Нэхъри зыщаубгъунущ

Урысей Федерацэм ЭкспертизэмкIэ и къэрал IуэхущIапIэ нэхъыщхьэм и IэщIагъэлIхэм къызэралъытэмкIэ, гъэм и сыт хуэдэ лъэхъэнэми лажьэ «Iуащхьэмахуэ» турист-рекреацэ комплексым зыщиубгъуа щIыгум бгы-лыжэ къежэхыпIэу иджыри 8 къызэрыщызэрагъэпэщыным ехьэлIауэ кърахьэжьа Iуэхур арэзы укъэзыщIщ.

НобэкIэ бгыжь уардэм и джабэ нэкIухэм узыщрихьэлIэр, псори зэхэту, километр 15,4-рэ зи кIыхьагъ бгы-лыжэ къежэхыпIэхэмрэ абыхэм уащхьэщызышэ дэкIуеипIэу 7-мрэщ. Ауэ щыхъукIи, ЭкспертизэмкIэ къэрал IуэхущIапIэ нэхъыщхьэм къызэригъэувымкIэ, лъагапIэхэм удэзышыну кIапсэ гъуэгущIэхэм ящыщу зи проект зыхэплъа тIур къызыхуэтыншэщ.
IэщIагъэлIхэм щыгъуазэ зыхуащIащ бгы-лыжэ къежэхыпIэу 8-р пхышыным хуэгъэза проект нэхъыщхьэми. Ар гъэзэщIэным ехьэлIа лэжьыгъэхэр IыхьитIу гуэшащ. Япэм къыщыгъэлъэгъуащ ЕР5, ЕРI4 лъагъуэхэу «плъыжь» нагъыщэ зратахэмрэ, адрейхэм елъытауэ, нэхъ хаукъуэдиикIыну зыхуагъэфащэ, километр I,5-рэ зи кIыхьагъ ЕР4 къежэхыпIэмрэ зыхуэдэнур.  
 Лэжьыгъэхэм я етIуанэ егъэкIуэкIыгъуэм бгы-лыжэ къежэхыпIэу иджыри тхум хуеужьэрэкIынущ. EPI2 зи нагъыщэ лъагъуэу километр I,3-рэ зи кIыхьагъыр, я нэхъ гугъу дыдэхэм зэрыхабжэм къыхэкIыу, «фIыцIэ» лIэужьыгъуэм храгъэубыдэнущ. КъежэхыпIэхэу ЕРII (метр 347-рэ), ЕРII.2 (километр I,I-рэ) зи нагъыщэхэр «плъыжь» лIэужьыгъуэм хагъэхьащ. ЕР8 лъагъуэу метр 452-рэ зи кIыхьагъыр, я нэхъ тыншхэм зэрыхрагъэубыдам къыхэкIыу, «щхъуантIэ» лIэужьыгъуэм щыщу къабжащ. ЕР7 лъагъуэу метри I58-рэ зи кIыхьагъыр, бгы лыжэ къэзыщтагъащIэхэм яхуэгъэзауэ зэрыщытынур къалъытэри, «удзыфэ» лIэужьыгъуэм хагъэхьащ.
Бгы-лыжэ лъагъуэщIэхэм ящыщу уэсукхъуэхэр нэхъыбэу къыщех щIыпIэхэм щаухуэнухэр, а къэхъукъащIэм щахъумэн хьисэпкIэ, IущIапIэхэмкIэ къагъэбыдыхьынущ.
Лэжьыгъэ псоми трагъэкIуэдэну мылъкур «Кавказ Ищхъэрэм и курортхэр» АО-м къыбгъэдэкIынущ.