Бэхъунэ Жаннэ Налшык щэнхабзэмрэ гъуазджэмкIэ колледжым дирижёр IэщIагъэм щыхуеджащ, Гнесинхэм я цIэр зезыхьэ урысей академиер продюсер IэщIагъэмкIэ къиухащ диплом плъыжь иIэу. «Zhan Bakhun» продюсер центрым и унафэщIщ. И IуэхущIафэхэмрэ и гъащIэ гъуэгумрэ теухуауэ къыджиIам ди гуапэу фыщыдогъэгъуазэ.
- Гнесынхэм и цIэр зезыхьэ академием ущIэтIысхьэныр, ущеджэныр гугъут?
-УщIэтIысхьэныр гугъут. Ауэ абы нэхърэ нэхъ гугъужыр си унагъуэм саутIыпщынырт. Налшык макъамэмкIэ колледжыр къыщызуха нэужь сыукъуэдият си щIэныгъэм Москва щыпысщэну. Ди унагъуэр хуейтэкъым абы еувэлIэну, псом хуэмыдэу си анэшхуэр. Ауэ сэри сыерыщт, ещанэ класс лъандэрэ абы сыщеджэну быдэу си гум илът. Си дэфтэрхэр щезгъэхьын хуей пIалъэр къыскIэщIикъузэрти, Iуэхур утыку къэсщIыпащ. «Мыр утIыпщын хуейщ. Еджэным хуопабгъэ, дауэ зэрыдубыдынур?!» - жиIат абы щыгъуэм си адэшхуэм. Къэрэндащ къасщтэщ, «зэгурыIуэныгъэ» стхыри, арэзы къэсщIым Iэ трезгъадзэурэ, иужь дыдэу си анэшхуэм щIезгъэдзат.
Зэгуэр си адэм къыдеджа, и ныбжьэгъуу щыта телефонкIэ къэпсэлъауэ, си хъуапсапIэм и гугъу хуищIащ. Ар Подмосковье щыпсэурт. «КъэгъакIуэ, сыдэIэпыкъунущ», - къыжриIащ. ГъэщIэгъуныратэкъэ: илъэс тIощI нэблагъэкIэ зэрымыщIауэ, иджы и телефоныр къигъуэту къэпсэлъэн хуейуэ иухат… Си адэшхуэр диплом плъыжькIэ къэзгъэгугъэри, сежьащ.
- Ещанэ класс лъандэрэ уи хъуэхпсапIэу жыбоIэ академиер…
- Аращ. Ещанэ класс пщIондэ сехъуапсэу щытащ дохутыр сыхъуну. ИтIанэ макъамэ школым сагъэкIуащ. Дезыгъаджэр пианинэ зэреуэм сыдихьэхырти, селъэIуурэ езгъауэрт. Зэгуэр си псэр ихьэхупат. «Сыту дахэу уеуэрэ пианинэм! Дэнэ ущеджар?» щыжысIэм, «Москва Гнесинхэм я цIэр зезыхьэ академием», - къызжиIат. «Сэри абы сыщеджэнущ, ин сыхъумэ»,- изубыдат си гум.
- Москва дауэ къыпIущIа?
-Зи хьэл-щэнкIэ, бзэкIэ, дуней тетыкIэкIэ, динкIэ зэщхьэщыкI цIыху уэрым сахэхуащ. Унэм сызэрыщагъэфIар зыщызгъэгъупщэн хуейт икIэщIыпIэкIэ. Балигъ сыщыхъуащ, си гупсысэмрэ си къарумрэ зэпэслъытыжу зыщезгъэсащ Москва. Ар куэд и уасэ зыгъэунэхужыпIэщ, къапщтэмэ. Уеблэмэ зи щIалэгъуэм чэнджэщ естынт зэгуэр адэ-анэм я жьэгур ябгынэу, езыхэм зыкъагъуэтыжыну. Моуэ, зы мардэ гуэрым иубыдауэ щытщ куэдым я гъащIэр. Псалъэм папщIэ, пщащэр хабзэ гуэрхэм тету, IуэхущIафэ къызэрыгуэкI гуэрхэр ищIэурэ унагъуэ йохьэ. Йохьэри, абдежми нэгъуэщI зы мардэ къыщыпоплъэ. Ар мащIэщ. Псэр лъагапIэ гуэрхэм лъэгъэIэсын хуейщ, ар дахагъэкIэ псыхьа хъун папщIэ.
