Пащты Руслан гупыр трегъэгушхуэ

Футбол

Гъэ къызэднэкIым Къэбэрдей-Балъкъэрым и футболист нэхъыфIыр игъэбелджылын папщIэ «Советская молодёжь» газетым спортым тетхыхь журналистхэм я деж ИлъэсыщIэм и пэ къихуэу щIэупщIэныгъэхэр щрегъэкIуэкI. Илъэс тIощIрэ хырэ хъуауэ зэкIэлъхьэужьу а Iуэхугъуэр щыIэщ.

Адрейхэми хуэдэу, коронавирус уз зэрыцIалэм и зэранкIэ илъэс блэкIам топджэгумкIэ зэхьэзэхуэхэр, пIалъэ кIыхькIэ зэпагъэуауэ щытами, 2020 гъэм Къэбэрдей-Балъкъэрым щынэхъыфIыр къызыхахын я куэдт щIэупщIэныгъэм хэтахэм. Фигу къэдгъэкIыжынщи, журналистхэм футболиститхум я цIэр къраIуэн хуейт икIи япэ ирагъэщым баллитху, етIуанэм – баллиплI, ещанэм – баллищ, апхуэдэу къехыурэ трагуашэ. КъищынэмыщIауэ, гъэбелджылын хуейт щIэуэ командэм къыхыхьахэм ящыщу нэхъыфIыр, топ нэхъ дахэ дэзыгъэкIар, «Спартак-Налшыкым» къехъулIа зэIущIэмрэ щыхуэмыхуамрэ.
Къэбэрдей-Балъкъэрым и футболист нэхъыфI 2020 гъэм хъуащ гъуащхьэхъумэныкъуэ Пащты Руслан. ЩIэупщIэныгъэхэм къарикIуахэм япкъ иткIэ абы балл 22-рэ къихьащ. Топджэгум ди республикэм щытетхыхь хъыбарегъащIэ IэнатIихым ящыщу плIым я лIыкIуэхэм, «Адыгэ псалъэм» ейри хэту, Руслан япэ ирагъэщащ. Зым еплIанэ увыпIэр лъигъэсащ. ВГТРК-м и корреспондентым и закъуэщ абы и цIэр къизымыIуар.
Баллищ къудейщ Пащтым къызэрыкIэрыхуар «Спартак-Налшыкым» и гъуащхьэхъумэныкъуэ Хьэшыр Алан. Абы и цIэр журналист псоми къраIуащ, ауэ япэ изыгъэщар зы закъуэращ. Нэгъабэ Алан етIуанэ увыпIэр дигуэшат, фэбжь игъуэтам и зэранкIэ мы гъэм куэдрэ мыджэгуа, гъуащхьауэ Бацэ Къантемыр. Иджы и закъуэщ нэхъыфIым пэгъунэгъу хъуар.
Ещанэ увыпIэр иубыдащ ХъутIэ Анзор. Республикэм и чемпионатым къыхашу «Спартак-Налшыкым» гъэмахуэм «Спартак-Налшыкым» хагъэхьа щIалэщIэм куэд дыдэкIэ ущыгугъыныр щхьэгъэпцIэжу къыщIэкIынут. АрщхьэкIэ дзыхь зыхуащIа щIалэм псынщIэу утыкур иубыдащ. Абы и щыхьэтщ топджэгум дихьэххэми журналистхэми гу къызэрылъатар икIи щIэупщIэныгъэм балл 17 къыщихьар.
УщымыгуфIыкIынкIэ Iэмал иIэкъым Бахъсэнокъуэ Алихъан и еплIанэ увыпIэми. Топджэгум и япэ профессиональнэ зэгурыIуэныгъэр Къэбэрдей-Балъкъэрым и командэ нэхъыщхьэм гъэмахуэм дэзыщIылIа гъуащхьауэ ныбжьыщIэм гупым текIуэныгъэр къыхуэзыхьа топ зыбжанэ я хьэрхуэрэгъухэм яхудигъэкIащ икIи ар гулъытэншэ хъуакъым. Гуапэщ ди республикэм футболист Iэзэ щIалэхэр уэру къызэрыщIэхъуэр.
ЩIэупщIэныгъэм етхуанэ увыпIэр щылъысащ Ашу Мурад. Абы баллибл хуагъэфэщащ.
Иджыри футболистиплIым я цIэ журналистхэм къраIуащ. Ахэр гъуащхьэтет Антипов Антонщ, гъуащхьэхъумэ Шумахуэ Заурщ, гъуащхьэхъумэныкъуэ Iэпщацэ Маратщ, гъуащхьауэ Гугуев Магомедщ.
