Ласицкене и псей

Къэбэрдей-Балъкъэрыр зэ­рыгушхуэн спортсмен цIэ­ры­Iуэ куэд диIэщ. Апхуэдэхэщ Къардэн Мурат, Хъущт Аслъэнбэч, Мудрэн Беслъэн, Джэ­ду Аниуар, Махуэ Билал сымэ. Мы гъэм абыхэм пщащэ закъуэу къахыхьащ Прох­ладнэ (КъалэкIыхь) къалэм щыщ Ласицкене Марие - Токио (Японием) щыIа XXXII Олимп джэгухэм дыщэ медалыр къыщихьащ. 

1993 гъэм щIышылэм и ­14-м Прохландэ къалэм къыщалъхуа хъыджэбз цIыкIур дуней псом щыпашэ спортсмен цIэрыIуэ хъуну хэт ищIэнт?! Спортым гулъытэшхуэ щы­хуащI­ унагъуэм къыщыхъуащ­ Марие. И адэ Александр фIы дыдэу волейбол джэгурт, и анэм баскетболымкIэ зигъа­сэрт. ИлъэсипщI ныбжьым иту Кучинэ (иджы Ласицкене) атлетикэ псынщIэмкIэ зыщигъэсэн щIидзащ Габрилян Геннадий и деж. Абы физкуль­турэмкIэ школым сабийхэм­ щадригъэкIуэкI дерсхэм псын­щIэу гу щылъитащ адрейхэм­ и инагъкIи зэфIэкIкIи къа­хэщ хъыджэбз псыгъуэ цIы­кIум. КъыщызэдэжэкIи, лъа­гэу­ щыдэлъейкIи, нэгъуэщI лIэу­жьыгъуэхэмкIи ар псоми фIыкIэ къахэщырт. Нэрылъагъут Марие спорт зэфIэкI лъагэ къызэрыкъуэкIыфынур. Абы папщIэ ерыщу дэлэжьэн хуейт. А Iуэхугъуэ мытыншыр и пщэ дилъхьэжащ физкультурэмкIэ­ егъэджакIуэ къызэрыгуэкI Габрилян Геннадий икIи, зэман дэкIри, тренерми абы и гъэсэнми дунейпсо цIэрыIуагъ ягъуэтащ. 
Лъагэу дэлъеинымкIэ япэ зэхьэзэхуэм Марие щыхэтам и ныбжьыр илъэсипщI хъу къудейуэ арат. Зы илъэскIэ езым нэхърэ нэхъыжь хъыджэбз цIы­кIур абы къыщефIэкIауэ щытащ. Ди пщащэм абы щыгъуэ къызэринэкIар зы ­метр лъагапIэрт. ИужькIэ Марие куэдрэ игу къигъэкIыжащ а зэпеуэр икIи иджыри къыздэсым абы къыщихьауэ щыта грамотэр ехъумэ. А зэманым къыщыщIэдзауэ тренерым гу лъитат Марие и ерыщагъым, зы­хуигъэувыжа плъапIэм зэ­рыхуэпабгъэм, пашэныгъэм зэ­рыхущIэкъум. 
«СыбзыщIынкъым, сэ згъэсахэм Машэ къыкIэрымыху спортсмен ныбжьыщIэхэри яхэтащ, - игу къегъэкIыж Габ­рилян. - Абыхэм ящыщ зыр Ку­чинэм къыщыте­кIуауэ щытащ. Ар къэгуб­жьауэ, щIэуп­щIэрт: «Ар дауэ? Абы зыгъэсэныгъэ куэд дигъэхуащ, сэ зыри къэзгъэнакъым. Сыт сыщIыхэнар?» Дауэ феплърэ, финалым зэхьэзэхуэм Марие зызэщIикъуэри абы текIуауэ щытащ. Ар пашэм и дамыгъэт. Марие сыт и лъэныкъуэкIи зэчиифIэ спортсмент. 2006 гъэм илъэс 14-м иту дэ дыхэтащ атлетикэ псынщIэмкIэ къэрал­псо зэхьэзэхуэм. Сантиметри 173-м щхьэпрылъри текIуащ. А ­зэманым къыщыщIэдзауэ «вагъуэщIэ» къытхуэунэхуащ». 
 Урысейм щIыхь зиIэ спортымкIэ и мастер Ласицкене Ма­рие­ текIуэныгъэ куэдыкIей иIэщ.­ Иужьрей илъэсипщIым къриубыдэу ар щымыпаша зэхьэзэхуэ къэщIэжыгъуейщ. Олимп чемпионым и ехъулIэ­ныгъэ нэхъ инхэм ящыщщ 2015, 2017, 2019 гъэхэм дуней­псо чемпионатым, 2014, 2018 гъэ­хэм пэшым щIэту дуней­псо зэпеуэм зэрыщытекIуахэр. Европэм щэнейрэ и чемпионщ. Зэи къэмыхъуауэ лъагэу­ дэлъеи­нымкIэ щэнейрэ дунейпсо чемпионщ. Зэхьэзэхуэ куэд екIуэкIакъым Ласицкене ЩIы хъурейм и рекордхэр­ щимыгъэуву. Зыбжанэрэ Урысей Федерацэми Европэми илъэсым и спортсмен нэхъыфIу къыщалъытащ. 
Токио щекIуэкIа зэпеуэ иным дыщэ медалыр къыщихьа нэужь Налшык дэт Олимп ­ехъулIэныгъэхэм я алеем Ласицкене Марие и цIэкIэ псей щыхасащ.