- ЩIэныгъэ зэбгъэгъуэтри къэбгъэзэжащ. ИтIанэ - щэ?
- Къэзуха нэужьи зыкъомырэ сыщыIащ Москва. Сыкъэнэн гупсысэри сиIащ. Сыщылэжьэну сыхуейт. Ауэ лэжьапIэу сыздэувым мазэ бжыгъэ нэхъыбэ зыщызгъэгувэртэкъым. Иужьым сыщылэжьащ Ногинск театрым, режиссерым и дэIэпыкъуэгъуу. Куэдым зыщыхуэзгъэсащ абы. Сигуми дыхьэрт. Ауэ абыи сыкъыщынакъым. Сэ иджыри зыкъэслъыхъуэжырт, си IуэхущIафэхэм, си псэуныгъэм зыгуэр къахуэтт. А къэтым сылъыхъуэрт.
ПщIыхь гуэр слъэгъуат Москва сыщыIэу… ХьэтIохъущыкъуей хадэм ситт. Зы лIыжь тест. Псыутхым деж теса жэнэт бзу цIыкIур толъэтри, абы гъунэгъу зыхуещI. ЛIыжьыр сэ къызоплъ. Къызоплъри, абы теухуа хъыбар сэ сщIэ хуэдэщ: и щIалэгъуэм ар щIыпIэ жыжьэм щыIат, щеджат. Зыкъысхуегъазэ: «Сэ къэзгъэзэжащ. Къэзмыгъэзэжами, сыщIегъуэжынут. Мыращ сэ си жэнэтыр». И нэр къыстреубыдэ. Сыкъэушри, пщIыхьыр зыщызгъэгъупщэну сыхэтащ. Ауэ зы махуэ гуэрым, зыкъэспхъуатэри, лэжьапIэм сыкъызэрыIукIымкIэ дэфтэр стхащ. Москва сыщызэгъакъым. СыкъызыкIэридзыжауэ жыпIэ хъунущ. Иджыри Москва сыщыIэу, продюсер центр мыбы щызгъэлэжьэну дэфтэрхэр зэзгъэпэщат. Ауэ дэфтэр фIэкIа Iуэху щыпщIэ хъун пэш къудеи сиIэтэкъым. «Усыгъэм - сыхьэтитI» проектыр къызэзгъэпэщащ. Усэ дахэу дыкъеджэу, сыткIи зыхуей хуэзэу дгъэщIэрэщIэжрэ псори зэрыс интернетым щыдгъэлъагъуэмэ дауэ хъуну?! Апхуэдэ гупсысэ си щхьэм къихьати, Котляровэ Марие сечэндээщащ абыкIэ. Сытригъэгушхуащ, цIыху зэхуэшэсынымкIи къыздэIэпыкъуащ. Видео щытетхыну япэ махуэм усэ къеджэну цIыху 40 къэкIуат. Ар куэдыIуэт, ауэ дыкъикIуэтакъым. Тетхащ, интернетым деж «Iэ Iэт» къыщызэIутхащ, дыкъацIыхуащ, ди хъыбарыр зэбгрыкIащ, телевиденэми гулъытэ къытхуищIащ. Ауэрэ, артистхэри къезгъэблагъэурэ къезгъаджэу къэзублащ. Сыт усэ къеджэхэм видео ятехыным мыхьэнэ нэхъ щIеттыр жыпIэмэ, къэнэну сыхуейщи аращ. Iуэху дахэ гуэрым ухэтрэ узэбгрыкIыж мыхъуу, къытебгъэзэжрэ уеплъыжыну Iэмал щыIэмэ нэхъ къэсщтащ.
ИужькIэ, егъэджэныгъэм хуэунэтIауэ зы Iуэху къезгъэжьэну сыхуейти, къурIэн къеджэкIэм хуэгъэсэныр къызэзгъэпэщащ. Иджыпсту инджылызыбзэми щыхудогъаджэ, актер зэфIэкIым щыхудогъасэ «Zhan Bakhun» продюсер центрым.
- «Усыгъэм - сыхьэтитI!» проектым и фIэщыгъэм дауэ укъытеувыIа?
- Республикэм къыщызгъэзэжам ирихьэлIэу «Два часа, ради которых стоит жить» зыфIэсща си тхылъыр Москва къыщыдэкIащ. А тхылъым хэт «сыхьэтитIырщ» проектым и цIэр къызытехъукIар. Тхылъым си махуэрытхэм къистхыкIыжа гупсысэхэр щызэхуэсхьэсащ.
