КIуэкIуэ Казбек Москва щыIэу хэтащ УФ-м и Правительствэм и УнафэщI Мишустин Михаил иригъэкIуэкIа зэхуэсым. Абы щыхэплъащ Урысей Федерацэм и Президентым нэхъ пасэу къигъэува къалэнхэм тету Кавказ Ищхъэрэ федеральнэ щIыналъэм хыхьэ субъектхэм я экономикэм зэрызрагъэужьыну щIыкIэхэм.
ЗэIущIэм хэтащ УФ-м и Правительствэм и УнафэщIым и къуэдзэхэу Новак Александр, Хуснуллин Марат, Чернышенкэ Дмитрий, видеоконференц зэпыщIэныгъэ Iэмалхэм тету - КИФЩI-м хыхьэ щIыналъэхэм я Iэтащхьэхэмрэ Правительствэхэм я унафэщIхэмрэ, корпорацэ, IуэхущIапIэ зыбжанэм я унафэщIхэр.
Мишустин Михаил жиIащ УФ-м Экономикэ зыужьыныгъэмкIэ и министерствэм щIыналъэхэм я зыхуэфащэ IуэхущIапIэхэр ящIыгъуу щIыпIэ экономикэхэм зэрызрагъэужьыну щIыкIэхэр зэрызэхалъхьар. «А мардэхэр дэтхэнэ щIыналъэми и дежкIэ увын хуейщ унафэ къыщащтэкIэ, зэфIагъэкIынухэр, программэхэр щызэхалъхьэкIэ зытетыпхъэхэу икIи Урысейм и Президентым къигъэува къалэн нэхъыщхьэхэр гъэзэщIэным хуэунэтIауэ щытыпхъэщ. Апхуэдэуи ахэр щIэгъэкъуэн яхуэхъун хуейщ иджыпсту щыIэ щытыкIэм къикIыу 2030 гъэм ирихьэлIэу зрагъэхъулIэнухэм хуэкIуэнымкIэ. Зэхэтлъхьа мардэхэм къыщыгъэлъэгъуащ демографие и лъэныкъуэкIэ щIыпIэхэм мы зэманым я Iуэху зытетыр, лэжьапIэ IэнатIэу зыхуэныкъуэр зыхуэдизыр, абы щэхуу лажьэ IэнатIэхэр экономикэм къыхэшэжыным хуэгъэзахэри хэту. КъищынэмыщIауэ, Кавказ Ищхъэрэ федеральнэ щIыналъэм хыхьэ хэкухэм я IэнатIэхэр зэрыт щытыкIэри щызэпкърыхащ абыхэм. Дэтхэнэ зы щIыналъэми хуэзэу Iуэху нэхъыщхьитху яубзыхуащ, абы къыдэкIуэу проект тхурытхуи хузэхалъхьащ. Ахэрщ нэхъыбэу зэлъытауэ щытынури щIыпIэхэм продукцэу къыщалэжьынур, Iуэхутхьэбзэу щащIэнур зыхуэдизынури, цIыхухэм я хэхъуэхэр нэхъыбэ зыщIынури икIи мылъку нэхъыщхьэм инвестицэхэр къыхегъэлъхьэнми хуэщхьэпэнущ, апхуэдэуи экономикэм IэнатIэ щыпэрытхэм я бжыгъэми хагъэхъуэнущ. Псори зэхэту проект 35-рэ зэхалъхьащ, зи гугъу сщIа IэнатIэхэм зегъэужьыным хуэгъэпсауэ. Ар туризмэрщ, мэкъумэш IэнатIэрщ, промышленностымрэ псэупIэ ухуэнымрэщ», - жиIащ Мишустин Михаил.
Къэбэрдей-Балъкъэр Рспубликэм экономикэ и лъэныкъуэкIэ зэрызиужьыну щIыкIэм инвестицэ проект 56-рэ хохьэ, 2030 гъэ пщIондэ ягъэзэщIэн хуейуэ. А проектхэм я Iыхьэ плIанэр туризм IэнатIэм ехьэлIащ, адрей инвестицэ проектышхуэхэм ящыщщ мэкъумэш IэнатIэм, псэупIэ ухуэным, информационнэ технологиехэм теухуахэр.