КъБР-м и Iэтащхьэр хэтащ КИФЩI-м социально-экономикэ и лъэныкъуэкIэ зегъэужьыным теухуа зэIущIэм

Урысей Федерацэм и Правительствэм и Уна­фэщIым и къуэдзэ Новак Александр бадзэуэгъуэм и 29-м Пятигорск къалэм щригъэкIуэкIащ Кавказ Ищхъэрэ федеральнэ ­щIыналъэм социально-эко­номикэ и лъэныкъуэкIэ зегъэужьыным теухуа зэ­IущIэ.

Зэхуэсым хэтащ УФ-м и Президентым и полномочнэ лIыкIуэу КИФЩI-м щыIэ Чайкэ Юрий, УФ-м экономикэ зыу­жьыныгъэмкIэ и министр Решетников Максим, УФ-м энергетикэмкIэ и министр Шульгинов Николай, УФ-м ухуэныгъэмрэ псэупIэ-коммунальнэ хозяйствэмкIэ и министрым и ­къуэдзэ Волков Дмитрий, округым хыхьэ щIыналъэ­хэм я Iэтащ­хьэхэр.
ЗэIущIэм нэхъыщхьэу зы­щытепсэлъыхьар УФ-м и Правительствэм и УнафэщI Мишустин Михаил Кавказ Ищхъэрэ федеральнэ ок­ругым социально-экономикэ и лъэныкъуэкIэ зегъэу­жьыным теухуа зэIущIэу ­мэкъуауэгъуэм и 15-м Пятигорск щригъэкIуэкIам пщэ­рылъ къащыщищIауэ щы­тахэр гъэзэщIа зэрыхъурщ. УФ-м Экономикэ зыужьыныгъэмкIэ и министерствэм игъэхьэзыра методикэм тету, Кавказ Ищхъэрэ федеральнэ округым хыхьэ щIыналъэхэм мы зэманым и кIэм нагъэсащ 2030 гъэ пщIондэ абыхэм зэрызаужьыну щIыкIэр щыубзыхуа дэфтэрхэр гъэхьэзырыныр. Кавказ Ищхъэрэм хэп­щIы­кIыу нэхъ зезыгъэужьыну ­IэнатIэу къалъытар туриз­мэрщ.
Новак Александр жиIащ УФ-м Экономикэ зыужьы­ныгъэмкIэ и министерствэм Кавказ Ищхъэрэ федеральнэ щIыналъэм 2035 гъэ пщIондэ зэрызрагъэужьыну программэщIэ зэрызэхилъ­хьар. Абы къэралым и Правительствэм щыхоплъэ икIи мы гъэм къащтэнкIэ хъунущ.
Экономикэ зыужьыныгъэмкIэ министр Решет­ников Максим утыку кърихьащ КИФЩI- м хыхьэ щIыналъэхэм экономикэ и лъэныкъуэкIэ зэрызаужьыну щIыкIэхэр. «Зэрыщыту къапщтэмэ, ахэр щIыналъэхэм инвестицэу къыхалъхьэхэм хэгъэхъуэным хуэунэтIа ­«гъуэгу картэщ», абыхэм я экономикэхэр зыужьыныгъэм хуэзышэну лъагъуэщ. Дэ зэхыдолъхьэ КИФЩI-м и щIыналъэ псоми зэдэууэ ­заужьыным хуэгъэпса Iуэху бгъэдыхьэкIэ», - къыхигъэщащ министрым. Ар щхьэ­хуэу къытеувыIащ псэупIэ-коммунальнэ хозяйствэм ехьэлIа Iуэхухэм: «ЖКХ-м и лэжьыгъэр тэмэму зэтеухуэным, ныкъусаныгъэхэр лъэныкъуэ егъэзыным цIыху­хэм хуащIэ Iуэхутхьэбзэр иригъэфIэкIуэнущ, къимыдэкIэ, инвестицэу къы­халъхьэм, лэжьапIэ IэнатIэхэм къыхигъэхъуэнущ, сы­ту жыпIэмэ ЖКХ-м и Iуэхутхьэбзэхэм щIэупщIэр куэд мэхъу икIи абы елъытащ нэгъуэщI IэнатIэ куэди».
Чайкэ Юрий къыхигъэщащ КИФЩI-м и щIы­налъэхэм я экономикэм ­зэ­рызебгъэужьыфыну хэ­кIы­пIэ нэхъыфIу щытыр ту­риз­мэр зэрыарар. «Мыхьэ­нэшхуэ иIэщ инвесторхэм дэзыхьэхын щытыкIэхэр щIы­пIэхэм къащыхузэгъэ­пэщыным, абдежми гулъы­тэ хэха хуэщIын хуейщ цIыхум и узыншагъэр щрагъэфIэкIуэж зыгъэпсэхупIэ щIыпIэхэм я щIыуэпсыр зэгъэзэхуауэ къэгъэсэбэпын, ахэр къэкIуэну щIэблэхэм яхуэхъумэн зэрыхуейм», - жиIащ Президентым и полномочнэ лIыкIуэм.
КъБР-м и Iэтащхьэ КIуэ­кIуэ Казбек зэIущIэм къы­щыпсэлъащ Къэбэрдей-­Балъкъэр Республикэм 2030 гъэ пщIондэ экономикэ и лъэныкъуэкIэ зэрызиу­жьыну щIыкIэм теухуауэ. Къапщтэмэ, КIуэкIуэ Казбек жиIащ: «ЩIыналъэм 2030 гъэ пщIондэ зэрызиужьыну дубзыхуам хохьэ инвестицэ проект 64-рэ, псори зэхэту сом мелард 300 хуэзэу. Абыхэм я фIыгъэкIэ лэжьапIэ IэнатIэ мин 22-рэ къызэIутхыну Iэмал диIэнущ, абы ­кърикIуэнуращи, цIыхухэм IэнатIэ ямыгъуэту зыхэт ­гугъуехьхэри абы игъэ­мэ­щIэнущ». ТегъэщIапIэ нэхъыщхьэ ящIыну проектхэм ящыщу республикэм и Iэ­тащхьэм къигъэлъэгъуащ зыгъэпсэхупIэхэм зегъэу­жьыныр, теплицэшхуэхэр ухуэныр, вольфрам-молибден къыщIэхыпIэхэр лажьэу ирагъэжьэжыныр. «Ды­зэ­ры­щыгугъымкIэ, республикэм и щIыналъэ продуктыр 2030 гъэм ирихьэлIэу хуэ­дитIкIэ нэхъыбэ хъунущ. Налогыу мы зэманым илъэ­сым къриубыдэу къыхэкI сом мелард 15 хуэдизыр 2030 гъэм ирихьэлIэу сом мелард 80-м нэдгъэсыну ди мурадщ, абы папщIэ республикэм лъабжьэ быдэхэр иIэщ», - жиIащ абы.
КъБР-м и Iэтащхьэм къыхигъэщащ республикэм курыт IэщIагъэ, щIэныгъэ нэхъыщхьэ щрагъэгъуэт еджапIэфIхэр зэриIэр. Ап­хуэдэуи жиIащ я хэхъуэхэр зыхуэдизыр къамыгъэлъагъуэу IэнатIэ пэрытхэр, щэ­хуу лажьэ хьэрычэт IуэхущIапIэхэр наIуэ къэщIыным хуэгъэза лэжьыгъэхэри зэ­рыщIагъэхуэбжьэнур, абыи Iэмал къитынущ НДФЛ-м хэгъэхъуэнымкIэ. «Зы лэ­жьа­пIэ IэнатIэм цIыхум къы­щыщыхэхъуэр 2030 гъэм ирихьэлIэу процент 35-м нэсу хэхъуэн хуейщ, ауэ ди деж­кIэ ари мащIэщ. ИкIи дэ ди мурадщ абы нэхъ жы­джэру делэжьэну. Иджы­бла­гъэ унафэ къэтщтащ бюджет IэнатIэм пэрытхэм я улахуэхэм проценти 10-кIэ хэдгъэхъуэным теухуауэ, 2022 - 2023 гъэхэми а лэ­жьыгъэм пытщэну ди мурадщ, бюджет зэхэтлъхьэр абы тещIыхьауэ щытынущ», - жиIащ КIуэкIуэ Казбек.