Инвер и усэхэр ягу ирохь

Мы тхыгъэм щывэзгъэцIыхуну сыхуейщ адыгэ усакIуэ, «Урысейм и дыщэ къалэм» Лъэпкъ саугъэтри хыхьэу, дунейпсо литературэ зэпеуэ зыбжанэм хэта Щоджэн Инвер. Абы и тхыгъэхэр иджырей усакIуэ нэхъыфIхэм ейхэм я гъусэу хагъэхьащ Дунейпсо усыгъэм и антологием.
Инвер хэтащ урысейпсо, дунейпсо творческэ проект щIэщыгъуэ зыбжанэм икIи абыхэм я лауреат хъуащ. Апхуэдэхэщ «I2 поэтов» (Ставрополь), «Содружество» (Минск), «Музыка слов» (Москва), «Золотое перо Руси» (Москва), «Король поэтов» (Краснодар), «Дорогой вдохновения» (Белоруссие, Лидэ къалэ) зэхыхьэхэр, «ЛИИФТ» V евразие литературэ фестивалыр (Истамбыл), литературэмрэ гъуазджэхэмкIэ «Русский стиль» дунейпсо фестивалыр (Германие).
Иджыблагъэ Щоджэн Инвер ирагъэблэгъащ Абхъаз республикэм Папаскир Г. П. и цIэр зэрихьэу дэт Лъэпкъ библиотекэм икIи усыгъэр фIыуэ зылъагъухэм папщIэ къызэрагъэпэща «Откровение» пшыхь гукъинэжыр щрагъэкIуэкIащ. УсакIуэм и творчествэм хагъэгъуэзащ щIыналъэм щыпсэухэр, абы и хьэщIэхэр, студентхэр. Пшыхьым Инвер и усэхэм къыщеджащ, абы зыкърезыгъэхьэлIахэм я гукъыдэжыр къиIэту. Япэу Абхъазым кIуа усакIуэ щIалэм щIыналъэр фIэщIэщыгъуэт, и ныбжьэгъу абхъазхэм пщIэшхуэ къыхуащIу зэрырагъэблэгъамрэ зэрагъэхьэщIамри гуапэ щыхъуащ.
Щоджэным и усэ тхылъхэр гъуэгуанэ ущытехьэкIэ къыздэпщтэну уасэ зимыIэщ, теплъэкIи и инагъкIи абы хуэщIащ. Апхуэдэщ «Звезда упала на ладонь», «Откровение», нэгъуэщI и усэ тхылъхэр.

ТЕКIУЖЬ Заретэ.
Поделиться: