IэмалыщIэхэр къахузэIуех

 Илъэс зыбжанэ хъуауэ ди къэралым щолажьэ лъэпкъ проект зэмылIэужьыгъуэхэр. УФ-м и Президентым къыхилъхьауэ икIи псэуныгъэм и унэтIыныгъэ нэхъыщхьэ зыбжанэм хуэгъэпсауэ яубзыхуауэ щыта а IуэхугъуэщIэхэм гъэ къэс къахохъуэ, заузэщI, проект пажэхэм гуэдзэнхэри къагуож.
 А проектхэм ящыщ дэтхэнэми и къалэн нэхъыщхьэр Урысей Федерацэм социально-экономикэ, щIэныгъэ-технологие я лъэныкъуэкIэ хэпщIыкIыу егъэфIэкIуэнырщ, къэралым щыпсэу цIыхухэм я псэукIэр нэхъ тынш, зэпэщ щIынырщ. Проектхэм, абыхэм я гуэдзэнхэм къыщыгъэлъэгъуа Iуэхугъуэхэр, мардэщIэхэмрэ еплъыкIэщIэхэмрэ гъащIэм хапщэкIэрэ, ди къэралым зеужь, йофIакIуэ, къаруущIэ егъуэт, дуней псом щапхъэу къыщалъытэ Iуэху зехьэкIэщIэхэм хуокIуэ жылагъуэр.
Ди республикэм и гъащIэми шэщIауэ хэтщ зи гугъу тщIы лъэпкъ проектхэри абыхэм я гуэдзэнхэри. Ахэр хуэгъэпсащ егъэджэныгъэ, ухуэныгъэ, щэнхабзэ, нэгъуэщI IэнатIэхэми зегъэужьыным. Къапщтэмэ, мыхьэнэшхуэ иIэщ «Егъэджэныгъэ» лъэпкъ проектми абы и федеральнэ гуэдзэн зыбжанэми. 2021-2022 гъэ еджэгъуэщIэм и пэщIэдзэм щIэрыщIэу къыхалъхьэжащ «КъэкIуэнур зыубзыху билет» («Билет в будущее»). Ар «Егъэджэныгъэ» лъэпкъ проетым «Дэтхэнэ сабийми и ехъулIэныгъэ» и федеральнэ гуэдзэным хэт Iыхьэхэм ящыщщ. Абы ипкъ иткIэ Къэбэрдей-Балъкъэрым и школакIуэ нэхъыжь псоми Iэмал яIэщ зыхуеджэну я мурад IэщIагъэм хэлъ щхьэхуэныгъэхэм нэхъ гъунэгъуу щыгъуазэ зыхуащIыну, абы нэхъ куууэ хуеджэну.
«КъэкIуэнур зыубзыху билет» проектыр мы зэманым щолажьэ УФ-м хыхьэ щIыналъэ 85-ми. УФ-м ЕгъэджэныгъэмкIэ и министерствэм, Гуманитар проектхэм я фондым я нэIэм щIэт а Iуэхъугъуэм, зэрыхуагъэфащэмкIэ, щIэупщIэшхуэ щиIэнущ ныбжьыщIэхэм я деж. Абы къызэщIиубыдэнущ школакIуэхэр IэщIагъэ къыхэхыным нэхъ пасэу хуэзыгъэуш, тезыгъэгушхуэ лэжьыгъэ куэд. Абыхэм хиубыдэнущ IэщIагъэлI цIэрыIуэхэмрэ ныбжьыщIэхэмрэ я зэхуэзэхэр, лекцэхэр, мультимедийнэ гъэлъэгъуэныгъэхэр, практикумхэр, нэгъуэщI куэди. IэщIагъэ къыхэхынымкIэ школакIуэхэм сэбэп къахуэхъунущ bvbinfo.ru Интернет сайтыр. Къыхэгъэщыпхъэщ абы егъэджакIуэхэм, адэ-анэхэм хухаха плIанэпи зэриIэр. IэщIагъэ къыхэхыным епха дэтхэнэ упщIэми и жэуап щагъуэтынущ а сайтым.
ПроектыщIэм и лэжьыгъэм жыджэру хэтхэм ящыщщ къэрал экономикэм и IэнатIэ зэмылIэужьыгъуэхэм я унафэщIхэри. Ахэр зыхуэныкъуэ IэщIагъэлIхэращ еджапIэхэм щагъэхьэзын хуейри, Iэмал хъарзынэ къыкъуэкIащ лэжьакIуэхэмкIэ я Iуэху зыIутыр хэIущIыIу ящIыну.
Проектым хэтыныр пщIэншэу щытынущ школакIуэхэм я дежкIэ, сыту жыпIэмэ абы къэралым субсидие щхьэхуэ хухихащи.

 
 

 

ЖЫЛАСЭ Маритэ.
Поделиться: