Щихухэр ираупщIыкIынущ
зэран зэрыхъум къыхэкIыу
Свердловскэ областым и губернатор Куйвашев Евгений Екатеринбург и Iэтащхьэм унафэ хуищIащ къалэм дэт щиху псори ирыригъэупщIыкIыну икIи абыхэм я пIэкIэ нэгъуэщI жыг лIэужьыгъуэхэр хригъэсэну.
Унафэм лъабжьэ хуэхъуар щихухэр къыщыкI щIыпIэ псоми щыпсэухэм яIэ гуныкъуэгъуэрщ - абыхэм къапих бацэр унэхэм щIехьэри, зэран яхуохъу аллергие зиIэхэм. АтIэми, а узыфэр зыпкърытхэр дэни щыкуэд хъуащ ди зэманым. Абы нэмыщI, Урал щIыналъэм и къалащхьэм мэкъуауэгъуэм къриубыдэу хуэдипщIкIэ нэхъыбэ щыхъуащ щихухэм къапих бацэм лыгъэ ирадзурэ къагъэхъуа мафIэсхэр. Зы жэщ-махуэм къриубыдэу МЧС-р 250-рэ хуэдизрэ ираджащ къалэдэсхэм, мафIэр ирагъэгъэункIыфIыжыну.
«Шэч къытесхьэркъым илъэси 10 – 15-м къриубыдэу щихухэр ди къалэхэм зэрытхудэгъэкъэбзыкIынум – паркхэмрэ гъуэгу Iуфэхэмрэ щыхэсэн хуейщ нэгъуэщI жыгхэр. А лэжьыгъэр Екатеринбург къыщыщIэддзэнущ. Абы и унафэщI Орлов Алексей къалэн щысщIащ адрей къалэхэм абы и лъэныкъуэкIэ щызэфIагъэкIахэм зыщигъэгъуэзэну икIи щихухэр ихыным щIидзэну. Сэ сощIэ Екатеринбурги нэгъуэщI ди къалэхэми щхъуантIагъэхэр къазэремэщIэкIыр, жьы хъуа, щIыуэпсым дежкIэ мыхьэнэ зимыIэж жыгхэр ихын къудейри къалэдэсхэм зэражагъуэр. Апхуэдэу щытми, щихухэр нэгъуэщI жыг лIэужьыгъэхэмкIэ зэтхъуэкIын папщIэ япэрейхэр идупщIыкIын хуей хъунущ», - жиIащ щIыналъэм и губернаторым.
Уралым и закъуэкъым абы щытепсэлъыхьыр. Къэрал къулыкъущIапIэхэми къыщаIэтащ а Iуэхур. Къапщтэмэ, УФ-м ФедерацэмкIэ и Советым Мэкъумэш-ерыскъыпхъэ политикэмрэ щIыуэпсыр къэгъэсэбэпынымкIэ и комитетым и унафэщI Майоров Алексей зэрыжиIамкIэ, а жыг лIэужьыгъуэхэм зэраныгъэу къашэр нэхъыбэщ я сэбэпынагъым нэхърэ. «Дэтхэнэ щIыналъэри а Iуэхум езыхэм зэранэхъ фIэтэмэмым хуэдэу бгъэдыхьэнущ. Ар а лэжьыгъэм къалэхэр мылъкукIэ зэрыпэлъэщми елъытауэ щытынущ. Щихухэр хуэм-хуэмурэ нэгъуэщI жыг лIэужьыгъуэхэмкIэ щызэхъуэкIын хуейщ ди къалэхэм», - жиIащ абы.
Къэрал Думэм Экологиемрэ дыкъэзыухъуреихь дунейр хъумэнымкIэ и комитетым и унафэщI Черкассов Кирилли жиIащ ахэр щихухэм я пIэкIэ нэгъуэщI жыгхэр хэсэным зэрегупсысыр икIи экспертхэр нэхъ жыгыфIхэр, къалэхэм щыхэпсэну къезэгъхэр къыхэхыным яужь зэритыр.
Абыхэм арэзы ядэхъуркъым УФ-м и Архитекторхэм я зэгухьэныгъэм хэт, Урысей Федерацэм щIыхь зиIэ и архитектор Кулеш Виктор.
Абы зэрыжиIэмкIэ, щихухэм я лъабжьэхэм пшахъуалъэ щIыпIэхэр псым имылъэсыным, жьым имыпхъэхыным щахъумэ. И лъагагъкIэ адрей жыгхэм хуэдэ 30-м нэскIэ ящхьэпрокIри, щихухэм ди къалэшхуэхэм я хьэуар хэпщIыкIыу ягъэкъабзэ. Ахэр ираупщIыкIмэ, къалэхэр куэдкIэ нэхъ фIей хъунуи къелъытэ.
