Зэдэлэжьэну зэгуроIуэ

Къэбэрдей-Балъкъэр Республикэм и Iэтащхьэ КIуэкIуэ Казбек яхуэзащ УФ-м и Президентым и деж граждан жылагъуэм зегъэужьынымрэ цIыхухэм я хуитыныгъэхэмкIэ щылажьэ советым хэт, Лышх узыфэхэр зыпкърыт сымаджэхэм дэIэпыкъуэгъу яхуэхъу «Здравствуй» урысейпсо жылагъуэ зэгухьэныгъэм и унафэщI Борововэ Иринэрэ а IуэхущIапIэм КИФЩI-м щиIэ и жылагъуэ къудамэхэм я нэхъыщхьэ, «Светлячок» фIэщыгъэр зиIэ онкоблогер цIэрыIуэ Келехсаевэ Оксанэрэ. ЗэIущIэм хэтащ КъБР-м узыншагъэр хъумэнымкIэ и министр Къалэбатэ Рустамрэ абы и къуэдзэ, сымаджэхэр хущхъуэкIэ къызэгъэпэщынымкIэ IэнатIэр зи нэIэм щIэт Батыр Заурбэчрэ.
КIуэкIуэ Казбек хьэщIэхэм фIыщIэ яхуищIащ щIыналъэм къызэреблэгъамкIэ, республикэм ис сымаджэхэм гулъытэ зэрыхуащIымкIэ. «Фэ зи ужь фитыр, лышх узыфэр зыпкърыт сымаджэхэм дэIэпыкъуэгъу фазэрыхуэхъур, ипэжыпIэкIэ щхьэпагъышхуэ зиIэ Iуэхущ. Абы и лъэныкъуэкIи пщIэшхуэ фхуэфащэщ, - жиIащ щIыналъэм и Iэтащхьэм. – Фи Iуэху еплъыкIэм, щытыкIэр къызэрыфщыхъум ди дежкIэ мыхьэнэшхуэ иIэщ. Дэ дыхьэзырщ дывдэлэжьэну».
Борововэ Иринэ къыхигъэщащ лышх узыфэ зыпкърытхэр гулъытэ щхьэхуэ зэрыхуэныкъуэр, абыхэм и чэзум медицинэ дэIэпыкъуныгъэ тэмэм ягъуэтыныр Iэмалыншэу зэрыщытыр икIи къигъэлъэгъуащ республикэ унафэщIхэм сымаджэхэм я Iуэхур дэгъэкIыным хуаIэ бгъэдыхьэкIэр гуапэ зэрыщыхъуар. «Узыфэр зиIэхэм я щытыкIэр тынш ящыщIынымкIэ унэтIыныгъэм щIэуэ къыхэхьэ Iэмалхэр нэсу къэгъэсэбэпа хъунум текIуэдэну мылъкур къэплъытэмэ, дунейм зы къэрали щыIэкъым абы ахъшэкIэ пэлъэщыфыну. Ауэ зэрытхузэфIэкIкIэ дыхущIэкъун хуейщ апхуэдэ сымаджэхэм узыр къатемыхьэлъэу я гъащIэр зэрырахьэкIынум хуэунэтIа хэкIыпIэхэр къызэрызэдгъэпэщыным, - жиIащ ассоциацэм и унафэщI бзылъхугъэм. – Республикэм лышх узыфэм щеIэзэ и IэнатIэм пэрыт унафэщIыр Iуэхум фIыуэ щыгъуазэ цIыхущ, нэхъапэкIэ федеральнэ IуэхущIапIэм зэрыщылэжьам къыхэкIыу абы хъарзынэу хещIыкI зи гугъу тщIы сымаджэхэм хуэгъэзауэ дуней псом къыщекIуэкI Iэзэгъуэхэр зыхуэдэм».
ЗэIущIэм щытепсэлъыхьащ Лышх узыфэхэр зыпкърыт сымаджэхэм дэIэпыкъуэгъу яхуэхъу «Здравствуй» урысейпсо жылагъуэ зэгухьэныгъэр, КъБР-м Узыншагъэр хъумэнымкIэ и министерствэр, республикэм и жылагъуэ зэгухьэныгъэхэр зэрыздэлэжьэну щIыкIэр. Апхуэдэу къыхагъэщащ паллиативнэ, патронажнэ, социальнэ дэIэпыкъуныгъэхэм Iэмал имыIэу зэрызегъэужьыпхъэр. «А Iуэхур кърахьэжьа къудейуэ аращ, зэкIэ сымаджэхэм ар хуиту къахуэгъэсэбэпкъым, ассоциацэм и мурадщ абы теухуауэ къэрал унафэхэм халъхьапхъэ зэхъуэкIыныгъэхэр утыку кърихьэну», - къыхагъэщащ хьэщIэхэм. Зи гугъу ящIа Iуэхугъуэхэм ящыщщ лышх узыфэр зыпкърыт сымаджэхэм я узыншагъэр зэфIэгъэувэжынымкIэ Налшык и санаторэхэри Iуэхум къыхашэну зэрамурадыр.
Келехсаевэ Оксанэ къытеувыIащ сымаджэхэм я зэкъуэтыныгъэм мыхьэнэшхуэ зэриIэм. Узыфэ шынагъуэр зэрыпкърытыр зыжраIа цIыхур дэIыгъынымкIэ, ар щытыкIэ хьэлъэм къишынымкIэ, дохутырымрэ сымаджэмрэ зэпыщIэнымкIэ, и Iуэхур дэкIынымкIэ нэгъуэщI упщIэ куэди зэфIэхынымкIэ ассоциацэм лэжьыгъэшхуэ егъэзащIэ. «Сэ сапыщIащ фи республикэм щыщу лышх узыфэр зыпкърыт куэдым, сыщыгъуазэщ ахэр зыIууэ гугъуехьхэм, абы къыхэкIыуи дыхуейт сымаджэхэм я зэкъуэтыныгъэ щIыналъэм къыщызэдгъэпэщыну», - жиIащ абы.
КIуэкIуэ Казбекрэ ассоциацэм хэтхэмрэ тепсэлъыхьащ республикэм и онкологие IэнатIэм IэщIагъэлIхэр къешэлIэнымкIэ щIыналъэ программэ зэхэлъхьэнымкIэ щыIэ хэкIыпIэхэм. Апхуэдэуи зэгурыIуащ ди щIыналъэм Кавказ Ищхъэрэм и дохутырхэр хэту онкологием теухуа форум щрагъэкIуэкIыну. Абы кърагъэблэгъэнущ къэралым и клиникэ цIэрыIуэхэм щылажьэ IэщIагъэлI пажэхэр. Республикэм и Iэтащхьэм жиIащ форумыр зыхуей хуэзэу къызэгъэпэщынымкIэ, егъэкIуэкIынымкIэ, апхуэдэуи ассоциацэм и лэжьыгъэр ефIэкIуэнымкIэ, зиужьынымкIэ сыт и лъэныкъуэкIи дэIэпыкъуэгъу яхуэхъуну зэрыхьэзырыр.
КъищынэмыщIауэ, «Здравствуй» урысейпсо жылагъуэ зэгухьэныгъэм лышх узыфэр зыпкърыт сымаджэхэм коронавирусым зэрыпэщIэт вакцинэр зэхрагъэлъхьэн зэрыхуейм теухуауэ псалъэмакъ щхьэхуэхэр ирагъэкIуэкI. Абыхэм я мурадщ апхуэдэ лэжьыгъэ ди республикэми къыщызэрагъэпэщыну.

ЩхьэщэмыщI Изэ.
Поделиться: