Лъэпкъхэм яку дэлъ зэныбжьэгъугъэр ягъэбыдэ

Вэрокъуэ Владимир и цIэр зезыхьэ ЩэнхабзэмкIэ фондым иджыблагъэ къыщызэIуахащ «Букет дружбы» фIэщыгъэм щIэт лъэпкъ щэнхабзэм и фестиваль. Ар хуэгъэпсат КъБР-м и Къэралыгъуэм и махуэм, «Щэнхабзэм и щэбэт» Урысейпсо Iуэхум.

 Фондым и унафэщI Мэкъуауэ Луазэ фестивалым кърихьэлIахэм фIэхъус псалъэ гуапэкIэ захуигъэзащ.
- Мы Iуэхум хэтщ Къэбэрдей-Балъкъэрым щыпсэу лъэпкъ зэмылIэужьыгъуэхэм я лIыкIуэхэр. Дэтхэнэми я хабзэр, бзэр, щэнхабзэ дахэр хуэсакъыу яхъумэ, зэрырагъэфIэкIуэнум хущIокъу, ар адрей лъэпкъхэм екIуу я пащхьэ зэрыралъхьэнум, зэрырагъэцIыхунум яужь итщ, - жиIащ Луазэ. 
 Фестивалыр къызэIуахащ «Родник» къэзакъ гупым, къыкIэлъыкIуэу утыкум къихьащ «Гордость Кавказа» ансамблыр. ИкъукIэ дахэу зыкъагъэлъэгъуащ Щэнхабзэмрэ гъуазджэмкIэ колледжым и студентхэм, РСФСР-м щIыхь зиIэ и артисткэ Таучэ Галинэ и гъэсэнхэу лъэпкъ-щэнхабзэ центр зэмылIэужьыгъуэхэм я лIыкIуэхэм.
- Ди жагъуэ зэрыхъунщи, зэманыр гугъу хъуащ, ауэ апхуэдэ лъэхъэнэм дяку хуабагъэ нэхъыбэу зэрыдэлъыным дыхущIэкъупхъэщ. Гуапагъэм хуэдэу цIыхур зыгъэдахэрэ и гукъыдэжыр къэзыIэтрэ щыIэ хъункъыми, а мащIэм дыхуэвмыгъэщхьэх, - захуигъэзащ Урысхэм я «Вече» лъэпкъ-щэнхабзэ центрым и тхьэмадэ Канунников Анатолий къызэхуэсахэм.
КъыкIэлъыкIуэу утыкум зыкъыщагъэлъэгъуащ Прохладнэ къикIа «Росичи» уэрэджыIакIуэ гупым, республикэм и щэнхабзэ IуэхущIапIэхэм я лIыкIуэхэм.
«Букет дружбы» фестивалыр мазитIым нэблагъэкIэ екIуэкIынурэ щэкIуэгъуэм и 23-м концерт инкIэ зэхуащIыжынущ.