КIэртIофым йогугъу

Мэкъумэш  IэнатIэ

Иджыблагъэ «Губгъуэм и махуэ-2021» фIэщыгъэм щIэт семинар-зэIущIэ Дзэлыкъуэ щIыналъэм щекIуэкIащ. Ар нэхъыбэу зытрау­хуар кIэртIоф жылапхъэфIхэр гъэхьэзырынырщ.

КъБР-м Мэкъумэш хозяйствэмкIэ и министерствэм къызэригъэпэща семинарым хэтащ хадэхэкIым елэжь­хэр, мэкъумэш щIэныгъэлIхэр, кIэртIофхэкI шхыныгъуэ къыщIэзыгъэкI фирмэхэм я уна­фэщIхэр.
ЗэIущIэр къыщызэIуихым КъБР-м мэкъумэш хозяйствэмкIэ и министр Сыжажэ Хьэсэн и псалъэм къыхигъэщащ, щIакхъуэм иужькIэ, кIэртIофыр шхыныгъуэ нэхъыщхьэу ди къэралым дежкIэ зэрыщытыр. Абы къыхэкIыуи, кIэртIоф гъэкIыныр мыхьэнэшхуэ зиIэ лэжьыгъэщ. КъБР-м кIэртIофыр гектар мини 8-м нэблагъэм ­щащIащ. Гъэ кIуам а хадэхэкI лIэу­жьыгъуэм хуэдэу тонн мини 180,7-рэ кърахьэлIэжащ. 
Министрым жиIащ, илъэс блэкIахэм еплъытмэ, кIэртIофу къагъэкIам и бжыгъэм фIыуэ зэрыхэхъуар. 2020 гъэм зы гектарым центнер 236-рэ къытрахащ. 2015 гъэм а бжыгъэр зэрыхъуу щытар центнери 173-рэщ. Абы къегъэлъагъуэ зи гугъу тщIы хадэхэкI лIэужьыгъуэу кърахьэлIэр процент 36-кIэ зэрыбэгъуар. Апхуэдэ ехъулIэныгъэр къызыпэкIуар и фIагъкIэ зихуэдэ щымыIэ жылапхъэхэр къэдгъэсэбэп зэрыхъуарщ, - жиIащ Сыжажэм.
КъБР-м и щIыналъэхэр жылапхъэфIкIэ къызэзыгъэпэщхэм ящыщщ «Дзэлыкъуэ кIэртIоф» компаниер. Ар хэтщ ди къэралым и федеральнэ программэ, «Урысейм и кIэртIоф жылапхъэхэр къэгъэхъунымрэ егъэфIэкIуэ­нымрэ» зыфIащам.
ЗэIущIэм кърихьэлIахэм Iэмал яIащ щIэуэ къагъэхъуа кIэртIоф жылапхъэхэр зрагъэлъагъуну, абыхэм я елэжьыкIэхэм зыщагъэгъуэзэну.
2022 гъэм ирихьэлIэу ди республикэм щагъэхьэзырынущ кIэртIоф жы­лапхъэу тонн минитхум нэблагъэ. Шэч хэлъкъым абы щIэупщIэ зэриIэнум.