«ПщIэ зыхуэсщI ныбжьэгъухэ!
Ди къэралым егъэлъапIэ Кърымыр Урысейм къызэрыгухьэжрэ илъэси 8 зэрырикъур.
Лъэпкъ зэмылIэужьыгъуэ куэд щыпсэу ди къэралым дежкIэ а тхыдэ къэхъукъащIэм ипэжыпIэкIэ мыхьэнэшхуэ иIэщ, Кърым, Севастополь Республикэхэм я цIыхухэм я гъащIэм зэхъуэкIыныгъэшхуэхэр щигъуэта лъэхъэнэщ ар.
Сигуми си псэми къабгъэдэкIыу мыхьэнэшхуэ зиIэ махуэмкIэ сохъуэхъу щIыналъэхэм я УнафэщIхэу Аксенов Сергейрэ Развожаев Михаилрэ, Кърымымрэ ди къэралымрэ я цIыхухэм.
Нобэ хытIыгуныкъуэм социально-экономикэ, щэнхабзэ зыужьыныгъэ я лъэныкъуэкIэ щытыкIэ псори къыщызэгъэпэщащ, щIыналъэхэм я экономикэ зэфIэкIыр щIэгъэбыдэным, социальнэ, транспорт, инженер, туризм IуэхущIапIэхэр егъэфIэкIуэным, цIыхухэм я псэукIэр адэкIи нэхъ зэIузэпэщ щIыным хуэунэтIа къэрал программэ лъэщхэр щагъэзащIэ.
Псом нэхърэ нэхъыщхьэращи, Кърымым щыпсэухэм Iэмал яIэ хъуащ мамырыгъэрэ фIыгъуэрэ щытепщэ щIыпIэм езыхэми я щIэблэми я къэкIуэнур щаухуэну.
Ди жагъуэ зэрыхъунщи, апхуэдэу пхужыIэну-къым, а зэманым, илъэси 8 ипэкIэ, абыхэм ящIыгъуу Донецкэ, Луганскэ цIыхубэ республикэхэр къызэгъэпэщыным и телъхьэу Iэ зыIэтауэ щыта Донбасс и цIыхухэм щхьэкIэ. Ауэ а илъэсхэм республикитIри блокадэм хэтащ, абыхэм я цIыхухэм Украинэм и унафэр зыщIхэм зэрахьа хьэкIэкхъуэкIагъэ псори я фэм дэкIащ. Я щIыналъэм щыпсэужыну, я бзэкIэ псэлъэну яIэ хъуэпсапIэ къызэрыгуэкIхэм, я щэнхабзэмрэ хабзэмрэ хуаIэ лъагъуныгъэм папщIэ ахэр ягъэкIуэдынкIэ шынагъуэ яIэу псэуащ.
Урысейр хущIэкъуащ Донбасс щыIэ щытыкIэ хьэлъэм мамыр политикэр зи лъабжьэ IэмалхэмкIэ зэхъуэкIыныгъэхэр хилъхьэну. Ауэ мамырыгъэм и телъхьэ цIыхухэр укIыныр, сабийхэм, бзылъхугъэхэм, жьыкIэфэкIэм лей якIэлъызехьэныр зы махуи зэпыуакъым. КъищынэмыщIауэ, иужьрей зэманхэм Украинэм жыджэру зигъэхьэзырырт Донбасс зауэ къыщигъэхъеину. Нэгум къыщIэгъэхьэгъуейщ цIыхубэ республикэхэмрэ Урысей Федерацэм и щIыналъэу абы и гъунэгъухэмрэ щыпсэухэм абы къахуихьынкIэ хъуну щытар.
ГурыIуэгъуэ хъуащ ди къэралым и шынагъуэншагъэр къагъэтIэсхъэн, абы къытегушхуэн папщIэ Украинэр зауэ операцэхэр щекIуэкI щIыпIэу къэгъэсэбэпыным хущIэкъу США-мрэ НАТО-мрэ а псор къазэрыбгъэдэкIыр. Урысейр, ди цIыхухэр хъумэныр, Донбасс щыпсэухэм иращIылIэ лъэпкъгъэкIуэдыр къызэпыудыныр Iэмал зимыIэ щытыкIэм зэрыхуэкIуарщ УФ-м и Президент Путин Влади- мир Украинэм и националистхэр гъэкIуэдыным, зауэм зэрызыхуагъэхьэзыра Iэщэхэмрэ техникэмрэ зэтекъутэным теухуауэ къыхилъхьа Iуэхугъуэ щхьэхуэхэр къызыхэкIар.
Дэ дыдоIыгъ Урысейм IэщэкIэ ЗэщIэузэда и Къарухэм къыхуагъэува къалэнхэр зэфIахынымкIэ ягъэзащIэ Iуэхухэр. Ди армэм нобэ ихъумэр Донбасс щыпсэухэм я закъуэкъым, ар и щхьэщыжакIуэщ Украинэм и цIыху мамырхэми. Сэ шэч къытесхьэркъым, Украинэм тепщэныгъэр щызыIыгъхэм ирагъэжьа террор Iуэхугъуэ шынагъуэхэр зэрыщыту къызэрызэпаудынум», - щитхащ КъБР-м и Iэтащхьэ КIуэкIуэ Казбек и Telegram-каналым.