ЗэгурыIуэныгъэ зэращIылIэ

Щэбэт кIуам Черкесск къалэм щызэIущIащ КъБР-м и Iэтащхьэ КIуэкIуэ Казбек, КъШР-м и Iэтащхьэ Темрезов Рашид, Адыгэ Республикэм и Iэтащхьэ ­КъумпIыл Мурат, Ставрополь крайм и губернатор Владимиров Владимир сымэ. Хэгъэгу унафэщIхэм ЗэгурыIуэныгъэ зэращIылIащ республикищыр къы­зэ­рыунэхурэ илъэси 100 зэрырикъум ехьэ­лIа дауэдапщэхэр щрагъэкIуэкIкIэ зэ­рызэдэлэжьэнум теухуауэ.

ЗэIущIэр къыщызэIуихым КъШР-м и Iэтащхьэ Темрезов Рашид жиIащ: «Си гуа­пэу Къэрэшей-Шэрджэсым и щIыналъэм фыкъызогъэблагъэ. Ди республикэр зэ­пызыщIэр лIэщIыгъуэкIэрэ къыддекIуэкI тхыдэм и закъуэкъым, атIэ ди цIыхубэм я зэхуаку дэлъ зэкъуэшыгъэрщ, лъэпкъ зэныбжьэгъугъэ гуапэрщ. Тхыдэм мызэ-мытIэу къыхощыж, зыр адрейм дыдэIэпы­къужу, гугъуехьхэр зэгъусэу къызэднэкIыу, ди ехъулIэныгъэхэмрэ текIуэныгъэхэмрэ зэдэдгуэшу дыкъызэрыгъуэгурыкIуам теухуа Iуэхугъуэхэр. Аращ къэралым и къару нэхъыщхьэри, щIыналъэхэм лъабжьэ  яхуэхъури».
ЗэгурыIуэныгъэм Iэ щыщIадзым КъБР-м и Iэтащхьэ КIуэкIуэ Казбек Темрезовым фIыщIэ хуищIащ: «Псом япэу Рашид ­Бориспий и къуэм фIыщIэ хуэсщIыну сы­хуейщ мыпхуэдэ зэIущIэр я хэгъэгум           ще­дгъэкIуэкIынымкIэ, ди хэгъэгухэм             щы­щыIэ щытыкIэхэмрэ гугъуехьхэмрэ ды­теп­сэлъыхьыну Iэмал къы­зэ­рытхузэ­ригъэпэщам щхьэкIэ. Республикищым я илъэсищэр щагъэлъэпIэну 2022 гъэм ипэ къихуэу дызэрызэхуэзам мыхьэнэшхуэ иIэщ. А махуэшхуэм Къэбэрдей-Балъкъэрым, Къэрэшей-Шэрджэсым, Адыгейм ис цIыхубэм я дежкIэ мыхьэнэ ин зэриIэр къыдэкIуэтей щIэблэм я деж нэтхьэсыныр ди къалэну солъытэ. Iуэхугъуэ куэд къэ­тIэ­тынущ абы ирихьэлIэу, ди къуэш республикэм и лIыкIуэхэри хэту. Къалэн куэд ди пащхьэ къитщ, егъэджэныгъэм, туризмэм зегъэужьыным, псоми зэдай проектхэр гъэзэщIэным теухуауэ».
- Зэкъуэш лъэпкъхэм я зэхуаку дэлъ зэ­пыщIэныгъэм и гугъу пщIымэ, ар гъэ къэс нэхъ быдэ хъууэ аращ, абыкIэ сэбэп мэхъу, щэнхабзэм и лэжьакIуэхэмрэ творческэ гупхэмрэ. Экономикэм ехьэлIауэ жыпIэ-мэ, мэкъумэш IэнатIэмрэ туризмэмрэ теухуа проект зэдайхэр диIэщ. Егъэджэ­ныгъэ проектхэми зэрызедгъэужьыным иужь дитщ, ар IT-технологиерщ, математикэрщ. АбыкIэ Адыгейм ехъулIэныгъэ нэхъыбэ зыIэригъэхьащи, Iуэхум и пIалъэр абыхэм дагъэщIэнщ. Ди къэралыр щыIэху, абы ис лъэпкъхэми я зэкъуэтыныгъэр кIуэдынукъым», - дыщIигъуащ ди респуб­ликэм и Iэтащхьэм.
КIуэкIуэ Казбек Темрезов Рашид зи уна­фэщI республикэм и зэIузэпэщыныгъэм теухуауэ ящIэ псори къадэхъуну ехъуэ­хъуащ.
Iэтащхьэхэр а махуэм щыIащ КъШР-м и Сурэт галереем икIи Къэрэшей-Шэрджэ­сыр илъэси 100 зэрырикъум теухуа гъэлъэгъуэныгъэм еплъащ.

Къэбарт Мирэ.
Поделиться: