XXXII Гъэмахуэ Олимп джэгухэм Урысейм и олимп и спортсменхэм (ROС) япэ медалхэр къыщахьащ. Абыхэм ящыщу 4-р дыщэщ.
Бадзэуэгъуэм и 24-м, медалхэм щIэбэнын щIадзащ. Пневматикэ фочыр гъэуэнымкIэ зэхьэзэхуэм Галашинэ Анастасие гъунэ щрилъащ. Абы къытхуихьащ дыжьын медалыр.
Тхэквондоми къыщыхэжаныкIащ ди хэкуэгъухэр. Килограмм 58-и нэс зи хьэлъагъхэм я деж ещанэ увыпIэр щиубыдащ Артамонов Михаил.
Япэ олимп чемпионыгъэр Японием къыщытхуэзыхьар Бацарашкинэ Виталинэщ. Зэхьэзэхуэм и етIуанэ махуэм пневматикэ кIэрахъуэмкIэ зэпеуэм ар щытекIуащ. КъищынэмыщIауэ, дыжьын медалу 3-рэ домбеякъыу 1-рэ ди щIалэхэмрэ хъыджэбзхэмрэ зыIэрагъэхьащ. Апхуэдэу я насып къикIащ цIыхубзхэм шабзэр гъэуэнымкIэ гуп зэпеуэм хэтахэу Перовэ Ксение, Осиповэ, Еленэ, Гамбоевэ Светланэ сымэ, фехтованием хэта Дериглазовэ Иннэ, тхэквондом щызэуа Мининэ Татьянэ. Домбеякъ медалыр къихьащ Коробейниковэ Ларисэ.
Блыщхьэм аргуэру дыщэ медалищ Урысейм и олимп спортсменхэм къахьащ. ФехтованиемкIэ цIыхубзхэм я зэпеуэм и финалым щызэпэщIэува ди хэкуэгъухэу Поздняковэ Софиерэ Великая Софьерэ олимп чемпионыгъэм хуабжьу иризэныкъуэкъуащ. Абыхэм я зэпэщIэтыныгъэм сыт хуэдэ зэхьэзэхуэри игъэдэхэфынут. Софие дыщэр Iэрыхьащ, Софье дыжьынымкIэ арэзы хъуащ.
А махуэ дыдэм Олимпым и щыгум нэсащ спорт гимнастикэмкIэ цIыхухъухэм я гуп зэпеуэм щытекIуахэу Нагорный Никитэ, Далалоян Артур, Аблязин Денис, Белявский Давид сымэ зыхэта ди командэ къыхэхар.
Дыщэ медалыр къихьащ тхэквондомкIэ килограмм 80-м нэс зи хьэлъагъ цIыхухъухэм я зэпеуэм щытекIуа Храмцов Максим. Ди къэралым а спорт лIэужьыгъуэмкIэ ар апхуэдэ и япэ ехъулIэныгъэшхуэщ.
Метри 10 зи лъагагъым къелъэу цIыхухъухэр псым щыхэлъэм Бондарь Александррэ Минибаев Викторрэ ещанэ хъуащ.
Бадзэуэгъуэм и 26-м ирихьэлIэу медаль зэмылIэужьыгъуэ зыбжанэ ди спортсменхэм Токио щызыIэрагъэхьащ.
Официальнэу щымыт гуп зэпеуэм бжьыпэр щаубыдащ хэгъэрейхэм. Абыхэм дыщэ медалу 8 зыIэрагъэхьащ. Зы закъуэщ Японием и спортсменхэм къазэрыкIэрхур Америкэм и Штат Зэгуэтхэр. Олимп чемпиону 6 яIэ хъуащ Китайм къикIахэм. Блыщхьэм яIа ехъулIэныгъэхэм я фIыгъэкIэ Урысейм и олимп и спортсменхэр еплIанэ увыпIэм нэс дэкIуэтеящ. АдэкIи нэхъыбэжкIэ дащогугъ.
