», «Си Мурадин» жыхуиIэхэр.
Ауэ абы уэрэд жиIэ къудейм къыщынэркъым, ар гъуазджэхэмкIэ колледжым, Тхьэбысым Умар и цIэр зезыхьэм, уэрэд жыIэнымкIэ и егъэджакIуэщ.
Нэхей Тамарэ «Ислъэмейм» къыхэкIыжа нэужь, адыгэ телевиденэм зэрыщылэжьа зэманми уэрэд жыIэныр щызэпигъэуа къэхъуакъым. Израилым, Тыркум, США-м, нэгъуэщI хэгъэгухэми концертхэр щитащ. Адыгэ Республикэм и къэрал филармонием и уэрэджыIакIуэу, Адыгэ Республикэм гъуазджэхэмкIэ и колледжым, апхуэдэуи, АР-м и университетым гъуазджэхэмкIэ и институтым я лэжьакIуэу щытыху, абы и гъэсэнхэм хэгъэгу, дунейпсо фестивалхэм бжьыпэхэр щаубыдащ, щытхъу тхылъхэри зыIэрагъэхьащ. Абыхэм ящыщщ Даут Сусаннэ, Цыщэ Заретэ, Конжин Юрий, нэгъуэщIхэри. Абыхэм я уэрэдхэр Урысейм и телеканалхэм къатащ. Тамарэ и гъэсэнхэу Хьэкъун Заремэрэ Гъуэнэжьыкъуэ Аскэррэ зэдауса «ДызыхэкIыжыр», ЛIыхэс Мурадин и «Лъагъуныгъэр къоджэ» уэрэдхэр зымыщIэ адыгэ унагъуэ щыIэу къыщIэкIынкъым.
Нэхей Тамарэ Къэбэрдей-Балъкъэрми Адыгэ Республикэми я цIыхубэ артистхэу, уэрэджыIакIуэхэу Тут Заур, Сокъур Ольгэ, нэгъуэщIхэми пыщIэныгъэхэр яхуиIэщ.
«Адыгэбзэм и дахагъэм федэIуэну фыхуеймэ, Тамарэ щапхъэ тефх», - жиIат щIэныгъэ лэжьакIуэ, тхакIуэ Нало Заур.