ЗыхэпсэукI зэманым, гъащIэм жыджэру хэтхэр, дзыхь къыхуащI IэнатIэр егъэфIэкIуэным, зегъэужьыным гурэ псэкIэ хущIэкъухэр, ди гуапэ зэрыхъущи, куэду яхэтщ иджырей щIалэгъуалэм. Апхуэдэ цIыхухэм ящыщщ Аргудан къуажэм дэт курыт школ №3-м адыгэбзэмрэ литературэмрэ щезыгъэдж, абы и унафэщIу илъэс зыбжанэкIэ лэжьа, лэжьыгъэм и къызэгъэпэщакIуэ IэкIуэлъакIуэу зыкъэзыгъэлъэгъуа, зэхэщIыкI куу зиIэ хэкупсэ нэс Мэшыкъуэ Радимэ.
Аргудан дэт курыт школ №2-р ехъулIэныгъэкIэ къиухащ Радимэ. Абы зэрыжиIэмкIэ, школым щыщIэса илъэсхэм ар дапщэщи щIэхъуэпсу щытащ юрист IэщIагъэр зригъэгъуэтыным, арщхьэкIэ класс нэхъыжьхэм щIэсу ар нэхъыбэу дахьэх хъуащ анэдэлъхубзэмрэ лъэпкъ литературэмрэ икIи мурад ищIащ абыхэм нэхъ куууэ хуеджэну. ЗэрыжиIэмкIэ, абыкIэ щапхъэ хуэхъуащ а дерсхэмкIэ егъэджакIуэу иIа ПхытIыкI Лусэ. А бзылъхугъэ псэ къабзэм, егъэджакIуэ нэсым къыбгъэдилъхьа щIэныгъэфIым и фIыгъэщ КъБКъУ-м и адыгэбзэ къудамэм Радимэ лъэпощхьэпо хэмылъу зэрыщIэтIысхьэфари.
Курыт школым щIэныгъэ лъабжьэфI щызыгъэтIылъа пщащэр адыгэбзэмрэ литературэмкIэ щIыналъэпсо олимпиадэм щытекIуэри, ди республикэм и еджапIэ нэхъыщхьэм и студенткэ хъуащ. Еджэным къыдэкIуэу, университетым щекIуэкI жылагъуэ гъащIэми жыджэру хэту, студент илъэсхэр купщIафIэу ирихьэкIащ Радимэ. ФIыуэ илъэгъуа IэщIагъэмкIэ щIэныгъэ нэхъыщхьэ зригъэгъуэта нэужь, абы и япэ лэжьыгъэ лъэбакъуэхэр щичащ езыр щеджа, Аргудан жылэм дэт курыт школ №2-м.
Абы лъандэрэ блэкIа зэманым къриубыдэу зэи къэхъуакъым гурэ псэкIэ къыхиха и IэщIагъэм Радимэ щыхущIегъуэжа, щытезэша. КъыгурыIуэрт узыщеджа школым къэбгъэзэжу щIэныгъэ къозыта егъэджакIуэхэм уабгъурыувэу дерсхэр птыным жэуаплыныгъэ хэха зэрыпыщIар. Ар и гуращэу, егъэджакIуэ ныбжьыщIэр дапщэщи хущIэкъуащ абыхэм яхуэфащэу щытыным, и лэжьыгъэри къызыхуэтыншэу зэрырихьэкIыным. Мэшыкъуэм и гъэсэнхэр жыджэру хэтщ районым, республикэм щекIуэкI зэпеуэхэм. Абыхэм увыпIэфIхэр щIэх-щIэхыурэ къыщахь «Си бзэ - си псэ, си дуней» республикэпсо зэпеуэм, зэфIэкI лъагэхэр къыщагъэлъагъуэу.
- Дэтхэнэ егъэджакIуэми и пщэм дапщэщи къалэнышхуэ дэлъщ щIэблэр гъэсэнымкIэ, абы щIэныгъэ егъэгъуэтынымкIэ, арщхьэкIэ анэдэлъхубзэхэр езыгъэджхэм а псоми я лейуэ сабийм бгъэдалъхьэ лъэпкъ хабзэр, щэнхабзэр, нэмысыр, - къыхегъэщ Радимэ. - Ди сабийхэм зэрыадыгэр я гум илъу, абы иригушхуэу, ирипагэу, нэхъыщхьэращи, анэдэлъхубзэр яIурылъу къэгъэтэджыныр лъэпкъпсо мыхьэнэ зиIэ Iуэхуу къызолъытэ. Апхуэдэ гупсысэ зиIэ щIэблэ къызыщIэхъуэ лъэпкъым къэкIуэну дахэ зэриIэнуми шэч къытесхьэркъым.
Егъэджэныгъэ-гъэсэныгъэ лэжьыгъэм щызыIэригъэхьэ ехъулIэныгъэм папщIэ унафэщI щыпкъэм, лэжьыгъэм и къызэгъэпэщакIуэ IэкIуэлъакIуэм, егъэджакIуэ Iэзэм, адыгэбзэр зи псэм хэлъ бзылъхугъэм мызэ-мытIэу къыхуагъэфэщащ КъБР-м ЕгъэджэныгъэмкIэ, щIэныгъэмрэ щIалэгъуалэм я IуэхухэмкIэ, егъэджэныгъэмкIэ щIыналъэ IэнатIэм, жылагъуэ зэгухьэныгъэхэм къабгъэдэкI щIыхь, фIыщIэ тхылъхэр. Ар хъуащ «Илъэсым и егъэджакIуэ нэхъыфI» зэпеуэм и лауреат, щытекIуащ УФ-м и Президентым къыхилъхьа «Егъэджэныгъэ» проектым ипкъ иткIэ екIуэкI къэралпсо зэпеуэм. Абыхэм иджыблагъэ къахэхъуащ ХьэтIохъущокъуэ Къазий и цIэр зезыхьэ Адыгэбзэ Хасэм къыбгъэдэкIа фIыщIэ тхылъыр. Нэхъыщхьэжращи, Мэшыкъуэм зэфIих лэжьыгъэфIхэм къапэкIуащ зыдэлажьэ гупым, еджакIуэхэм, абыхэм я адэ-анэхэм къы-хуащI пщIэмрэ нэмысымрэ.
И ныбжькIэ щIалэми, Радимэ дунейм, гъащIэм и зэхэлъыкIэм хэзыщIыкI цIыху набдзэгубдзаплъэщ. Ар къыбгуроIуэ и къалэмыпэм къыпыкI усэхэм уахэплъа нэужь. Ахэр ятеухуащ цIыхухэм яку дэлъ зэхущытыкIэхэм, цIыхубэпсо лъапIэныгъэхэм, гурыгъу-гурыщIэхэм.
ИлъэсыщIэ дызытехьэмкIэ ди гуапэу дохъуэхъу фIым хуэлажьэ, Iэужь дахэ зиIэ бзылъхугъэ цIыкIум. Узыншагъэ иIэу, и ехъулIэныгъэхэм хигъахъуэ зэпыту, насыпрэ дэрэжэгъуэрэ щымыщIэу псэуну ди гуапэщ.
Радимэ и усэхэм ящыщ зыбжани ди щIэджыкIакIуэ-хэм я пащхьэ нобэ идолъхьэ.
Узохыж сэлам!
Узохыж сэлам, си блэкIа гъащIэ!
Гуауэрэ гукъеуэкIэ гъэнщIа.
Сабиигъуэ IэфIыр сIэщIэзыхыу
Балигъ гъащIэр дыдж къысщызыщIа.
Узохыж сэлам, си блэкIа гъащIэ!
Зеиншэныр натIэ схуэзыщIа.
Гуауэмрэ гухэщIымрэ якъузу
Гур къигъыкIыу сыкъэзыгъэна
Узохыж сэлам, си блэкIа гъащIэ!
ЖэщкIэрэ гъыбзэшхуэ къыщисша.
ГущIэм зыкъигъазэми, сыгуфIэу
ФэрыщIыным сэ сезыгъэса.
Узохыж сэлам, си блэкIа гъащIэ!
ЦIыху пцIыупсыр куэду зыхэта.
