Лъэбакъуэ минипщI

Узыншагъэм и дунейпсо махуэм Налшык щекIуэкIащ «Узыншагъэм ухуэзышэ лъэбакъуэ 10000» Iуэхугъуэр. Ар хуэгъэзащ цIыхухэр я щытыкIэм кIэлъыплъыжыным гулъытэ хуегъэщIыным.

Iуэху щхьэпэр къызэрагъэпэщащ «Лига здоровья нации» урысей жылагъуэ зэгухьэныгъэм и щIыналъэ къудамэм, КъБР-м Узыншагъэр хъумэнымкIэ и министерствэм, КъБКъУ-м и медицинэ факультетым, Налшык къалэ администрацэм, «Капитал МС» ООО-м и хэгъэгу филиалым.

Зэхыхьэм хэтащ КъБР-м и Парламентым и УнафэщI Егоровэ Татьянэ, депутатхэр, жылагъуэ зэгухьэныгъэхэмрэ партхэмрэ я лIыкIуэхэр, щIыналъэм и медицинэ IуэхущIапIэхэм я лэжьакIуэ 200-м щIигъу, волонтёрхэр, Налшык къалэ щыпсэухэмрэ абы и хьэщIэхэмрэ, нэгъуэщIхэри.

Дакъикъэ зыбжанэкIэ я Iэпкълъэпкъым зрагъэукъуэдийри, марафоным хэтхэр ирашэжьащ КъБР-м узыншагъэр хъумэнымкIэ и министр Къалэбатэ Рустамрэ Суд-медицинэ экспертизэмкIэ бюром и унафэщI Мечукаев Алихъанрэ. Абыхэм ХьэтIохъущокъуэм и жыг хадэм и дыхьэпIэ нэхъыщхьэм къыщыщIадзэри, Курзалым нэс лъэсу кIуащ, къагъэзэжри а гъуэгуанэм кърикIуэжащ. А махуэм зыхыхьэм хэтахэм километри 8 къакIухьащ.

«Лига здоровья нации» урысей жылагъуэ зэгухьэныгъэм и щIыналъэ къудамэм и унафэщI Къэмбэчокъуэ Заретэ жиIащ Узыншагъэр хъумэнымкIэ дунейпсо зэгухьэныгъэм къызэригъэлъагъуэмкIэ, махуэм къриубыдэу лъэбакъуэ мини 5 нэхърэ нэхъ мащIэ зыч цIыхум и Iэпкълъэпкъыр зэрызыщIэкIышхуэ щымыIэу зэрыпсэур, абы къыхэкIыуи апхуэдэм нэхъ щIэхыу узыфэ зэхуэмыдэхэр къеуэлIэнкIэ шынагъуэ нэхъыбэ щыIэщ.

- ЦIыху жыджэру ябжыр махуэм къриубыдэу лъэбакъуэ I0000 зыкIурщ. Аращ нобэрей зэхыхьэми а бжыгъэр къыщIэдгъэлъэгъуар. Ауэ цIыху къэс езым хузэфIэкIынур зыщигъэгъупщэ хъунукъым. Апхуэдиз лъэбакъуэр къызытехьэлъэн щыIэнкIэ мэхъу, абы къыхэкIыу фызыхуэсакъыжурэ фи узыншагъэм къызэрихьым хуэдизрэ фызекIуэ. Ар хабзэ фхуэхъурэ махуэ къэс гъуэгуанэ пыухыкIа зэпыфчу зевгъасэмэ, къафщIэу фи узыншагъэр ефIэкIуэнущ, - жиIащ Къэмбэчокъуэ Заретэ.

Iуэху щхьэпэм цIыху 500-м щIигъу хэтащ, абыхэм псыхэр хуагуэшащ, я лъыдэуейр зыхуэдэр къапщытащ. Дэтхэнэми марафоным зэрыхэтам щыхьэт техъуэ тхылъхэр иратащ.

«Узыншагъэм ухуэзышэ лъэбакъуэ 10000» Iуэхугъуэр УФ-м и щIыналъэ псоми щекIуэкIащ, узыншагъэр егъэфIэкIуэнымкIэ лъэс гъуэгуанэхэр къызэгъэпэщыным хуэунэтIауэ къэралым щрагъэкIуэкIхэр даIыгъыу.