ЛIыгъэмрэ емыкIумрэ фIызэхэзэрыхьат

«Урысей зэкъуэт» партым и депутат Закускин Александр зи нэгум газ ириутха шэшэн бзылъхугъэм «къысхуэгъэгъу» жриIащ.
Мэзкуу и Мещан районым хыхьэ мэжджытым и гупэм деж шэшэн бзылъхугъэ Юсупхаджиевэ Салимэ нэкулъ ищэу щытт мазаем и I0-м. ЩIигъэкъуаншэри зэригъэкъуаншэри жримыIэу, Закускин Александр нанэм бгъэдыхьэри, абы и хьэпшыпхэр зэрылъ хъуржыным лъапэкIэ еIунщIащ. «Шэшэным уезгъэшэжынщ иджыпсту!» - бзылъхугъэм щIэкIиенуи къыщыгъупщакъым депутатым.
Салимэ и паспортыр кърихащ, «сэри мы къэралым сыщыщщ» жыхуиIэу, ауэ машинэм итIысхьэжа щIалэр абы къемыплъу, газ баллон кърихри, цIыхубзым и нэгум къриутхащ. Нэпсхэр и нэм щIэту, Юсупхаджиевэм къращIар абдежым щытхэм яхуиIуэтащ. И жагъуэ къызэращIам нэмыщI, а махуэм рэджэм мазэм папщIэ нэщI зэриIыгъари, и лъэгуажьэхэр зэрыузри къыхэщырт нанэм и псалъэхэм.
ХэIущIыIу хъуа хъыбарым къыхэIэбащ а парт дыдэм Шэшэн республикэм къыбгъэдэкIыу хэт депутат Делимханов Iэдэм. «Уэ пхуэдэхэрщ «Урысей зэкъуэт» партыр зыгъэулъийр. Сыт хуэдэ лъэпкъым щыщми, сыт хуэдэ дин зэрихьэми, зи ныбжь хэкIуэта цIыхубз сымаджэм апхуэдэу хущытым «бзаджэнаджэкIэ» фIэкIа сызэрыноджэнур сщIэркъым», - ешхыдащ Делимхановыр Закускиным.
Хабзэр зи ужь ихьа Закускиным нэгъуэщI Iуэху мыхъумыщIэхэри къыкъуахащ. «Урысей зэкъуэтым» къыхадзыжын-къыханэн Iуэхур иджыри зэхэкIакъым, ауэ цIыхубзым «къысхуэгъэгъу» зэрыжриIар хэIущIыIу хъуакIэщ.

Чэрим Марианнэ.
Поделиться: