Ди кIэн къыщикIащ

Туризм

«Видеогъэлъэгъуэныгъэ нэхъыфI дыдэр зыгъэхьэзырам» саугъэтыр къахьауэ, туризм хуэIухуэщIэхэмкIэ урысейпсо операторым зэгурыIуэныгъэ иращIылIауэ, къэралым щылажьэ туризм IуэхущIапIэхэм яхуиIэ пыщIэныгъэхэр ягъэбыдауэ икIи къагъэщIэрэщIэжауэ къэкIуэжащ «Адыгэ псалъэм» и къыдэкIыгъуэхэм языхэзым зи гугъу щытщIа, ди щIыналъэм икIыу Туризмэм и XXVIII Дунейпсо гъэлъэгъуэныгъэм (MITT-2022) хэтахэр.

Фигу къэдгъэкIыжынщи, «Крокус Экспо» зи фIэщыгъэ гъэлъэгъуапIэ нэхъ ин дыдэм щекIуэкIа зэIущIэм хэтащ Урысейм и щIыналъэ 60-м щIигъум я лIыкIуэхэр. Дунейм щекIуэкI гугъуехьхэм щхьэкIэ къэмынэу, гъэлъэгъуэныгъэм кърихьэлIащ Азербайджаным, Армением, Белоруссием, Венесуэлэм, Мысырым, Индием, Къэзахъстаным, Къыргъызым, Чынтым, Таджикистаным, Таиландым, Тыркум, Узбекистаным, Филиппинхэм къикIа гупхэр. НэхъапэкIэ щыIа мыпхуэдэ Iуэхугъуэхэм хэмытауэ мы гъэм япэу я плIанэпэхэр ягъэлъэгъуащ Алжирым, Индонезием, Кением къикIа туризм IуэхущIапIэхэм.

Ди республикэр дунейпсо мыхьэнэ зиIэ гъэлъэгъуэныгъэ куэдым хэтщ, абы пыщIа хуэIухуэщIэхэр къызэзыгъэпэщу утыку изыхьэри Курортхэмрэ туризмэмкIэ министерствэрщ. Мы гъэм ди щIыпIэм икIа гупым я пашэу щытар министр ЩоджэнцIыкIу Муратщ. Къэбэрдей-Балъкъэрым туризмэм епха и IуэхущIапIэхэм ящыщу гъэлъэгъуэныгъэм хэтащ «Эльбрус тур», «ЗыплъыхьакIуэ» туроператорхэр, «Хыбзу» зыгъэпсэхупIэр, «Кавказым и хъуреягъкIэ» турист IуэхущIапIэр, «Ипщэ-вояж», «OFF-ROAD» клубхэр, «Урысей географие зэгухьэныгъэм» туризмэмрэ лъахэхутэмкIэ и «Альтаир» щIалэгъуалэ хасэр. Къыхэгъэщын хуейщ нон-стоп жыпхъэм иту дэтхэнэ зыми я лэжьыгъэм теухуауэ махуищкIэ зэпымыууэ зэпсэлъэныгъэхэр зэрырагъэкIуэкIар, ди щIыналъэм туризмэмкIэ, узыншагъэр зэфIэгъэувэжынымкIэ цIыхухэм хуащIэ Iуэхутхьэбзэхэр дунейпсо мардэхэм зыкIи къакIэрымыхуу я 1уэхур къызэрыщызэрагъэпэщыр.

КъБР-м гъэлъэгъуэныгъэм и утыкум ирилъхьэ плIанэпэр илъэс зыбжанэ хъуауэ MITT-м и хабзэм тету егъэпс. Псалъэм папщIэ, гупыр къызэрацIыхужын, адрей гъэлъэгъуэныгъэхэм къахэзыгъэщын дамыгъэ иIэн хуейщ. КъБР-м абы и IуэхукIэ зэфIэувауэ, занщIэу къахэщу бренд жыпхъэм ит сурэт илъэс зыбжанэ хъуауэ зэрехьэ: Iуащхьэмахуэ и теплъэмрэ и лъагагъыр къигъэлъагъуэу абы и щыгум щыджэгу бжыгъэмрэ (5642). Дахэу зэхэгъэзэгъа дамыгъэм лей зыри зэрыхэмытыр, гум иубыдэгъуафIэу, туризм хуэIухуэщIэхэр къыздикI щIыналъэри зэуэ къыхэщу зэрыгъэпсар куэдым гу зылъатэ щапхъэу щытщ.

Гъэлъэгъуэныгъэм и кIуэцIкIэ КъБР-м Курортхэмрэ туризмэмкIэ и министерствэм Урысейпсо туризмэмкIэ «ANEX TOUR» IуэхущIапIэм зэгурыIуэныгъэ ирищIылIащ. «Мыгъэрей гъэлъэгъуэныгъэм ди кIэн къыщикIауэ жыпIэ хъунущ. Урысейпсо туризмэмкIэ «ANEX TOUR» IуэхущIапIэм зэгурыIуэныгъэ етщIылIэну Iэмал дгъуэтащ. Абы дыщогуфIыкI, сыт щхьэкIэ жыпIэмэ ар хуэгъэзауэ щытынущ ди щIыналъэм спортымрэ туризмэмрэ зыщегъэужьыным, ди щIыналъэм зыгъэпсэхуакIуэ нэхъыбэ къешэлIэным, зэрыкъэралу хэIущIыIу щыхъун, щIэупщIэ зыгъуэтын, бренд жыпхъэм иувэн зылъэкIын турист щIыпIэхэр гъэбелджылыным», – жиIащ ЩоджэнцIыкIу Мурат.

Гъэлъэгъуэныгъэм щIыналъэхэм я туризм лъэкIыныгъэр къызыхэщ видеотеплъэгъуэхэм я зэхьэзэхуэ екIуэкIами ди щIыналъэр щытекIуащ. Япэ увыпIэр къэзыхьа Къумыкъу Мухьэмэд и видеогъэлъэгъуэныгъэм, «Къэбэрдей-Балъкъэрым гури псэри ехьэху!» зыфIищам, имытхьэкъуарэ гурыхь зыщымыхъуарэ ар зылъэгъуахэм къахэкIакъым. Ди щIыналъэм и гущIыIум бгъэ хуарзэм хуэдэу укъригъэувэу и дахагъымрэ и къабзагъымрэ уригъэплъу теплъэгъуэхэр видеом щызэкIэлъыгъэкIуат. Зэхьэзэхуэм кърикIуахэр хэIущIыIу щащIыж гъэфIэж утыкум текIуэныгъэр къызэрихьамкIэ ди щIыналъэм икIа гупым къехъуэхъуу фIыщIэгуапэ тхылъыр ЩоджэнцIыкIу Мурат къритащ гъэлъэгъуэныгъэм и къызэгъэпэщакIуэ Чернышов Артём.

MITT-2022 гъэлъэгъуэныгъэр туризм политикэм и утыкущ. Мы гъэм абы щекIуэкIынущ къэралым, щIыналъэхэм, хэгъэгухэм я туризмэм зэрызиужьым, бжыгъэрылъанэ технологиехэр IэнатIэм зэрыхэлъхьапхъэм, хьэрычэтыщIэхэм я Iуэхум зэрызегъэубгъупхъэм теухуа Iуэхугъуэхэм хэлъ зэIумыбзхэр щаубзыху щIэныгъэ зэхуэсхэр. УФ-м ТуризмэмкIэ и къулыкъущIапIэм и нэIэ щIэту екIуэкIа мы гъэлъэгъуэныгъэм щIыналъэхэм я зэфIэкIыр нэхъыбэ зэрищIым, дунейпсо утыкум зэрыришэм, зыплъыхьакIуэхэмрэ зыгъэпсэхуакIуэхэмрэ я бжыгъэм зэрыхигъахъуэм къищынэмыщIауэ, лэжьапIэ IэнатIэщIэхэри къызэIупхыну Iэмал къызэритым и пщIэр нэхъ ину еIэт, щIэупщIэ иIэу ещI.