ЩIэблэм щапхъэ дахэ яхуэхъуу

Балъкъэрыщхьэ дэт, Абей Мысост и цIэр зезыхьэ курыт еджапIэ №2-м иджыблагъэ щекIуэкIащ сабийхэм гукъинэж ящыхъуа зэIущIэ гъэщIэгъуэн. Урысей Федерацэм ЩIалэгъуалэ IуэхухэмкIэ и къэрал къулыкъущIапIэм къыхилъхьауэ иригъэкIуэкI «Зэхуэдэхэр зопсэлъылIэ» урысейпсо проектым ипкъ иткIэ Шэрэдж щIыналъэм еблэгъащ КъБР-м узыншагъэр хъумэнымкIэ и министр Къалэбатэ Рустам.

Фигу къэдгъэкIыжынщи, къэрал къулыкъущIэхэр курыт щIэныгъэ щызрагъэгъуэт IуэхущIапIэхэм кIуэурэ я щапхъэхэмкIэ иджырей Урысейм куэд зэрыщыпхузэфIэкIынур щIалэгъуалэм я фIэщ щIыным, сыт хуэдэ щIыналъэ ущымыпсэуми, къыхэпх IэнатIэм узэрыщефIэкIуэнумкIэ Iэмал зэрыщыIэр къызыхэщ псалъэмакъ купщIафIэхэр драгъэкIуэкI.

Къалэбатэ Рустам еджакIуэхэр темыпыIэжу жыпIэну къыпэплъэрт. ИкIи зэхуэсыр хьэлэмэту, цIыкIухэр куэдым щIэупщIэу екIуэкIащ. НыбжьыщIэ цIыкIухэм яфIэгъэщIэгъуэнт дунейр иубыдауэ зэман кIыхькIэ зыIыгъ узыфэм кIэ щигъуэтынур, ар щIытщхьэщымыкIымрэ зэрызыщыпхъумэн хуей щIыкIэхэмрэ, и хущхъуэгъуэр зыхэлъыр, нэгъуэщI куэди. Министрым Iэмал зэриIэкIэ сабийхэм я упщ1эхэм жэуап яритащ икIи тригъэчыныхьурэ яжриIащ: «Дэтхэнэ цIыхуми и узыншагъэр и Iэм илъыжщ. Ар щыгъэтауэ, къэзыухъурехь цIыхухэм, зыхэт гупхэм я узыншагъэри зыкъомкIэ абы елъытауэ щытщ. Абы къыхэкIыу цIыхум зэран къыхуэхъуну Iуэхугъуэхэм защидзейуэ, къабзагъэр и нэрыгъыу цIыкIу щIыкIэ хьэлу зыхилъхьэу абы тетын хуейщ. Хэти къыгурыIуапхъэщ вирусым щIэмычэу зэрызихъуэжыр, штаммыщIэхэр къызэрежьэр. Зы вирусым и хьэл-щэныр къахутэхункIэ, адрейр дохутырхэр зыпэмыплъа нэгъуэщI сымэджагъэкIэ Iэпкълъэпкъым йогуауэ. Абыхэм зэрызащыпхъумэфынур вакцинэм и закъуэщ. Вакцинэр нэхъыбэм зыхрагъэлъхьэху, жылагъуэми узым зэрыпэщIэтын иммунитет зрегъэгъуэт».

Псоми яфIэгъэщ1эгъуэнт Къалэбатэ Рустам къикIуа гъуэгуанэр, абы дохутыр IэщIагъэр къыщIыхихар. Министрми цIыкIухэм яжриIащ иджыри студенту, махуэкIэ еджэрэ езым и жэрдэмкIэ пщыхьэщхьэм сымаджэщым кIуэрэ санитару лажьэу IэнатIэм зэрыпэрыувар. ЗэрыхущIемыгъуэжари къыхигъэщащ. «ЦIыхур зыхуейр къыщехъулIэнур абы ерыщу телажьэмэщ. Гуращэм и закъуэкъым, къалэн зыщыпщIыжыфу щытын хуейщ Iуэхугъуэ гуэрхэр, узыщIэхъуэпсыр къыбдэхъун папщIэ. Ауэ хъуэпсапIэм и закъуэкъым мыхьэнэ зиIэр. ЦIыхур зыхэтым яхэзэгъэн, и лэжьэгъухэм гуапэу яхущытын хуейщ. ЦIыху зэгъым и гъуэгум телъ лъэпощхьэпохэр куэдкIэ нэхъ мащIэщ къайгъэшым ейм нэхърэ. Ар зыщывмыгъэгъупщэ», – еущиящ министрыр ныбжьыщIэхэм.

Къалэбатэм псалъэ гуапэхэр хужи1ащ Шэрэдж щIыналъэм. «Сэ куэдрэ IэфIу сигу къызогъэкIыж мы щIыналъэр. Илъэс IэджэкIэ мыбы сыщылэжьащ, цIыху куэди нэIуасэ щысхуэхъуащ. ЦIыхугъэрэ гуапагъыу мыбдеж щыслъэгъуар гъащIэ гъуэмылэ зэрысхуэхъум шэч хэлъкъым», - жиIащ Къалэбатэ Рустам.

Министрыр цIыкIухэм гуапэу, езым зрилъытущ зэрепсэлъылIар. ГъащIэ гъуэгуанэ гъэщIэгъуэн къызэпызыча цIыхур езыр зэрыкъуажэдэсыр, япэ щIэныгъэр къуажэ еджапIэм къызэрыщIихар сабийхэм я гум зыпхидзащ. иужькIэ цIыкIухэм зэрыжаIамкIэ, а щапхъэм абыхэм фIэщхъуныгъэ къахилъхьащ министрым къикIуа гъуэгур якIужыфынымкIэ.

ШУРДЫМ Динэ.
Поделиться: