ЩIэпхъаджагъэ къэмыгъэхъуным йолэжь

Къэбэрдей-Балъкъэрым и Iэтащхьэ КIуэкIуэ Казбек иригъэкIуэкIащ КъБР-м Террорым пэщIэтынымкIэ и комиссэмрэ Оперативнэ штабымрэ я зэIущIэр. Абы хэтащ КъБР-м и Правительствэм и УнафэщI Мусуков Алий, федеральнэ инспектор нэхъыщхьэу КъБР-м щыIэ Мэкъуауэ Тимур, министерствэхэмрэ ведомствэхэмрэ я унафэщIхэр, щIыналъэ Iэтащхьэхэр.
ЗэIущIэр къыщызэIуихым КIуэкIуэ Казбек жиIащ: «2021 гъэм Террорым пэщIэтынымкIэ комиссэм зэфIигъэкIахэр къэтпщытэжу, етIанэгъэ нэхъыщхьэу дызэлэжьынухэр дубзыхун хуейщ. Мы илъэсым терроризмэм пэщIэтын Iуэхур зэпIэзэрыту екIуэкIащ. Зэдэлэжьа къулыкъущIапIэхэм я фIыгъэкIэ, щIэпхъаджагъэ къэхъуакъым. Террорым пэщIэтынымкIэ комиссэм и лэжьыгъэм лъабжьэ хуэхъуащ УФ-м и Президентым, абы ехьэлIауэ щыIэ хабзэхэм, Терроризмэм пэщIэтынымкIэ лъэпкъ комитетым яубзыхуа къалэнхэр. Нэхъыбэу дызэлэжьар щIэпхъаджагъэ къэмыгъэхъуныр зи пщэ дэлъ къэрал къулыкъущIапIэхэмрэ жылагъуэ зэгухьэныгъэхэмрэ быдэу зэпыщIауэ зэдэлэжьэнырщ. Илъэсым къриубыдэу комиссэм хэтхэр тхуэ зэхуэзащ, а зэIущIэхэм Оперативнэ штабыр плIэ хэтащ. Абыхэм къыщагъэлъэгъуа Iуэхугъуэхэм япкъ иткIэ, нормативно-правовой акту тху къыдэкIащ. Республикэм исхэм а Iуэхум теухуауэ зэрадэлэжьам фIы кърикIуауэ жыпIэ хъунущ. ЩIыпIэ нэхъыщхьэхэмрэ цIыху зэхуэсыпIэхэмрэ щIэпхъаджагъэ къыщымыгъэхъуныр зэпымычу я нэIэ щIэтщ ар зи пщэрылъхэм. Террорым пэщIэтынымкIэ комиссэм щаубзыхуа псори зыхуей хуэзэу игъэзэщIащ комиссэм икIи Терроризмэм пэщIэтынымкIэ лъэпкъ комитетым и унафэщIхэм КъБР-м Террорым пэщIэтынымкIэ и комиссэм и лэжьыгъэр къехъулIауэ къилъытащ».
Къэрал кIуэцI IуэхухэмкIэ министру КъБР-м щыIэ Павлов Василий тепсэлъыхьащ къэблагъэ махуэшхуэхэм шынагъуэншагъэр къызэгъэпэща хъуным теухуауэ ялэжьым.
КъБР-м экстремизмэр щымыгъэIэным и IуэхукIэ и министр Къуэшрокъуэ Залым тепсэлъыхьащ терроризмэмрэ экстремизмэмрэ щымыIэным епха къэрал программэр республикэм гъэзэщIа зэрыщыхъум. КъБР-м цIыхухэр егъэджэнымкIэ, щIэныгъэмрэ щIалэгъуалэм я IуэхухэмкIэ и министр Езауэ Анзор и гугъу ищIащ терроризм шынагъуэншагъэр къызэзыгъэпэщ къэрал къулыкъущапIэхэм щылажьэхэм я Iэзагъыр хагъэхъуэным теухуауэ яхузэфIэкIам.
ЗэIущIэм щыжаIахэр къэлъытауэ унафэм и проектыр къащтащ. КъБР-м и Iэтащхьэ КIуэкIуэ Казбек къызэхуэсахэм иджыри зэ ягу къигъэкIыжащ илъэсыщIэ махуэшхуэхэм шынагъуэншагъэр къызэгъэпэщыным щIэгъэхуэбжьауэ иужь итын зэрыхуейр.

Шыпш Даянэ.
Поделиться: