Дунейм щыхъыбархэр

Мы илъэсым ирагъэкIуэкIынукъым

«Путин Владимир эфир занщIэкIэ зыпыдощIэ» зэIущIэхэм хуэдэ мы гъэм ирагъэкIуэкIынукъым. Абы щыщ Iыхьэхэр УФ-м и Президентым илъэс къэс ит пресс-конференц иным хагъэхьэну аращ. Апхуэдэ хъыбар зэбгригъэхащ къэралым и УнафэщIым и пресс-секретарь Песков Дмитрий.

Ди къэралым и мызакъуэу, дуней псом мы илъэсым щыщыIэ щытыкIэрщ эфир занщIэр къызэрамыгъэпэщыныр къызыхэкIар.
«Къэралым щыIэ щытыкIэм теухуауэ Президентым мы гъэм УФ-м щыпсэухэм мызэ-мытIэу захуигъэзащ. Мазэ зыбжанэ хъуауэ эфир занщIэ мардэм тету ар Урысейм и щIыналъэ куэдым я цIыхухэм епсэлъылIащ, я гугъуехьхэр дигъэкIащ. Абы къыхэкIыу дэ лейуэ къэтлъытащ дызэресам хуэдэу а зэIущIэр едгъэкIуэкIыныр», - яжриIащ Песковым журналистхэм.
«Апхуэдэу щытми, цIыхухэм Президентым зыкъызэрыпащIэ эфир занщIэм и пкъыгъуэхэм щыщ дэ, Iэмал зэриIэкIэ, Президентым и пресс-конференц иным зэрыхэдухуэнэным яужь дитынущ, къэралым и щIыпIэ зэмылIэужьыгъуэхэм щыщхэм я гуныкъуэгъуэхэм е зыщыгуфIыкIхэм ятеухуауэ Путин Владимир зыкъыхуагъэзэфын хуэдэу. Прессс-конференцыр дызэрыт илъэсым и кIэм къызэдгъэпэщыну ди гугъэщ», - къыхигъэщащ къэралым и УнафэщIым и пресс-секретарым.
Фигу къэдгъэкIыжынщи, Путин Владимир къэралым щыпсэухэм «эфир занщIэ зэпыщIэныгъэхэр» мардэм тету иужьу епсэлъащ 2019 гъэм мэкъуауэгъуэм и 20-м. Ар епщыкIубланэу екIуэкIат – япэ дыдэу апхуэдэ нэтынкIэ Урысей Федерацэм и Президентыр цIыхухэм я пащхьэ къихьауэ щытащ 2001 гъэм. Абы щегъэжьауэ ахэр илъэс къэс екIуэкIащ, 2004, 2012 гъэхэм фIэкIа къэмынэу.
БлэкIа илъэсхэм къызэрагъэлъэгъуащи, сыхьэт бжыгъэкIэрэ екIуэкI апхуэдэ зэIущIэхэр икъукIэ щхьэпэщ къэралым къыщыхъу Iуэху зэIумыбзхэр зэфIэхынымкIэ, щIыпIэхэм щалэжь хабзэншагъэхэм Президентыр щыгъуазэ щIынымкIэ. Абдежым мыхъумыщIагъэ куэд сэтей къыщыхъум и мызакъуэу, ахэр зэрагъэзэкIуэжми Президентым и Администрацэм, зыхуэфащэ къулыкъущIапIэхэм я унафэщIхэм я нэIэ тетщ. Арауэ къалъытэ апхуэдэ зэIущIэхэм я мурад нэхъыщхьэри.
Эфир занщIэр нэхъ кIыхь дыдэу щыщытар 2013 гъэрщ – сыхьэти 4-рэ дакъикъэ 47-кIэ екIуэкIат ар.
Илъэс къэс Президентым иригъэкIуэкI пресс-конференцышхуэми мыхьэнэшхуэ иIэщ. Къэрал куэдым щыщ журналистхэр кърихьэлIэу, зэIухауэ екIуэкI псалъэмакъым Президентым и мызакъуэу, къэралми я Iулыджыр дунейпсо утыкухэм къыщеIэт.
Апхуэдэ конференцхэри 2001 гъэ лъандэрэ къызэрагъэпэщ. Путин Владимир УФ-м и Премьер-министру щыщыта зэманырщ апхуэдэ конференц щимытар – 2008 – 2012 гъэхэрщ. Президент къулыкъум хахыжа нэужь пресс-конференцхэр егъэкIуэкIыныр зэтраублэжащ. Нэгъабэрей зэIущIэр дыгъэгъазэм и 19-м екIуэкIат, цIыхухэм я упщIэхэм сыхьэти 4-рэ дакъикъэ 20-кIэ жэуап яриту.
Мы гъэм и гъатхэпэм и кIэ лъандэрэ - коронавирус узыфэм зэрызиубгъуам къыхэкIыу, Узыншагъэр хъумэнымкIэ дунейпсо зэгухьэныгъэм пандемием и хабзэхэр зэригъэуврэ – УФ-м и Президентым и зэIущIэхэм я нэхъыбапIэр видеоконференц щIыкIэм тетущ зэрыригъэкIуэкIар. Иджы, щытыкIэм елъытауэ, зэIущIэхэр зэIухауи щытщ.
«Мыгъэрей пресс-конференцышхуэри зэIухауэ, журналистхэр кърихьэлIэу едгъэкIуэкIыну ди мурадщ, - жиIащ Песков Дмитрий. – Ар, нэхъапэхэми хуэдэу, илъэсым и кIэм, нэхъ тэмэму жыпIэмэ, дыгъэгъазэм и етIуанэ Iыхьэм къредгъэубыдэнущ».

Улахуэхэм процентищкIэ хэхъуэнущ

Бюджетым къыхэкIыу зи улахуэр зратхэм я лэжьапщIэхэм процентищ хущIагъунущ жэпуэ­гъуэм и 1-м къыщыщIэдзауэ.

Урысей Федерацэм и Правительствэм и УнафэщI Мишустин Михаил абы теухуа унафэм Iэ щIидзащ.
«2020 гъэм жэпуэгъуэм и 1-м къыщыщIэдзауэ улахуэхэм хэгъэхъуэн. Абы текIуэдэну мылъкур къэрал бюджетым къыхэкIыу убзыхун», - апхуэдэ хъыбар итщ Правительствэм и пресс-IуэхущIапIэм и сайтым.
Зи лэжьапщIэхэм зыхухагъэхъуэнухэм хеубыдэ федеральнэ кIэзонэ, бюджет, автономнэ IуэхущIапIэхэр. Апхуэдиз дыдэ хущIагъунущ федеральнэ къэрал органхэм щылажьэхэми.

Нобэ

ЩIым и озон къатыр хъумэным и дунейпсо махуэщ. 1987 гъэм Монреаль (Канадэ) Iэ щытрадзащ озоныр зэрызэхэлъ пкъыгъуэхэм ятеухуа протоколым.
Къыргъызстаным къэрал шынагъуэншагъэр къызэгъэпэщынымкIэ и IэнатIэм и лэжьакIуэхэм я махуэщ
Мексикэм и щхьэхуитыныгъэм и махуэщ
Японием щагъэлъапIэ зи ныбжь хэкIуэтахэм пщIэ яхуэщIыным и махуэр
1380 гъэм урысыдзэхэр Куликовэ щIыпIэм деж Мамай хъаным и дзэхэм щатекIуащ.
1810 гъэм Мексикэр къэрал щхьэхуит хъуащ - ар Испанием къызэрыхэкIым теухуа унафэ къащтащ.
1915 гъэм Владивостокрэ Архангельскрэ я зэхуаку дэлъ гъуэгуанэр, псым кхъухькIэ техьэн зэрыщIадзэрэ апхуэдэ къэмыхъуауэ, тенджызкIэ зэпачащ. Ар зыхузэфIэкIар урысей хыдзэлI Вилькицкий Борисщ.
1918 гъэм Бэракъ Плъыжь орденыр къащтащ.
1931 гъэм Москва Гуащэхэм я къэрал академическэ театр къыщызэIуахащ. Театрым зэрехьэ абы и къызэгъэпэщакIуэ, илъэс куэдкIэ и унафэщIу щыта, СССР-м и цIыхубэ артист Образцов Сергей и цIэр.
1943 гъэм советыдзэхэм Новороссийск къалэр фашистхэм къыIэщIагъэкIыжащ.
1944 гъэм Налшык къыщызэIуахащ республикэм и дохутырхэм я съезд.
1976 гъэм Ереван псы хъумапIэм хэхуа троллейбусым исахэм ящыщу цIыху 20-м щIигъу къригъэлащ псы щIагъым щесынымкIэ дунейпсо чемпион мызэ-мытIэу хъуауэ щыта Карапетян Шаварш.
1999 гъэм Ростов областым хыхьэ Волгодонск къалэм теракт щалэжьащ. Абы цIыху 19 хэкIуэдауэ, 90-м нэблагъэ уIэгъэ щыхъуауэ щытащ.
1745 гъэм къалъхуащ урыс дзэпщ, генерал-фельдмаршал Кутузов Михаил (и унэцIэ дыдэр Голенищев-Кутузовщ).
1931 гъэм къалъхуащ тхыдэ щIэныгъэхэм я доктор, профессор, УФ-м щIэныгъэмкIэ щIыхь зиIэ и лэжьакIуэ, адыгэхэм я къекIуэкIыкIар зыджа, ЩIДАА-м и академик Куценкэ Игорь.
1936 гъэм къалъхуащ урысей актёр, УФ-м и цIыхубэ артист Кокшенов Михаил.
1942 гъэм къалъхуащ теленэтынхэр езыгъэкIуэкI, УФ-м и цIыхубэ артисткэ Вовк Ангелинэ.
1943 гъэм къалъхуащ абазэ щIэныгъэлI, политик, КъШР-м и ЦIыхубэ Зэхуэсым и депутат, Абазэ Хасэм и тхьэмадэ Шенкао Мухьэдин.
1945 гъэм къалъхуащ УФ-м и цIыхубэ артист Петросян Евгений.
1947 гъэм къалъхуащ къэрал, политикэ лэжьакIуэ, Совет Союзым и ЛIыхъужь, Урысейм и вице-президенту щыта, экономикэ щIэныгъэхэм я доктор, дзэ щIэныгъэхэм я кандидат, профессор Руцкой Александр.
1951 гъэм къалъхуащ физико-математикэ щIэныгъэхэм я доктор, КъБКъУ-м и профессор Ащхъуэт Олег.
1952 гъэм къалъхуащ США-м щыщ киноактёр цIэрыIуэ Рурк Микки.
1956 гъэм къалъхуащ Америкэм щыщ иллюзионист, игъэлъагъуэ мэгъу къарумкIэ дуней псом цIэрыIуэ щыхъуа Копперфильд (и унэцIэ дыдэр Коткинщ) Дэвид.

Дунейм и щытыкIэнур
«pogoda.yandex.ru» сайтым зэритымкIэ, Налшык пшэр техьэ-текIыу щыщытынущ. Хуабэр махуэм градус 24 – 25-рэ, жэщым градус 11 – 15 щыхъунущ.

Лъэпкъ Iущыгъэ:
ЛъхукъуэлIыр бгъэкIэсмэ, уанэгур уфIещтэ.

 

Зыгъэхьэзырар ДЖАТОКЪУЭ Марьянэщ.
Поделиться:

Читать также:

29.03.2024 - 12:46 НОБЭ
27.03.2024 - 15:00 НОБЭ
26.03.2024 - 08:01 НОБЭ
25.03.2024 - 12:07 НОБЭ