Фыгъуэ-ижэм гъуэгу щрагъэгъуэту
МыхъумыщIагъэ гуэрхэр щалэжьа!
Узохыж сэлам, си блэкIа гъащIэ!
ЦIыхуфI куэд цIыхугъэ щысхуэхъуа.
Я гур къабзэу, псэкIэ схуэгумащIэу
Къару мыкIуэщIыж къысхэзылъхьа!
Узохыж сэлам, си блэкIа гъащIэ,
ФIым сыгугъэу, Iейр уэ сщхьэщыпхащ.
Сыныппоплъэ уэ, си къэкIуэн гъащIэ,
Насып защIэу Тхьэм схузэIуиха!
ГъащIэ гъуэгу кIыхь
къызэпыпчами…
ГъащIэ гъуэгу кIыхь къызэпыпчами,
Хъуэпсэгъуэу махуэ хэмыта,
ФIыцIагъэу уи гум щыхэпсами,
Уи гъуэгум тетыр къемыла.
ФэрыщIу цIыху узыхуэгуфIэм,
И щIыб уи фIейр уэ дэплъхьэфащ.
УгуфIэу IэплIэр уэ зэпшэкIым
ХэпIуну сэр Iэм IэщIэлъащ.
ХуиIакъым зыми гущIэгъу ласкIэ,
Нэхъапэ мылъкур ибгъэщащ.
Къозыгъэлъагъум ахъшэ кIапэ,
Уи напэр сомкIэ епщэжащ.
ГъащIэ гъуэгу кIыхь къызэпыпчами,
Кунэфу псори къыщIэкIащ.
Уахуэмыфащэу лъэпкъи жыли,
Къыпщымэхъашэу укъэсащ.
ФIеягъэу гъащIэм щыпщIэфами,
Хуэфэщэн уасэ Тхьэм хуищIащ.
Укъэмылынджу лей зепхьами,
Бэгъуауэ уэ уIущIэжащ
Ахъшэ
Сы гуащIэ мащIэщ уэлъытауэ,
Збгъэдэлъу щытми сэ акъыл.
Сыхуейщ слъагъуну уикIуэтауэ,
АрщхьэкIэ сытыр си Iэмал?
ЩIэныгъэм слъэкIыр хызогъахъуэ,
КъысфIэщIу Iэщэ ар схуэхъун.
ЩIэр блэзмыгъэкIыу зызогъащIэ,
АрщхьэкIэ уэ ар къыптекIуэн?
Ибот утыку зыхуэмыфащэм,
Уэ уи Iэмырым хэт фIэкIын?
Зыгъуэтыр жьантIэр уи IэмалкIэ
ЩыIэн зыгуэр щIэшынэжын.
ЩIэгъэбыдамэ уэркIэ Iуэхур,
Къэхъункъым ар щыбгъунлъэжын,
Зымыгъэхъейри акъылышыхуэ,
Уэ уIэщIэлъмэ, мыкIуэдын.
Къарууэ щыIэм я нэхъ иныр
Зи жыпым изым утекIуэн?
Зи сомыр зи щхьэм елъэпIэкIым
Пэжыгъэ лъэпкъ щумыгъуэтын!!!
Сыхуейкъым…
Сыхуейкъым сиIэну ныбжьэгъу,
Хъужунумэ ар си къуэшэгъу.
Хуей хъумэ къыскъуэувэн,
ЛъэкIынумэ мылъкукIэ сищэн.
Сыхуейкъым сиIэну гъунэгъу,
Схуэхъунумэ ар ныкъуэкъуэгъу.
Гузавэу Iэр хуэсшиямэ,
ФIэфIыну мащэ сихуамэ.
Сыхуейкъым сиIэну Iыхьлы,
ГъащIэм ищIау Iэмалшы.
ЩIитIэну хьэзыру и благъэр,
Илъагъумэ и Iуэхур нэхъ лъагэу.
Сыхуейкъым сиIэну сэ гъащIэ,
СымыщIэу къихьыр си гуащIэ.
ЩысщIынум цIыхур си бий,
Iэпкълъэпкъыр абдеж щредий.