Алихъан и дыжьын медалыр

Венгрием и къалащхьэ Будапешт щекIуэкIащ зи ныбжьыр илъэс пщыкIуий иримыкъуахэм бэнэкIэ хуитымкIэ я дунейпсо зэпеуэ. Абы етIуанэ увыпIэр щиубыдащ Iэщын Алихъан.

Зи ныбжьыр илъэс пщыкIутху фIэкIа иджыри иримыкъуа адыгэ щIалэ цIыкIум фIы дыдэу зыкъыщигъэлъэгъуащ езым нэхърэ нэхъыжьхэм я деж. Килограмм 45-м нэс зи хьэлъагъхэм я зэпеуэм Алихъан и хьэрхуэрэгъу псори щыхигъащIэри, псоми яфIэтелъыджэу, финалым нэсащ. Абы къыщыпэщIэхуа Америкэм и Штат Зэгуэтхэм къикIа Бассетэ Вильям, ди жагъуэ зэрыхъущи, ар пэлъэщакъым.
Апхуэдэу щыт пэтми, Iэщын Алихъан и бэнэкIэ екIум къеплъа псори къыдихьэхащ. Ар, дауи, иригушхуэ хъунущ дунейпсо зэхьэзэхуэм дыжьын медаль къызэрыщихьам.
БэнакIуэ ныбжьыщIэр ягъасэ Абрэдж Арсенрэ Хьэсанэ Олегрэ.

КЪАУДЫГЪУ Заур.
Поделиться:

Читать также: