«ХъыбарыфIхэм» щекIуэкIыну бэрэжьей уэршэрхэм ятеухуауэ

 Ди зэманым и нэщэнэфIхэм ящыщщ иджыри къэс къалэшхуэхэм щыпсэуа щIалэгъуалэм Хэкум лъапсэ щаухуэжыныр нэхъ кърагъэзэгъыу зэрыхъуар. Абы и щхьэусыгъуэ нэхъыщхьэуи ягъэувыр къащIэхъуэ щIэблэм адыгэбзэ зэрамыщIэрщ. 

 Зи гугъу тщIы Iуэхугъуэм и щапхъэфI хъуащ Къэбэрдей уэрамым тет «ХъыбарыфIхэр» («Good stories») зи фIэщыгъэ тхылъ тыкуэным и къызэгъэпэщакIуэ Хъурей Санэ и унагъуэри. КъызэрыщIэкIымкIэ, щыри зым хэту жыхуаIэм ещхьу, тхылъ тыкуэнри, библиотекэри, кофе ефапIэри щызэхэту Санэ игъэлажьэ «ХъыбарыфIхэм» иджы адыгэбзэкIэ хьэщIэщ уэршэрхэр щрагъэкIуэкIыну клуб къыщызэIуах. И мурадыр къехъулIэнымкIэ Санэ акъылэгъу къыхуэхъуащ журналист, университет егъэджакIуэ Битокъу Маринэрэ пшыхьхэр езыгъэкIуэкI Балъкъэр Астемыррэ. 
 «Мы гупыжыр апхуэдизкIэ куэд щIауэ си гум къыщызохьэкIри, сытемыпсэлъыхьыну схузэфIэкIыжыркъым, - щетх Хъурей Санэ и инстаграм напэкIуэцIым. – Куэдым ящIэ сэ адыгэбзэ зэрызмыщIэр. Срипсалъэркъым, къызгурымыIуэри нэхъыбэщ. Абы егъэлеяуэ сегъэгузавэ. Мэзкуу дыкъыщIиIэпхъукIыжа щхьэусыгъуэхэм язт адыгэбзэм дрипсэлъэну дызэрыхуейр. Куэдрэ зыдмыгъэгувэу, бзэм дыхуезыгъэджэн къэдгъуэтат, сыту жыпIэмэ дэ езым ди анэдэлъхубзэр къыдгурыIуэу икIи дрипсалъэу дыхъуа нэужь, ди сабийхэри абы хуедгъэсэну дыщIэхъуэпсырт. Илъэс ныкъуэ хуэдизкIэ дыкIуащ егъэджакIуэм деж. Ауэ аргуэру зы бэлыхь дыIууащ – зыри бзэм дрипсалъэртэкъым. Бзэр пщIэн папщIэ, абы урипсэлъэн хуейщ. Уи къэпсэлъыкIэм утемыукIытыхьу, пэжу къызжьэдэкIыу пIэрэ макъхэр жыпIэу, умыгузавэу. Арати, Битокъу Маринэ сыщыхуэза махуэ гуэрым адыгэбзэ клуб къызэдгъэпэщыну мурад тщIащ, щыуагъэ хэту ущыпсэлъэну мыемыкIуу. Уи щыуагъэр щыуагъэлъагъужу, ауэ зыри къыщыпщымыдыхьэшхыу. ФIы дыдэу бзэр зыщIэ гуэри димыгъусэу хъунутэкъыми, апхуэди къэдгъуэтащ – зи адыгэбзэр зи урысыбзэм ебэкI зэпыт Балъкъэр Астемыр». 
 КъызэгъэпэщакIуэхэм я мурадщ я клубым къекIуалIэхэм я гъусэу тхылъ еджэну, теплъэгъуэхэр ягъэувыну, а псоми адыгэбзэкIэ зэгъусэу тепсэлъыхьыжыну. 
 Адыгэбзэ ищIэ-имыщIэм емылъытауэ, и анэдэлъхубзэм ирипсэлъэну хуей дэтхэнэ зыри бэрэжьей къэс Хъурей Санэ «ХъыбарыфIхэр» зыфIища и хэщIапIэм ирегъэблагъэ.