ЩIэуэ къыхыхьахэм ящыщу япэ ирагъэщащ ­гъуащхьауэ ХъутIэ Анзор. ЖурналистиплIым ар нэхъыфIу къалъытащ. Нэгъабэ апхуэдэ щIыхь зыхуагъэфэща гъуащхьэхъумэныкъуэ Сындыку Те­мыр­къан иджы Мэзкуу и «Торпедо»-м щоджэгу. Шэч къытетхьэркъым Анзори къэкIуэну дахэ къызэрыпэплъэм икIи и ехъулIэныгъэфIхэмкIэ дызэригъэгуфIэнум.
«Спартак-Налшыкым» 2020 гъэм нэхъ къехъулIа зэIущIэу къалъытащ Новороссийск щыIэу щIыпIэ «Черноморец»-р 2:0-у щытекIуар. Ар куэд зыпэмыплъа дэрэжэгъуэт. НэхъыкIар Ставрополь кIуауэ «Динамо»-м 1:4-уэ къазэрыхигъэщIарщ. Абы ипэжкIи ардыдэр Урысей Федерацэм и кубокым ехьэлIа зэпеуэм а бжыгъэмкIэ къытекIуат. Шэч хэлъкъым нэгъабэ Ставрополь къалэр ди щIалэхэм зэрахуэмыугъурлам. Мы гъэм езы «Динамо»-р къахуэкIуэнущи, щIыхуэр япшыныжыну Iэмал хъарзынэ яIэщ.
Багъэтыр Тимур илъэс зыбжанэ хъуауэ «Спартак-Налшыкым» и шхэпсщ. АрщхьэкIэ, джэгупIэ губ­гъуэм и кум иту ТIуапсы къалэм и щIыпIэ ко­мандэм нэгъабэ худигъэкIа топыр зыфIэтемылъыджа щыIэу къыщIэкIынкъым. Ди республикэм и спорт журналистхэми къалъытащ ар псоми ефIэкIауэ.
Иджы нэхъ зыубгъуауэ дытепсэлъыхьынщ Къэ­бэрдей-Балъкъэрым и футболист нэхъыфI Пащты Руслан. ЗэрыфщIэжщи, «Спартак-Налшыкым» и капитан Щоджэн Борис 2020-2021 гъэхэм екIуэкI зэхьэзэхуэм щIидзэным и пэ къихуэу фэбжь игъуэтащ. Гупым и пашэр яхъуэжын хуей щыхъум ар ­хуагъэфэщащ иджыблагъэ ди щIыпIэм къэзыгъэзэжа гъуащхьэхъумэныкъуэ Пащты Руслан.
Къэбэрдей-Балъкъэрым и къалащхьэм къыщалъхуа икIи топ джэгуным зыщыхуезыгъэса а щIалэм Налшык и «Мегафон-Кавказ»-м къыщыщIи­дзащ, республикэм и чемпионатым хэту. 2009 гъэм Мэзкуу и «Динамо»-м и футбол школ цIэрыIуэм щIэтIысхьащ икIи абы и щIалэгъуалэ гупым хэту илъэситIкIэ джэгуащ. ИтIанэ Новгород Ищхъэрэм и «Волга»-м и щIыхьыр ихъумащ. Япэ дыдэу ар къыщыхъуар 2011 гъэм фокIадэм и 21-ращ: Урысей Федерацэм футболымкIэ и кубокыр къэхьыным теухуа зэхьэзэхуэм ипкъ иткIэ Мэзкуу и «Спартак»-м къэралым и къалащхьэм и «Лужники» стадионым екIуу щыпэщIэтащ. Абы щыгъуэм зэIущIэм хухаха зэман нэхъыщхьэри къыщIагъуа сыхьэт ныкъуэри зэрытемыгъэкIуауэ, 1:1-уэ, иухащ. Апхуэдэу щыхъум метр пщыкIузым и деж щыту нэхъ лъэщыр зэхагъэкIын хуей хъуащ. Дакъикъи 120-м щIигъукIэ а зэIущIэм джэгупIэ губгъуэм ита Пащты Руслан кърагъэза дзыхьыр игъэпэжащ икIи и пенальти Iыхьэр дэгъуэу игъэзэщIащ. АрщхьэкIэ къыдэджэгухэм ящыщ зы къэдзыхэри, 5:6-уэ зыхэт гупыр къыхагъэщIащ.
А гъэ дыдэм и жэпуэгъуэм премьер-лигэм япэу зыкъыщигъэлъэгъуащ. Абы и Iуэхухэр щефIэкIуэну къыщIэкIынут, мыгувэу фэбжь хьэлъэ имыгъуэтамэ.
Зыгъэхъужыным Руслан зэман кIыхь тригъэкIуэдащ икIи и зэфIэкIым кIэригъэхуащ. Арати, Дзержинск, Курск, Саратов къалэхэм я командэхэм щыджэгуащ. 2017 гъэм Налшыки къигъэзэжащ, арщхьэкIэ Санкт-Петербург и «Динамо»-м мыгувэу ирагъэблэгъэри тхэкIыжащ.
Урысей Федерацэм футболымкIэ и премьер-лигэм хэта ди щIалэхэу Мырзэ Резуан, Щэуей Алихъан, Гордюшенкэ Астемыр, Къалмыкъ Амур сымэ 2018 гъэм гъусэ яхуэхъуфынут Пащты Руслан. А илъэсым абы къыщыкIэлъыплъащ Мэзкуу и «Динамо»-м.
Пащтыр Мэзкуу иригъэблэгъэжат «Динамо»-м и щIалэгъуалэ командэм щызыгъэсэу щытауэ иджы балигъхэм я тренер нэхъыщхьэ хъуа Хохлов Дмитрий. Нэхъапэм зэрыдэлэжьам къыхэкIыу Руслан и зэфIэкIхэр абы хъарзынэу ищIэрт икIи хуэфэщэну зыкъигъэлъагъуэмэ, къищтэну хьэзырт.
Илъэс 25-рэ зи ныбжь Пащтым и къару илъы­гъуэт. Абы и зэфIэкIхэр зэрылъагэм щыхьэт те­хъуат «Динамо»-м хэту Румынием и «Газ-Метан»-мрэ Литвам и «Стумбар»-мрэ щыдэджэгуа зэныбжьэгъугъэ зэIущIэхэм. Мэзкуудэсхэр япэм 1:0-у щытекIуат, адрейм 0:0-у бгъэдэкIыжат. АрщхьэкIэ Руслан премьер-лигэм къащтэным теухуа унафэр куэд дыдэм елъытат икIи хъыбарыфIхэм дыпэплъэрт. Ди жагъуэ зэрыхъущи, фэбжь зэриIауэ щытахэр къалъытэри, зэкIэ зэхагъэхьакъым. Абы щыгъуэми жыжьэ яутIыпщакъым икIи къэралым и къалащхьэм пэмыжыжьэу къагъанэри, япэщIыкIэ «Муром», къыкIэлъыкIуэу Мэзкуу и «Арарат» командэхэм яхэтащ. АпщIондэхукIэ, къыщIэупщIауэ щыта Хохлов Дмитрий тренер нэхъыщхьэ къулы­къум трагъэкIри, псори къызэтекъутэжащ. Апхуэдэу щы­хъум «Спартак-Налшыкым» аргуэру къэкIуэжащ.
Дэнэ щIыпIэ щыджэгуами, Пащты Руслан Iэзэу, къикIуэт зымыщIэу зыкъигъэлъэгъуащ. Аращ «Спартак-Налшыкым» и вице-капитану занщIэу щIыхахари, Къэбэрдей-Балъкъэрым и футболист нэхъыфIу нэгъабэ къыщIалъытари.

Топ нэхъ дахэ дыдэр дэзыгъэкIа Багъэтыр Тимур.                       ИлъэситI хъуауэ етIуанэ Хьэшыр Алан.                                 

                                                                       

Гъуащхьауэ щIалэщIэ Бахъсэнокъуэ Алихъан.                   ЕбгъэрыкIуэныгъэм зи гур ета Ашу Мурад.

                                              

 

2020 гъэм Къэбэрдей-Балъкъэрым и футболист нэхъыфI

«Спартак-Налшыкым» и капитан Пащты Руслан.                                             

                              

                                            
 
КуэдкIэ дызыщыгугъ ХъутIэ Анзор.

 

Жыласэ Заурбэч.
Поделиться:

Читать также: