Бжыгъэхэм я дерс

Егъэджэныгъэ

Дызэрыт илъэсым мазаем и 14-м щегъэжьауэ гъатхэпэм и 13 пщIондэ «Яндекс» утым «Бжыгъэхэм я дерс» зыфIища урысейпсо егъэджэныгъэ проектыр ирегъэкIуэкI.

Мы гъэм ар зытеухуари зыхуэунэтIауэ щытынури макъамэмрэ IT-Iэмалхэмрэщ. Дерсым и фIэщыгъэми аращ къиIуатэр: «Бжыгъэрылъанэ гъуазджэ: макъамэмрэ IT-Iэмалхэмрэ». Проектыр къыхэзылъхьа IэщIагъэлIхэм зэрыжаIэмкIэ, еджакIуэ цIыкIухэм я пащхьэ иралъхьэну псалъэмакъым къыхэщынущ иджырей технологиехэмкIэ абыхэм яфIэфI макъамэхэр къызэрыхахыр, ахэр къызэрахутэ щIыкIэр, пшыналъэ зэмылIэужьыгъуэр интеллект IэрыщIым и къару хэлъу зэрызэхэплъхьэфынур, нэгъуэщI Iуэхугъуэ куэдри.

«Интеллект IэрыщIым и зэфIэкIхэмрэ лъэкIыныгъэу иIэхэмрэ нэхъыбэ хъуху, цIыхур зэгупсыс, ауэ зи зэфIэхыкIэ-зэблэгъэкIыкIэр мынахуэ Iуэхугъуэхэм ялъэIэс хъунущ. Апхуэдэщ, псалъэм папщIэ, макъамэ индустриер. ДяпэкIэ интеллект IэрыщIым и Iэмалхэр хилъхьэурэ хэти хузэфIэкIынущ зыхуей псынщIагъэмрэ щабагъэмрэ хэлъу фIэфI макъамэ лIэужьыгъуэр къигъэщIын, зыхуей макъамэ Iэмэпсымэхэм я макъыр щIилъхьэн. Абы къищынэмыщIауэ, ежьу щIигъэувэнумэ, цIыхум игу дыхьэ е фIыуэ илъагъу уэрэджыIакIуэм и макъри къигъэсэбэп хъунущ. ГъэщIэгъуэнращи, цIыхум иIэ гукъыдэжым пэджэж, ар къэзыIэт е и гухэщIыр зэтезыуIэфIэ макъамэ лIэужьыгъуэхэри интеллект IэрыщIым кIуэрыкIуэм тету зэхилъхьэфынуи Iэмал хьэлэмэтхэр щыIэщ. Мис а псор зэрызэIуащэ щIыкIэхэмрэ нэгъуэщI бгъэдыхьэкIэ гъэщIэгъуэнхэмрэ дыщытепсэлъыхьынущ «Бжыгъэхэм я дерс» зыфIэтща ди проектым», – жеIэ Урысей Федерацэм Бжыгъэрылъанэ IуэхухэмкIэ и министерствэм къэрал программэхэмрэ проектхэмрэ зэзыгъэуIу и къэрал къулыкъущIапIэм и унафэщI Трубниковэ Татьянэ.

«Яндекс» утым къыхилъхьа проектым ипкъ иткIэ гъатхэпэм и 4-м Нарткъалэ дэт 4-нэ курыт еджапIэм «Бжыгъэхэм я дерсыр» щекIуэкIынущ.

Дерсым видеотеплъэгъуэхэр, теорие зэмылIэужьыгъуэхэр къэзыIуатэ комиксхэр, хъыбарылъэхэр, гъуазэхэр, гупсысэкIэр щIэзыгъэхуабжьэ псалъэзэблэдзхэр, щхьэшытIэхэр (тренажёрхэр), зрагъэщIар къызэрызэщIакъуэж нэрылъагъу Iэмалхэр уэру хэтынущ. Иджыпсту щыщIэдзауэ а еджэныгъэ Iэмэпсымэхэм хэти щыгъуазэ зыщыхуищIыфынущ урокцифры.рф сайтым и напэкIуэцIым. Дерсым сыт хуэдэ зэманми ухыхьэ хъунущ: егъэджакIуэрами адэ-анэрами Iуэхум ухэзыгъэгъуэзэн нэхъыжь уи гъусэу е уи закъуэу.

Сайтым къралъхьэ еджэныгъэ Iэмэпсымэхэр псори зэхэгъэщхьэхукIауэ, сабийхэм я ныбжьым теухуауэ зэхэдзауэ щытынущ. И гъэзэщIэкIэкIэ зэщхьэщыкIыу абыхэм яхэтынущ лэжьыгъэ къызэрыкIуэхэр, гъэгугъуахэр, гугъухэр, гугъу дыдэхэр. Сыт хуэдэ пэублэми ещхьу, япэ дерсым деж еджакIуэм гурагъэIуэнущ макъыр зищIысыр, абы иIэ нэщэнэхэр зыхуэдэр, щыIэ хъуа Iэмалхэмрэ зрагъэгъуэта есэныгъэхэмрэ япкъ иткIэ, макъыр зэрыптхыфыну щIыкIэр.

«Бжыгъэхэм я дерс» зыфIаща Iуэхугъуэр урысейпсо еджэныгъэ проектщ. Абы еджакIуэхэм Iэмал яритынущ иджырей технологиещIэхэр утыку къизыхьэ IуэхущIапIэхэм къабгъэдэкI щIэныгъэр зыхуэдэм зыщагъэгъуэзэну, дунейр мащIэ-мащIэурэ зытехьэ бжыгъэрылъанэ экономикэм и щэхухэм упхыплъыну, гъащIэм узыщыхуэныкъуэну есэныгъэхэр зыIэрыбгъэхьэну. Проектыр «Бжыгъэрылъанэ экономикэм и цIыхухэр» фIэщыгъэр зиIэ къэралпсо программэм ипкъ иткIэ ирагъэкIуэкI, Сбербанкым и псапащIэ фондхэу «Касперскэм и лабораториер», «КъэкIуэнум хуэтщI хэлъхьэныгъэр» жыхуиIэхэр, «Росатом»-р, VK интернет утыр, нэгъуэщIхэри щIэгъэкъуэн хуохъу. Технологие IэмалхэмкIэ проектым и дамэгъущ программэхэр зэхэлъхьэнымкIэ «Алгоритмика» дунейпсо еджапIэр.

Езы «Бжыгъэхэм я дерс» проектыр къызэзыгъэпэщыр «Бжыгъэрылъанэ экономикэ» жылагъуэ зэгухьэныгъэм и жэрдэмкIэ къызэпэща хъуа Iуэхущ, УФ-м ЕгъэджэныгъэмкIэ и министерствэм, УФ-м Бжыгъэрылъанэ зыужьыныгъэмкIэ и министерствэм я жьауэм щIэтщ.