Щапхъэ схуэхъуа нэхъыжьыфI

Филологие щIэныгъэхэм я доктор, профессор Тау Хьэзешэ Талий и къуэр абхъаз-адыгэ бзэ гупым и къэхутакIуэ нэхъ лъэщхэм, пажэхэм ящыщщ. А щIэныгъэлI щыпкъэм и къалэмыпэм къыпыкIа дэтхэнэ къэхутэныгъэри бзэщIэныгъэр ипэкIэ зыгъэкIуатэу зэрыщытым щыгъуазэщ икIи щыхьэт техъуэнущ адыгэбзэм елэжь IэщIагъэлI псори. Нобэ ар къытхэмытыжми, ар тщIыгъущ къытхуигъэна и лэжьыгъэ купщIафIэхэмкIэ, чэнджэщ щхьэпэхэмкIэ, псалъэ дахэхэмкIэ.

Тау Хьэзешэ псом хуэмыдэу хэлъхьэныгъэшхуэ хуищIащ бзэщIэныгъэм и Iыхьэхэу морфологиемрэ диалектологиемрэ. А лъэныкъуэхэмкIэ абы и къэхутэныгъэхэр тегъэщIапIэ нэхъыщхьэ, лъэщ яхуохъу бзэм и зэхэлъыкIэм елэжь щIэныгъэлIхэми, езыгъэдж егъэджакIуэхэми, бзэр зыдж студентхэми, еджакIуэ цIыкIухэми.
 БзэщIэныгъэм и тхыдэм и цIэр кърихэнэну зрикъун щIэныгъэ-къэхутэныгъэ лэжьыгъэшхуэ иригъэкIуэкIащ Хьэзешэ, ауэ абыкIэ игу зыхуэзэгъэжу тIысыж цIыхухэм ящыщакъым ар. И къарурэ зэфIэкIрэ къихьыху, щхьэхрэ ешрэ имыщIэу Таур пэрытащ фIыуэ илъагъу и лэжьыгъэ IэнатIэм.
Ди анэдэлъхубзэр гурэ псэкIэ зыхэзыщIэ, абы и хабзэхэм фIыуэ щыгъуазэ, ахэр куууэ къызыгурыIуэ щIэныгъэлIу зэрыщытам нэмыщI, Хьэзешэ хьэл-щэн дахэ зиIэ цIыху зэтетт. ЦIыхухэр дэзыхьэхыф, абыхэм я пажэу зэрыщытыф щэныр Тау Хьэзешэ къыдалъхуауэ жыпIэ хъунущ. Абы и нэIэм щIэту лажьэхэм гу лъыдмытэу къанэртэкъым Хьэзешэ пэжагърэ IущагъкIэ къызэрыдбгъэдэтым. Арат а ди унафэщIым пэтщI щымыIэу дыщIыдэгъуэгурыкIуар.
Сэ Тау Хьэзешэ сригъэджащ, унэтIакIуэ, гъуэгугъэлъагъуэ схуэхъуахэм ящыщщ, егъэджакIуэу сиIахэм я нэхъ пажэу щытауи къызолъытэ. Студенту щIэздзэри, зэрысцIыхуа илъэсхэм къриубыдэу абы куэдым сыхуигъэсащ, гу лъызигъэтащ. БзэщIэныгъэм и лъабжьэр къызэрызбгъэдилъхьам нэмыщI, и гъащIэ щапхъэмкIэ щэн дахэ куэдым сыкIэлъыплъыну зэман сихуащ. «Тау Хьэзешэ хуэдэ дыхъуащэрэт», - жытIэу, абы бгъэдэлъ акъылымрэ щэнымрэ дызыIэпашэу диIащ ар. ЩIэблэм щапхъэ яхуэхъу апхуэдэ нэхъыжьыфI уиIэну куэд и уасэт. И гъащIэ купщIафIэм епха апхуэдэ гукъэкIыжхэмкIэ Таур ноби куэдым гуапэу дигу илъщ.