Дунейпсо чемпион

Мэзкуу къалэм дэт «Аквариум» спорт комплексым щекIуэкIащ ACB JJ зэзауэ зэхэтхэмкIэ дунейпсо чемпионат. Абы фIы дыдэу зыкъыщигъэлъэгъуащ ди лъэпкъэгъу ГуэныкIэ Заур.

 
Gi лIэужьыгъуэмкIэ бгырыпх щIыху зиIэхэм я зэхьэзэхуэм килограмм 95-м щIигъухэм я деж щригъэкIуэкIа зэIущIиплIми шэч къызытумыхьэн текIуэ­ныгъэ щызыIэригъэхьащ ГуэныкIэм икIи дунейпсо чемпионатым и дыщэ медалыр къыхуагъэфэщащ. А хьэлъагъ дыдэм No Gi лIэужьыгъуэм Заур етIуанэ щыхъуащ, арщхьэкIэ абсолютнэ хьэлъагъхэм зиIэхэм я деж иджыри зы дыщэ медаль къыщихьыжащ. 
Фигу къэдгъэкIыжынщи, 2021 гъэм дыгъэгъазэм и кIэм ГуэныкIэ Заур и зэфIэкI лъагэхэм япкъ иткIэ бгырыпх щIыхур къыхуагъэфэщауэ щытащ. 
Спортсменыр ягъасэ Жантегуэл Зауррэ Шыхъуэстэн Русланрэ. 
 

Жыласэ Замир.
Поделиться: