Корель Бергюзар фцIыхурэ?

Бергюзар и адэ Корель Танджу къэралым фIыуэ къыщацIыху актёрщ, нэхъыщхьэращи, адыгэщ.

Тырку актрисэ цIэрыIуэхэм хабжэ пщащэр 1982 гъэм Истамбыл къыщалъхуащ, ауэ и сабиигъуэр щыкIуар Улусэщ. Ди лъэпкъэгъу пщащэм и адэ-анэр творческэ цIыхути, езыри а лъэныкъуэмкIэ еIащ.

Корель зэрыцIыкIурэ Iэзэу волейбол джэгурт. Ауэ IэщIагъэ хуэхъунур къыхихын хуей щыхъум, куэдрэ мыгупсысэу Синан университетым и актёр къудамэм щIэтIысхьащ. Еджэн зэрыщIидзэу, хъыджэбзыр кинофильм кIэщI цIыкIухэм щыджэгун, роль мыинхэр театрым щигъэзэщIэн щIидзащ. Хъыджэбзым и насып кърихьэкIри, Хэнкс Том, Кидман Николь сымэ актёр Iэзагъэм хуезыгъэса Бастон Сьюзан и деж щеджащ.

Актёр IэщIагъэм Корель щыхыхьар «ГъащIэ къута» сериалым щыщыджэгуарщ. Абы къыкIэлъыкIуэу 2005 гъэм ар зыхэта «Ирак: дыгъужьхэм я хуей» кинофильмыр пщащэм дежкIэ тыншу щытакъым. Абы и лIыхъужьыр хьэрыпыбзэкIэ псэлъэн хуейт, Бергюзар бзэр ищIэртэкъым. Ауэ пэлъэщащ икIи а фильмым ехъулIэныгъэ ин къыхуихьащ актрисэм. Абы къыкIэлъыкIуащ етIуанэр, ещанэр… Абыхэм ящыщу нэхъ цIэрыIуэ хъуахэщ: «Зейт къудамэ», «Жэщ 1001-рэ». ЕтIуанэ кинофильмым щыджэгуа иужькIэ «Дыщэ хьэндырабгъуэ» телевизионнэ саугъэтыр къратащ.

2009 гъэм актрисэр щыджэгуащ «Лъагъуныгъэр бгым адэкIэ щыIэкъым» фильмым, 2011 гъэм «ЛIэщIыгъуэ телъыджэ» сериалым хэтащ, Гритти Моникэ и ролыр игъэзащIэу.

Абыхэм яужь Корель кино куэдым зэуэ ирагъэблагъэ. КъыкIэлъыкIуэ илъэситIым «И кIэм намыгъэса уэрэд» сериалым абы къыщегъэщI зи гъащIэ гъуэгуанэр мытынш бзылъхугъэм и образыр. И сабий кIуэдар къигъуэтыжын мурадкIэ жэщырылажьэ клубым уэрэджыIакIуэу мэув. И насыпыр къэзызэуж цIыхубзым лъэпощхьэпо куэд къызэренэкI.

«Корель адэ къуэш» боевикым Бергюзар зи роль щигъэзащIэ хъыджэбзым лIыхъужь нэхъыщхьэ Имирзалыоглу Кенан фIыуэ елъагъу. Я лъагъуныгъэр яхъумэн папщIэ ахэр гугъуехьхэм пэщIоувэ. Актёр къалэныр а фильмым къызэрыщехъулIам къыщымынэу, хъыджэбзыр уэрэд жыIэным зэрыхуэIэзэр наIуэ щохъу. И макъыр зигу ирихьа продюсер Гюрель Айкут контракт ирещIылIэри, абы и уэрэд 12 щызэхуэхьэса альбом 2016 гъэм дунейм къытрагъэхьэ. Къыхэгъэщыпхъэщ а дискхэм къащIиха ахъшэр Бергюзар псапэ Iуэхухэм, сабий зеиншэхэм ядэIэпыкъу фондым хьэлэл зэрахуищIар.

«Дыщэ хьэндырабгъуэ» саугъэтым и закъуэкъым и зэфIэкIым папщIэ адыгэ пщащэм къыхуагъэфэщар. 2008 гъэм актрисэ нэхъыфIу къалъытэри, «Zodiak School» саугъэтыр къратащ. ИлъэсиплI дэкIри, Тырку радиом, телевиденэмрэ печать къыдэкIыгъуэхэмрэ я зэгухьэныгъэм «Илъэсым и актрисэ» цIэ лъапIэр къыхуигъэфэщащ. ИужькIэ «Oscars of Media», «Дыщэ объектив» саугъэтхэр 2013, 2014 гъэхэм пщащэм къратащ.

2016 гъэм «Си хэкур уэращ» фильмым Азизе и ролыр щигъэзэщIащ. Ар теухуащ алыдж зауэлIхэм Измир къалэр зэраубыдам. Фильмым зэрыхэтымкIэ, Азизе и щхьэгъусэр зауэм щыIэщ, алыджхэм яубыда къалэм езымрэ и бынхэмрэ къыдэнащ.

Корель и унагъуэ тепсэлъыхьыну фIэфIкъым. Абы и щхьэгъусэр - актёр цIэрыIуэ Халит Эргенч - хъыджэбзым нэхърэ илъэс 12-кIэ нэхъыжьщ. Ахэр 2006 гъэм зэрыцIыхури, куэд мыщIэу зэрышащ. Зы къуэ яIэщ.

Сабий игъуэта иужькIэ, Корель актёр лэжьыгъэр пIалъэкIэ зэригъэтIылъэкIын хуей хъуащ, унагъуэмрэ сабиймрэ гулъытэ яхуищIыфын папщIэ. Ауэ щыхъукIи, тырку кином хэт актрисэ нэхъ дахи 10-м я бжыгъэм ар сыт щыгъуи хагъэхьэ.

Хъыджэбзыр спортым, къафэхэм дахьэх. Абы ибзыщIыркъым IэфIыкIэкIэ зэрыерэщыр, пщэфIэну зэрыфIэфIыр. «Not just coffe» фIэщыгъэ иIэу Джихангир къыщызэIуиха кафе цIыкIум езым и рецепткIэ ящIа IэфIыкIэхэр щащэ. Апхуэдэ шхапIэ къызэIуихыну актрисэр куэд щIауэ щIэхъуэпсырт. ЗэрыжиIэмкIэ, абы щагъэхьэзырыр езым и унагъуэм щапщэфI шхын къабзэхэм хуэдэщ.

Корель и хъуэпсапIэ нэхъыщхьэхэм ящыщщ езым и театр къызэIуихыу абы щыджэгуныр.

ЩОМАХУЭ Залинэ.
Поделиться: