Къэрал мылъкур ирагъэпшыныж

 КъБР-м щыIэ УФСБ-мрэ МВД-мрэ я лэжьакIуэхэм къыщIагъэщащ Урысейм УхуэныгъэмкIэ и министерствэм лэжьыгъэр зэрекIуэкIым кIэлъыплъыныгъэмкIэ и центрым щIыналъэ объектхэм зи нэIэ тетын хуей и IэщIагъэлIым хабзэр къызэпиудауэ. 
«Экология» лъэпкъ программэм ипкъ иткIэ муниципальнэ щIыналъэхэм иращIылIа зэгурыIуэныгъэхэм къыщыгъэлъэгъуахэр щагъэзащIэм ар хабзэм ебэкъуащ, дэфтэрхэр езым и фейдэ зыхэлъым хуэдэу къигъэсэбэпащ.
КъБР-м и Шэджэм район судым 2022 гъэм мазаем и 1-м ар къуаншэу къилъытащ икIи хуагъэуващ мазиблкIэ еубыдылIауэ лэжьэну икIи а пIалъэм къриубыдэу къыIэрыхьэ хэхъуэм и проценти 10-р къэрал бюджетым хилъхьэжыну. 

Наркотикым фIым ухуишэркъым

НаркотикхэкIхэр зэуIуу игъэкIыным пэщIэт Iуэхухэр щрагъэкIуэкIым ШынагъуэншагъэмкIэ къэрал къулыкъущIапIэм и управленэмрэ КъБР-м щыIэ МВД-мрэ я лэжьакIуэхэм яубыдащ мызэ-мытIэу суд зытращIыхьа, Урысей Федерацэм щыщ цIыхухъур. Ар ягъэкъуаншэ наркотикхэкIхэр КъБР-м и щIыналъэм къишэнымрэ щигъэкIынымрэ хэпщIауэ. 
Ар къыщащым икIи ар къыщыхъуа щIыпIэр щызэпаплъыхьым къыкъуахащ «героин» наркотикхэкI кг 0,043-рэ зэрылъ зэкIуэцIышыхьа, пIалъэкIэ щыпсэур къыщащым - «метадон» наркотикхэкI кг 0,025-рэ ахэр зэ зэхьэлIэгъуэурэ зэрагуэш, зэрызэкIуэцIашыхь икIи ящэным зэрыхуагъэхьэзыр Iэмэпсымэрэ къагъуэтащ. 
Шэч зыхуащIым теухуа уголовнэ Iуэху къаIэтащ УФ-м и УК-м и 228-нэ статьям и 2-нэ Iыхьэм ипкъ иткIэ. 
 
 

ДЫГУЛЫБГЪУ Жантинэ.
Поделиться: