УщIэгузэфэн зыри къэхъуакъым

Гъэ еджэгъуэм щIимыдзэ щIыкIэ, зэрыкъэралу зэлъищIысащ Путин Владимир Владивосток щригъэкIуэкIа дерс зэIухам теухуа хъыбарым. 

Школ олимпиадэхэм, сабий зэхьэзэхуэхэм къыщыхэжаныкIа еджакIуэфIхэр щызэхуашасат Владивосток щыIэ «Океан» сабий зыгъэпсэхупIэм. Путин Владимир тхыдэм теухуа дерсыр иригъэкIуэкI пэтрэ, зэрымыщIэкIэ Петр Езанэр зыхэта «Ищхъэрэ зауэм» «Илъэсибл зауэкIэ» еджащ. ЛIыщхьэм зэрыфIэлIыкIри дэплъагъуу, итIанэми щIэныгъэм хуищI пщIэр къытекIуэу, микрофоныр къищтащ Воркута къалэм дэт 35-нэ еджапIэм и еджакIуэ Тостых Никанор. 
«Зыуи къыпщыхъуну сыхуейкъым, - шыIэныгъэ хэлъу иришэжьащ щIалэ цIыкIум и псалъэр, - ауэ абы зэреджэр «Ищхъэрэ зауэт», «Илъэсибл зауэтэкъым». Путин Владимир ныбжьыщIэм къыщытхъури, фIыщи къыхуищIащ зэрыбэлэрыгъам гу зэрылъитам папщIэ. Ауэ, зэрыхъу хабзэу, Iуэхум тепсэлъыхьахэм гуп-гупурэ загуэшащ. Зы лъэныкъуэм, абыхэм я пашэр Никанор щеджэ еджапIэм и унафэщI Рябцевэ Юлиет, - щIалэ цIыкIур зэрагушхуэIуам къыхэкIыу, хьэлыншагъэ къигъэлъэгъуащ. «Президентым жиIам ухэпсэлъыхьыжыныр емыкIущ, шыIэныгъэ пхэлъын хуейщ», - жиIащ Рябцевэм. 
НэгъуэщI Iуэху еплъыкIэщ къигъэлъэгъуар Толстых Никанор урысыбзэмкIэ и егъэджакIуэ Грозных Еленэ: «Сэ сызэрегупсысэмкIэ, щIалэм щытхъу къелэжь. Президентым жиIар зэрызэригъэзэхуэжам къигъэлъагъуэр ар мыпэжым щыхьэт зэрытемыхъуэфырщ, пцIы зэримыупсыфынурщ. ТIум щыгъуэми, ущIэшынэн Iуэхум хэмытауэ къызолъытэ». 
 «Кремлым щIалэ цIыкIум ищIар хьэлыншагъыу къащыщыхъуакъым, - псалъэмакъ псори игъэбэяужащ Президентым и пресс-секретарь Песков Дмитрий. - Къэхъуам укъэзыгъэуIэбжьын зыри хэмылъу аращ. ЩIалэ цIыкIум лIыгъэ хэлъщ, дыщогугъу абы ищIам зыри IейкIэ темыпсэлъыхьыну. Путин Владимир тхыдэр фIы дыдэу елъагъу, езыми адрейхэм ямыщIэ яжриIэну фIэфIщ, абы къыхэкIыу, жиIар сабий гуэрым зэригъэзэхуэжами, ар зыщIар IэщIагъэлI гуэру щытми, ягъэ мыкIауэщ къызэрыщыхъур».