Нобэ
Кадыровэ Айшэт щэнхабзэмкIэ
министрым и япэ къуэдзэу ягъэув
ХъыбарегъащIэ IуэхущIапIэхэм иужьрей махуэхэм зэбграгъэхахэм ящыщу цIыхухэм нэхъ гъэщIэгъуэн къащыхъуахэм хагъэхьащ Шэшэным щэнхабзэмкIэ и министрым и къуэдзэм теухуар.
Республикэм и Iэтащхьэ Кадыров Рамзан ехьэлIа сыт хуэдэ хъыбарми гулъытэ хэха хуащIу зэрыщытыркъым ар зэпхар. ЯфIэхьэлэмэт хъуар я Iыхьлыхэм къэрал къулыкъу иратыныр абы къемыкIуу къилъытэу зэрыщытарщ, иджы Рамзан ипхъу нэхъыжь Айшэт игъэуващ республикэм щэнхабзэмкIэ и министрым и япэ къуэдзэу.
«Айшэт а къулыкъур хуэзгъэфэщащ фIыуэ сегупсысщ, псори зэпэслъытри. И ныбжькIэ щIалэми, ар IэкIуэлъакIуэ хуэхъуащ проект нэхъ инхэм икIи гугъухэм, абыхэм щэнхабзэ IэнатIэм епхахэри яхэту, унафэ яхуэщIыным», - щитхащ республикэм и Iэтащхьэм и Telegeram-каналым.
Абы зэрыжиIамкIэ, Айшэт а къулыкъум гъэувыным теухуа жэрдэмыр къыхэзылъхьар Шэшэным щэнхабзэмкIэ и министр Дааев Хож-Баудищ.
ЩIыналъэм и унафэщIым хуэдэ дыдэу мыцIэрыIуэми, абы и бынхэм я IуэхущIафэхэми фIыуэ щыгъуазэщ цIыхухэр. Псалъэм папщIэ, министрым и япэ къуэдзэу игъэува Айшэт нэхъапэм игъэлажьэу щытащ цIыхубзхэм папщIэ фэилъхьэгъуэхэр къыщагупсыс, щад Firdaw IуэхущIапIэшхуэр. Апхуэдэуи Рамзан къыхигъэщащ и пхъум Шэшэн Республикэм и филармонием зегъэужьынми хэлъхьэныгъэшхуэ зэрыхуищIар икIи и пщэ къыдэхуа къалэнхэм пэлъэщыну зэрыщыгугъыр.
Нобэ
♦Дахагъэм и дунейпсо махуэщ
♦Кърум и дунейпсо махуэщ
♦Танкистым и махуэщ. 1946 гъэм Москва и Утыку Плъыжьым щекIуэкIащ танк дивизэм, Кантемировхэ я цIэр зезыхьэм, и парад. Абы лъандэрэ фокIадэм и етIуанэ тхьэмахуэ махуэр а дзэ лIэужьыгъуэм и махуэщ. Ар щагъэлъапIэ Белоруссиеми Украинэми.
♦Дизайнер-графикым и махуэщ
♦Таджикистан Республикэм и щхьэхуитыныгъэм и махуэщ
♦Молдовэ Республикэм и къэрал шынагъуэншагъэр къызэзыгъэпэщ лэжьакIуэхэм я махуэщ
♦Къэзахъстаным щагъэлъапIэ унагъуэм и махуэр. 2013 гъэм къыщыщIэдзауэ фокIадэм и етIуанэ тхьэмахуэ махуэм ягъэлъапIэ.
♦1776 гъэм Америкэм и колоние зэгуэтхэм я цIэр Америкэм и Штат Зэгуэтхэр жиIэу зэрахъуэкIащ.
♦1893 гъэм Германием «Штутгарт» футбол клубыр къыщызэрагъэпэщащ.
♦1913 гъэм дзэ кхъухьлъатэзехуэ Нестеров Пётр япэ дыдэ хузэфIэкIащ «мёртвая петля» жыхуаIэ Iэмалыр уэгум щигъэлъэгъуэн. Кхъухьлъатэзехуэм и Iэзагъым и лъагапIэ нэхъыщхьэу къалъытэ хъуат ар.
♦1933 гъэм сабийхэм папщIэ тхылъхэр къыщыдагъэкIыну «Детская литература» тедзапIэр къызэрагъэпэщащ.
♦1984 гъэм Москва щыщIидзащ шахматхэмкIэ дунейм и чемпион цIэм щIэбэнхэу Карпов Анатолийрэ Каспаров Гаррирэ я зэпеуэр. Ар мазитхукIэ екIуэкIащ икIи куэдыIуэ щIауэ зэрызэрытемыгъакIуэм къыхэкIыу зэпагъэун хуей хъуауэ щытащ.
♦1970 гъэм Волжскэ автозаводым «ВАЗ-2101» (Жигули) автомашинэ лIэужьыгъуэр къыщIигъэкIыу щIидзащ. ЦIыхубэр абы «кIэпIейкIэкIэ» еджэрт.
♦1999 гъэм Москва Гурьяновым и цIэр зезыхьэ и уэрамым щалэжьа терактым и зэранкIэ псэупIэ унэхэм ящыщ къэуащ. Абы цIыхуи 106-рэ хэкIуэдащ.
♦1828 гъэм къалъхуащ урыс тхакIуэшхуэ, дунейпсо литературэм и классик Толстой Лев.
♦1882 гъэм къалъхуащ шапсыгъ джэгуакIуэ Щхьэлахъуэ Алий.
♦1918 гъэм къалъхуащ совет усакIуэ, зэдзэкIакIуэ, сабийхэм яхуэтхэу щыта Заходер Борис.
♦1930 гъэм къалъхуащ совет уэрэджыIакIуэ, композитор, СССР-м и цIыхубэ артист Гуляев Юрий.
♦1930 гъэм къалъхуащ театрымрэ киномрэ я актрисэ, УФ-м и цIыхубэ артисткэ Румянцевэ Надеждэ.
♦1942 гъэм къалъхуащ шапсыгъ сурэтыщI, Адыгэ Республикэм щIыхь зиIэ и художник Хьэпышт Хьисэ.
♦1946 гъэм къалъхуащ КъБР-м щIыхь зиIэ и дохутыр Мысрокъуэ Мухьэмэд.
♦1960 гъэм къалъхуащ Инджылызым щыщ актёр цIэрыIуэ Грант Хью.
♦1969 гъэм къалъхуащ адыгей сурэтыщI Гъуэгунокъуэ Мурат.
Дунейм и щытыкIэнур
«pogoda.yandex.ru» сайтым зэритымкIэ, Налшык пшэр техьэ-текIыу щыщытынущ, пIалъэ-пIалъэкIэрэ уэшх къыщешхынущ. Хуабэр махуэм градус 22 - 24-рэ, жэщым градус 16 - 18 щыхъунущ.
Лъэпкъ Iущыгъэ:
Пхъэ мысрэ псы мывэрэ щыIэкъым.