Лъы хуэныкъуэхэм ядоIэпыкъу

УФ-м и Лъэпкъ гвардием и къудамэу КъБР-м щыIэм дзэ къулыкъур щезыхьэкIхэм даIыгъащ «И гъащIэр ихъумэнымкIэ дэIэпыкъу!» акцэр икIи лъы ятащ абы хуэныкъуэхэм папщIэ.

Лъы ятын ипэкIэ абыхэм дохутыр къеплъащ. Медикхэм зэрыжаIащи, а IуэхущIапIэм и лIыкIуэхэр сыт щыгъуи жыджэру къыхохьэ сымаджэхэм зыщIэгъэкъуэн къыхуеджэныгъэм. Апхуэдэ Iуэхум и фIыгъэкIэ лъыхэкI гъэтIылъыгъэ яIэ мэхъу.

- Ди гуапэу дыхэтащ а Iуэху щхьэпэм, псапэ зыпылъ IуэхуфIыр дэтIыгъащ. Донор дэIэпыкъуныгъэр щIэх-щIэхыурэ зыхуейщ, куэдым къагурымыIуэми, - къыхигъэщащ Урысей гвардием и щIыналъэ управленэм къулыкъу щызыщIэ сержант Атмурзаев ТIэхьир.