ЩIэныгъэхэмкIэ Дунейпсо Адыгэ академием иригъэкIуэкI егъэджэныгъэ программэм ипкъ иткIэ, хьэрычэтыщIэхэр щрагъаджэу Испанием щыIэ школ лъэрызехьэ къэзыухахэм ящыщщ Гуэщокъуэ Марианнэ.
ЩIДАА-м псапащIэ егъэджэныгъэ программэр 2019 гъэм щиублам, Марианнэ дзыхь имыщIыщэурэ и дэфтэрхэр иригъэхьат. «Си къарумрэ щIэныгъэмрэ сыкъагъэгугъэ пэтми, си фIэщ хъуртэкъым Европей хьэрычэтыщIэ школым и диплом къысIэрыхьэну», - игу къегъэкIыж пщащэм.
Урысей Федерацэм и Федеральнэ Зэхуэсым ФедерацэмкIэ и Советым КъБР-м къыбгъэдэкI сенатору щыIэ, ЩIДАА-м и президент Къанокъуэ Арсен щIалэгъуалэр хамэ къэралхэм игъакIуэу иригъэджэну къыщыхилъхьам, абы хыхьэну хуейуэ япэу зезыгъэтхахэм ящыщщ Гуэщокъуэхэ я пхъур. Гугъуехь хэмылъу зэпеуэм пхыкIри, Испанием щеджэну и насып къихьащ. ИкIи EAE Business School еджапIэм дипломитI къыщIихри къигъэзэжащ.
- Хуабжьу куэд къыщысщIащ Испанием, уеблэмэ егъэджэныгъэм, гъащIэм хузиIэ еплъыкIэм зригъэхъуэжащ. Сэ быдэу къызгурыIуащ апхуэдизу мыхьэнэшхуэ зэтт оценкэхэм нэхърэ еджапIэм къыщIэпх щIэныгъэр зэрынэхъ лъапIэр, мыхьэнэ зиIэр зэрыарар. Ар къыбгурызыгъаIуэр зэбгъэгъуэт IэщIагъэм узэрыхуагъасэ практикэр европей школхэм зэрыщыкуэдырщ. КъищынэмыщIауэ, дезыгъаджэхэр теоретик къудейтэкъым, атIэ хьэрычэтыщIэ лъэрызехьэхэрт. Абыхэм Iуэхум и зэхэлъыкIэр къыбгурагъаIуэм и мызакъуэу, езыхэр махуэ къэс зрихьэлIэ гугъуехьхэмрэ ехъу- лIэныгъэхэмрэ пхузэпкърахырти, лэжьыгъэм и пIалъэр нэрылъагъу ящIырт. Дэ къыдгурыIуар къызэрыдгъэлъагъуэр псалъэкIэтэкъым, атIэ Iуэху пыухыкIа зэпкърытхкIэрэт», - къыддогуашэ Марианнэ.
Пщащэм зэрыжиIэмкIэ, еджэным хэзэгъэныр къызэрыгуэкIыу щытакъым, гугъуехь щыхэтаи щыIащ, хузэфIэмыкIыну къыщыщыхъу дакъикъи къыхуихуащ, ауэ къикIуэтакъым. КъищынэмыщIауэ, лъэпкъ куэду зэхэс, щэнхабзэ зэмылIэужьыгъуэ куэд здэщыIэ Испание къэралыгъуэм хуабжьу дихьэхат. ЕджакIуэ зэрыщыIа пIалъэм къриубыдэу проект куэд игъэзэщIащ, езым и гупсысэ куэд щIэныгъэм, гъащIэм хипщащ. Иужьрейуэ зригъэщIа псори къигъэсэбэпри, диплом лэжьыгъэр итхащ.
- Ар зытезухуар пандемиеращ - абы къихьа гугъуехьхэмрэ Iэмалхэмрэ щызэпкърысхащ си лэжьыгъэм. Сэ сызэреплъымкIэ, мы дызэрыхуа щытыкIэм дызыхигъэта бэлыхьхэм нэмыщI, IэмалыщIэхэри къытхуихьащ икIи куэдым дыхуигъэсащ. Си диплом лэжьыгъэм щызэпкърысхащ локдауным къыхэкIыу лэжьапIэншэу къэна ливан пщафIэхэм папщIэ телефон гуэдзэн къызэрызэгъэпэщыпхъэр, абыкIэ тыншу ерыскъыр зэрыпхуэщэнур. Приложением и фIыгъэкIэ лэжьыгъэ ягъуэтынущ а ерыскъыр зэбгрызыхыну щIалэгъуалэми, къищынэмыщIауэ, езы пщафIэхэми унэм щIэсу шхынхэр ягъэхьэзырыфынущ. Сыт Ливаныр къыщIыхэсхар? Иджыпсту а къэралым и экономикэр хуабжьу ехуэхащ. Сэ сыхуейт къулейсызыгъэ къызылъыса цIыхухэм ахъшэ къызэралэжьын Iэмал ягъуэтыну. Ливаным туризмэмрэ ресторан хьэрычэт Iуэхумрэ зыщиужьащ. Ауэ экономикэ кризисым щытыкIэ гугъу иригъэуващ а унэтIыныгъэхэр. ИрагъэкIуэкIа къэпщытэныгъэхэм япкъ иткIэ, къэралым ис цIыхухэм я нэхъыбэр шхапIэхэращ щышхэр. Иджыпсту ахэр зэхуащIри, щылажьэ псори лэжьапIэншэ хъуащ, - жеIэ пщащэм.
Марианнэ зи гугъу ищI диплом лэжьыгъэр цIыхуищ хъууэ ятхащ, Мароккэм щыщ зы щIалэрэ Ливаным щыщ пщащэрэ и гъусэу. Испанием и хьэрычэтыщIэ школым узыщыхурагъасэхэм ящыщщ гупым ухэту улэжьэныр. Абы къыхэкIыу диплом лэжьыгъэри зэгъусэу уагъэтх. Гуэщокъуэм зэрыжиIэмкIэ, егъэджакIуэхэм мыхьэнэшхуэ ират цIыхухэм уазэрепсэлъэфым, я Iуэху дэкIмэ, уазэрыщыгуфIыкIыфым, псалъэмакъ уи зэхуаку къыдэхъуамэ, укъызэрыхэкIыфым.