«Урысей географие зэгухьэныгъэм» ПсыщIагъ къэхутэныгъэхэмкIэ и центрым Шэрэдж щIыналъэм мы махуэхэм еджэныгъэ-узэщIакIуэ лэжьыгъэхэр щрегъэкIуэкI.
КъэхутакIуэхэм зэрыжаIэмкIэ, Шэджанэм, цIыхухэм я нэхъыбэр Гуэл щхъуантIэкIэ зэджэ псы сэрэш гупым, иджыри къэс зыщымыгъуэза нэгъуэщI лъэныкъуэхэмкIэ зыкъигъэлъэгъуащ. Шэджанэжьым, е Цирик-гёль жыхуаIэм, ухыхьэну, псыщIагърыесхэр щыбгъэсэну Iэмал хъарзынэхэр иIэщ. ПсыщIагъ хуэIухущIэхэмкIэ медицинэм и дохутырхэм я нэIэ щIэту псы лъащIэм и къэхутакIуэхэр метрищэ хуэдизкIэ йох. Сэрэшым и щэхухэр ираджыну яIэ псыщIагърызекIуэр нобэр къыздэсым къэхута хъуа куупIэхэм нэс хуиту ехырт. Мызыгъуэгум къэхутакIуэхэр абы фIэкIащ, нэхъапэкIэ ямылъэгъуа бгъуэнщIагъхэм щIыхьащ. «Марвин-350» фIэщыгъэр зезыхьэ псыщIагърызекIуэм метр 279-кIэ ехыну хузэфIэкIащ.
Зэрынэрылъагъущи, къэхутэныгъэхэм кIуэ пэтми заубгъу, къызэщIаубыдэ лэжьыгъэхэр нэхъыбэ мэхъу. Псалъэм и хьэтыркIэ, псыщIагъ дунейм мардэ щхьэхуэхэр къегъэув - псыщхьэм къытенамрэ лъащIэм ехамрэ я зэпыщIэныгъэхэр нэхъ шэщIа щIыныр, сурэтхэмрэ видеотеплъэгъуэхэмрэ кIагъэпшагъэ мыхъуу къабзэу техыныр, щыщIэныгъэ имыIэу ар программэм илъхьэныр, псыщIагърызекIуэ Iэмэпсымэм и кIуэцIым ит давленэр зэтесу къэгъэнэныр.
КъызэрахутамкIэ, Шэджанэжьыр зэрыт псылъанэм зы жэщ-махуэм и кIуэцIкIэ псы литр мелуан 70-м нэблагъэ къыхож. Абы къэхутакIуэхэр иригъэгупсысащ Iуэхугъуэ гъэщIэгъуэным: гуэлым псыр из зыщIыр зы къэкIуапIэкъым, атIэ щIы щхьэфэ чахуэхэм къыдэкI щIагъыпсхэрщ. Абы нэгъуэщI зы Iуэхуми ухуешэж – сэрэш гупыр Шэрэджыкъуэм къыдэхъуа къэгъэщIыгъэщ.
