16 сентября, 2021 - 11:41
Къэрмокъуэ Хьэчим Мухьэмэд и къуэр ди республикэм и мызакъуэу, утыкушхуэм къыщацIыхуа адыгэлIщ. Ар I94I гъэм къалъхуащ. 1963 гъэм Къэбэрдей-Балъкъэр къэрал университетыр промышленнэ, граждан ухуэныгъэ IэщIагъэмкIэ къеухри, Брянск къалэм лэжьэн щыщIедзэ Къэрмокъуэм.
ИужькIэ абы республикэм къегъэзэжри, ухуэныгъэхэр щрегъэкIуэкI Тырныауз, Налшык къалэхэми. Зэман докIри и щIэныгъэм хегъахъуэ - Москва дэт экономикэ институтым и аспирантурэр къеух. 1971 гъэм и диссертацэр пхегъэкIри, экономикэ щIэныгъэхэм я кандидат мэхъу. КъБКъУ-м доценту, егъэджакIуэ нэхъыжьу щылэжьащ. И диссертацэр егъэхьэзырри, I998 гъэм пхегъэкI икIи экономикэ щIэныгъэхэм я доктор цIэр къыфIащ.
«Къэббалъкъавтострой» ухуакIуэ-монтаж управленэм и унафэщIу, «Къэббалъкъпромстрой» трестым и тхьэмадэм и къуэдзэу 1973 – 1990 гъэхэм лэжьащ Къэрмокъуэр.
Хьэчим и IэнатIэхэм жэуаплыныгъэу хэлъыр къыгурыIуэу, зэпIэзэрыту къалэнхэр зэрыщрихьэкIыр къалъытэри, лэжьыгъэ нэхъ гугъухэр пщэрылъ хуащIу щIадзэ. I990 гъэм ар КъБАССР-м и Министрхэм я Советым и Тхьэмадэм экономикэ реформэмкIэ и къуэдзэу ягъэув. I99I – I993 гъэхэм КъБР-м и Совет Нэхъыщхьэм и УнафэщIщ. I993 гъэм дыгъэгъазэм щыщIэдзауэ УФ-м и Федеральнэ Зэхуэсым и Къэрал Думэм и депутатщ. I994-2000 гъэхэм Урысей Федерацэм и Къэзыбж Палатэм и япэ тхьэмадэщ. Ар икъукIэ къулыкъушхуэщ – къэралым и лIыщхьэ¬хэм ящыщу еханэщ. Ар адыгэ псоми ди дежкIэ щIыхьщ, гуапэщ!
2000 гъэм и накъыгъэм щыщIэдзауэ Хьэчим УФ-м и Къэзыбж Палатэм и тхьэмадэм и чэнджэщэгъу нэхъыщхьэщ. 2001 гъэм къыщыщIэдзауэ 2009 гъэ пщIондэ Къэрмокъуэм Урысей Федерацэм и Федеральнэ Зэхуэсым ФедерацэмкIэ и Советым лэжьыгъэ купщIафIэхэр щигъэзэщIащ, БюджетымкIэ абы и комитетым хэту. ИужькIэ КъБР-м и къэрал чэнджэщэгъу къулыкъур республикэм щрихьэкIащ. Мы зэманым Къэрмокъуэ Хьэчим КъБР-м и Iэтащхьэм инвестиционнэ политикэмрэ инновацэм пыщIа Iуэхухэр пхыгъэкIынымкIэ и лIыкIуэщ. КъинэмыщIауэ, республикэм щекIуэкI жылагъуэ Iуэхухэм дапщэщи жыджэру хэтщ.
ЗэфIиха лэжьыгъэшхуэхэм папщIэ Къэрмокъуэм къыхуагъэфэщащ къэрал дамыгъэ лъапIэхэр, щытхъу тхылъхэр. Абыхэм ящыщщ Зэныбжьэгъугъэм и орденыр, «Москва илъэс 850-рэ ирокъу» медалыр, УФ-м и Къэрал Думэм къыбгъэдэкI ЩIыхь тхылъыр, нэгъуэщIхэри.
