Лъэпкъ фащэхэр зи пщIыхь

Мы тхыгъэр зытеухуар дизайнер, декоративно-прикладной гъуазджэмкIэ IэщIагъэфI зиIэ, адыгэ цIыхубз, цIыхухъу фащэхэр зыд Къущхьэ (ДыщэкI) Радимэщ. Ар ящыщщ КъБР-м и Iэтащхьэу щыта, политик цIэрыIуэ, УФ-м и Федеральнэ Зэхуэсым ФедерацэмкIэ и Советым Къэбэрдей-Балъкъэр Республикэм къыбгъэдэкIыу сенатору щыIэ, ФедерацэмкIэ Советым Хамэ къэрал IуэхухэмкIэ и комитетым и Iэтащхьэм и къуэдзэ, ЩIДАА-м и президент  Къанокъуэ Арсен етIуанэу къыхилъхьа «StartUp 5642» зэпеуэм щытекIуахэм.

Шэджэм районым хыхьэ Лашынкъей къуажэм щыщ пщащэм зэрыцIыкIурэ IэпэIэсагъ далъагъурт. Зэрыджэгу гуащэхэм я фэилъхьэгъуэхэр зыдыж хъыджэбз цIыкIум и гъащIэр а лэжьыгъэм зэрырипхыныр гурыIуэгъуэт. АбыкIэ щапхъэ хуэхъуар, и IэщIагъэкIэ егъэджакIуэми, дэрбзэр Iэзэ, махуэшхуэхэм фэилъхьэгъуэ дахэхэр хуэзыгъэхьэзыр и анэрщ. «Зылъагъу ещIэж», - жыхуиIэращи, анэм и лэжьэкIэм гупсэхуу кIэлъыплъ хъыджэбзым абыхэм «къытригъэзэжырт». Радимэ курыт еджапIэм и класс нэхъыжьхэм щыщIэсым зыхэта «Кавказ пшэплъхэр», «Амикс» къэфакIуэ ансамблхэм я гъусэу ди щIыналъэми хамэ къэралхэми концертхэр щатыну куэдрэ къахуихуащ. Абы щыгъуэм адыгэ фащэм и дахагъэм итхьэкъупат пщащэр.  

…20I3 гъэм Къущхьэм «Мэшыкъуэ» щIалэгъуалэ зэхуэсым япэ грантыр къыщихьащ. И япэ дизайнер лэжьыгъэ гъэщIэгъуэнхэр къыщехъулIар КъБКъУ-м декоративно-прикладной гъузаджэмрэ цIыхубэ IэпщIэлъэпщIагъэхэмкIэ и факультетым щыщIэса зэманырщ. Абы щыгъуэми Радимэ и проектыр зытриухуар лъэпкъ фащэхэр къэгъэщIэрэщIэжынырт. Мыгувэу пщащэм къызэIуихащ и IуэхущIапIэрэ  хьэгъуэлIыгъуэ фащэхэм я тыкуэнрэ.

Иджырей щIалэгъуалэм гуфIэгъуэ зэхыхьэхэр, хьэгъуэлIыгъуэхэр зэрагъэдахэ фэилъхьэгъуэхэр къэгъэщIэрэщIэжыным теухуауэ Радимэ иIа хъуэпсапIэхэр зригъэхъулIэнымкIэ а проектыр IэмалыфIт.

- Лъэпкъ фэилъхьэгъуэхэр си лэжьыгъэ къудейкъым, атIэ икIи си пщIыхьщ. Къанокъуэ Арсен и «StartUp 5642» проектым и фIыгъэкIэ къызэхъулIащ гум щызгъафIэ си хъуэпсапIэр - лъэпкъ фащэхэр къыщызгъэщIэрэщIэжыну, ахэр пIалъэкIэ щыстыну IуэхущIапIэ  къызэIусхыныр, - жеIэ Радимэ. – Бзылъхугъэ фащэхэм нэхъ сыдахьэхми, си мурадщ цIыхухъу лъэпкъ фащэхэми, махуэ къэс зэрахьэ фэилъхьэгъуэхэми селэжьыну. Япэм щэкIхэр гъуэтыгъуейуэ щытамэ, иджы ахэри фащэхэр зэрыбгъэдахэ цIугъэнэхэри пэрыхьэтщ, тхыпхъэхэм, фэилъхьэгъуэхэм я щIыкIэм заужь, я пкъыр къэнэжу.

Къущхьэ Радимэ жыджэру зыкъыщегъэлъагъуэ а IэщIагъэ дахэм щIэблэр хэгъэгъуэзэным ехьэлIа проектхэм, IэпэIэсагъэм, дыщэидэм, уагъэм теухуа мастер-классхэм хэтщ. Мы IэщIагъэм дихьэххэр апхуэдэ дерсхэм куэду къокIуалIэ, ныбжьыщIэхэм щIэщыгъуэ ящохъу. Пандемием къыхэкIыу а Iуэхугъуэр тIэкIу Iэпэдэгъэлэл ящIами, мыгувэу пащэжыну я мурадщ.

- Дэрбзэр IэщIагъэм, IэпэIэсагъэм яIэ щIэупщIэм зэрыхэхъуэм гу лъыботэ. Пасэм дэтхэнэ зы пщащэри абы щIапIыкIыу къекIуэкIащ, иужькIэ ар IэщIыб ящIами. Я цIыкIущхьэм щегъэжьауэ хъыджэбзхэр  мастэ-Iуданэр зэраIыгъыным хуагъасэрт, шыIэ, Iэпэ щабагъэ, хьэл-щэн дахэ яхэлъу къэхъунымкIэ щхьэпэу къалъытэрти. Иджы ахэм ехьэлIауэ гупжьей куэд мэлажьэ, дыщэидэм теухуауэ къызэрагъэпэщ мастер-классхэм я бжыгъэми абы екIуалIэхэми къахэхъуэ зэпытщ. Дауи, ар кърикIуащ лъэпкъ фащэхэр къызэрагъэщIэрэщIэжым, - жеIэ Радимэ. - Гуапэщ иджырей хьэгъуэлIыгъуэхэм лъэпкъ куэдым къащта ди лъэпкъ фэилъхьэгъуэхэм гулъытэ ин щыхуащI зэрыхъуар. ЩIалэгъуалэм фащэм я гупэр зэрыхуагъэзэжам и фIыгъэщ и пщIэр зэригъуэтыжыр.

КъызэрыщIэкIымкIэ, лъэпкъ фащэхэм я Iэщхьэхэм, фэилъхьэгъуэхэр  зэрагъэдахэ тхыпхъэхэм ар зезыхьэ пщащэм теухуа куэд «къыпхуаIуатэрт». Къэбгъэлъагъуэмэ, тхыпхъэ хэха зэрахьэрт хъыджэбз дэсхэм, унагъуэ ихьахэм, анэхэм. Адыгэ цIыхубз лъэпкъ фэилъхьэгъуэхэр ди тхыдэм и къекIуэкIыкIам ухэзыгъэгъуазэу жыпIэ хъунущ. Иджы къагъэщIэрэщIэж фащэхэм къыщагъэсэбэп тхыпхъэхэм абы и лъэныкъуэкIэ зэхъуэкIыныгъэхэр ягъуэтащ икIи фэилъхьэгъуэхэр ирагъэдахэ мыхъумэ, нэгъуэщI мыхьэнэ яIэжкъым.

Лъэпкъым къыддекIуэкI щэнхабзэмрэ гъуазджэмрэ я лъабжьэр хъума хъуным хэлъхьэныгъэ хуэзыщI Къущхьэ Радимэ дэтхэнэри къыхуреджэ махуэшхуэхэм адыгэ фащэ зэрахьэну, къагъэщIэрэщIэжами щIэуэ ирагъэдами, зы фэилъхьэгъуэ зэрагъэпэщыну.

 

 

 

Тхыгъэри сурэтхэри ТЕКIУЖЬ Заретэ ейщ.
Поделиться: