Дохутыр гумащIэ

ЦIыхур къыхуэарэзыуэ и IэнатIэр езыхьэкI дохутырхэм ящыщщ Тэрч щIыналъэм хыхьэ Курп Ипщэ (Ислъэмей) къуажэ щыпсэу Хъупэ (ХьэпащIэ) Мадинэ.
«Сыт хуэдэ дохутырри философу къэплъытэ хъунущ, медицинэр Iущыгъэ пхэмылъу къыпхуэгъэIурыщIэнукъыми», - жиIауэ щытащ Гиппократ. Абы лъандэрэ зэман мащIи дэкIыжа, а дохутыр цIэрыIуэм и тхьэрыIуэр мащIэм ята?! Ауэ сыт хуэдэ лъэхъэнэми щыIащ икIи щыIэнущ сымаджэхэм яхуэгумыгъуэ дохутырхэр.
 Гиппократ и тхьэрыIуэр зыгъэпэжа Мадинэ 1959 гъэм Тэрч къалэ къыщалъхуащ. Курыт школыр ехъулIэныгъэ иIэу къиуха нэужь, куэдрэ мыгупсысэу КъБКъУ-м и медицинэ факультетым щIэтIысхьащ.
- Ди унагъуэми ди благъэхэми дохутыр яхэттэкъыми, хуабжьу сехъуапсэрт а IэщIагъэр зэзгъэгъуэтыну. Си адэ-анэми ар къыщысхуагъэдахэм, сытегушхуащ. А зэманым нэгъуэщI IэщIагъэ сызэрыримылэжьэфынур сщIэрт, дохутыр сыхъуным апхуэдизкIэ сыхуэпабгъэрти, - жеIэ Мадинэ.
Медицинэ факультетыр къиуха иужь, абы интернатурэри къыпищащ. ИтIанэ Тэрч къалэ дэт поликлиникэм лэжьэн щыщIидзащ. Куэд дэмыкIыу, 1985 гъэм, унагъуэ ихьэри, Курп Ипщэ дэт амбулаторэм уващ. Дохутыр Iэщабэ-Iущабэм щIэх дыдэу къыдихьэхащ къуажэдэсхэр. Псалъэ гуапэкIи хущхъуэкIи цIыхухэм еIэзэ дохутырым къыхуэмыарэзыуэ къэнэнт?!
Дохутыр IэщIагъэм и щэху нэхъыбэм зыщигъэгъуэзэн папщIэ, 2006 гъэм Мадинэ Ставрополь щIыналъэм и щIэныгъэм щыхигъэхъуащ. Курп Ипщэм пэгъунэгъу Инарыкъуей, Курп Ищхъэрэ къуажэхэм я дохутырым сабий ипIу зэрыщыс пIалъэм абы и пIэкIэ къуажэхэми щылэжьэну къелъэIуати, игъэщIэхъуакъым. Жэуаплыныгъэр нэхъыбэ хъуа щхьэкIэ, абы цIыхухэм яхуищIэ Iуэхутхьэбзэм и фIагъым зыкIи кIэричакъым, къыхуэарэзыхэмрэ и щытхъу жызыIэхэмрэ нэхъыбэ хъуащ армыхъумэ.
Хъупэ Мадинэ и Iуэху щIэкIэм, и лэжьыгъэм хуиIэ бгъэдыхьэкIэм а IэнатIэм гугъуехь гуэри хэлъу къыпщигъэхъуркъым, уеблэмэ урегъэхъуапсэ. Дэ, абы иримылажьэхэм, дэнэ щытщIэн, ар сымаджэм щхьэщысу жэщ дапщэ игъэкIуами, узым зэщIиубыда дапщэ ажалым къригъэлами. Ар бжыгъэншэщ, абы къилэжьа фIыщIэр зэрыкуэдым хуэдэу. Дохутыр IэщIагъэр къыщыхахым и деж абы гугъуехьу пылъыр зыми и кIэм нэсу къыгурыIуэ къыщIэкIынкъым, ауэ Мадинэ хуэдэу зи IэнатIэр пщIэрэ щIыхьрэ пылъу езыхьэкIхэр цIыхугъэ лъагэм и щапхъэщ.
Мадинэ гъащIэм щиIэ гукъыдэжыр, шэч хэмылъу, къезытыр и унагъуэ дахэрщ. Абырэ и щхьэгъусэ Хъупэ Мурикрэ хъыджэбзищрэ зы щIалэрэ яIэщ. 
И унагъуэ дахэм гурыфIыгъуэ ин къриту, узыншэу иджыри илъэс куэдкIэ Мадинэ и IэнатIэм ехъулIэу ирихьэкIыну ди гуапэщ. 

 

Щомахуэ Залинэ.
Поделиться: