КъБР-м и Парламентым и УнафэщI Егоровэ Татьянэ иджыблагъэ иригъэкIуэкIа зэIущIэм, «правительст-вэм хухах сыхьэтым» хыхьэу, щытепсэлъыхьащ цIыхухэр хущхъуэхэмкIэ къызэрызэрагъэпэщым зэрыкIэлъыплъ щIыкIэм.
Абы теухуауэ къэпсэлъа, КъБР-м узыншагъэр хъумэнымкIэ и министр Къалэбатэ Рустам жиIащ мы зэма- ным ди къэралым санкцэ зэмылIэужьыгъуэхэр къызэрыхуагъэувар къалъытэу гулъытэ хэха зэрыхуащIыр цIыхухэр хущхъуэкIэ къызэгъэпэща зэрыхъуным. Министрым зэрыжиIамкIэ, 2014 гъэм щегъэжьауэ Урысейм хущхъуэ къыдэзыгъэкI IуэхущIапIэхэр хэпщIыкIыу нэхъыбэ щыхъуащ. Апхуэдэуи абы къыхигъэщащ цIыхур нэхъыбэрэ зыхуэныкъуэ хъу хущхъуэ лIэужьыгъуэхэр гъуэтыгъуей зэрымыхъунур.
Урысейм ещанэ увыпIэр дуней псом щиIыгъщ хущхъуэхэм я аналогхэр щIынымкIэ. Iэмал имыIэу цIыхур зыхуей хъу хущхъуэхэм хуэдэу ди деж къыщыщIагъэкIым процент 77-рэ еу- быд, хамэ къэралхэм кърашыр процент 50 мэхъу.
Мы зэманым зэпымыуауэ хамэ къэрал IуэхущIапIэхэм хущхъуэхэр ди къэралым кърагъашэ икIи абы и лъэныкъуэкIэ лъэпощхьэпо щыIэну къалъытэркъым.
- Худэчых зиIэ цIыхухэр хущхъуэкIэ къызэрызэрагъэпэщ къэрал программэм ипкъ иткIэ, КъБР-м Узыншагъэр хъумэнымкIэ и министерствэм 2022 гъэм и япэ мазищым зыхуеину псори къищэхуащ, адэкIи а лэжьыгъэм пыдощэ, - жиIащ Къалэбатэм. - А Iуэхум ехьэлIауэ федеральнэ бюджетым къыхигъэкIащ сом мелуани 168-м нэблагъэ. Мы зэманым къэрал зэгурыIуэныгъэхэр зэтщIылIащ сом мелуан 96,5-рэ и уасэ хущхъуэ къызэрашэным ехьэлIауэ. Дуней псом къыщацIыху фIэщыгъэхэр яIэу къэтщэхуа хущхъуэхэм я процент 54-р Урысейм къыщыщIагъэкIхэращ, процент 46-м нэблагъэр хамэ къэралхэм ейщ. Хущхъуэхэм я бжыгъэмкIэ процент 71-р ди къэралым щащI, процент 29-р - хамэ къэралхэм.
Узыншагъэр хъумэным ехьэлIа Iуэхухэм кIэлъыплъынымкIэ федеральнэ IэнатIэм и Къэбэрдей-Балъкъэр щIыналъэ IуэхущIапIэм и унафэщI Ахматов Алим жиIащ цIыху куэдым зыкъызэрыхуагъазэр, уней аптекэхэм мыхьэ-нэ нэхъ зиIэ хущхъуэхэр зэрыщамыгъуэтыр къыхагъэщу.
- Соми 100-м нэс зи уасэ хущхъуэ лIэужьыгъуэ 43-м иужьрей тхьэмахуэм хагъэхъуауэ гу лъыттэркъым. Соми 100 - 500 зытехьэхэм (хущхъуэ 31-м ехьэлIауэ) я уасэм процент 1,4-кIэ хэщIащ, сом 500 нэхъыбэ зыхуагъэув хущхъуи 10-ми я уасэр процент 0,6-кIэ ехуэхыжащ. Сом миным къыщыщIэдзауэ нэхъыбэж зыщIат хущхъуэ 28-м я уасэм процент 1,4-кIэ хэхъуащ. Мы зэманым аптекэм щIэмылъ хущхъуэхэр 27-рэ мэхъу, - къыхигъэщащ къэпсэлъам.
Егоровэ Татьянэ жиIащ республикэ бюджетым сом мелуан 472-рэ зэрыхухихар хущхъуэкIэ цIыхухэр къызэгъэпэщыным, ауэ уасэхэм зэрыхэхъуэр къэплъытэмэ, ар ирикъун-иримыкъуным теухуауэ министрым и Iуэху еплъыкIэм щIэупщIащ.
Къалэбатэ Рустам жиIащ а Iуэхум республикэ унафэщIхэм я нэIэ зэрытетыр.
- Илъэс ныкъуэм и кIэм гурыIуэгъуэ хъуну аращ мы Iуэхум кърикIуэнур, - къыхигъэщащ министрым.
КъБР-м и Парламентым БюджетымкIэ, налогхэмрэ финанс IуэхухэмкIэ и комитетым и унафэщI АфэщIагъуэ Михаил жиIащ хущхъуэхэм я фIагъым-рэ аптекэхэм къэпщытэныгъэхэр зэрыщрагъэкIуэкIымрэ зэрыкIэлъыплъыпхъэр.
«Захуагъэ здэщыIэ Урысей - Пэжым и телъхьэ» партым и фракцэм и унафэщI Кебеков Владимир къыхигъэщащ рецепт ямыIэу ят хущхъуэхэм зэрытегузэвыхьыр, зэрыхабзэу, апхуэдэхэр цIыхухэм я узыншагъэмкIэ зэрызэра-ныр.
КъБР-м и Парламентым ЛэжьыгъэмкIэ, социальнэ политикэмрэ узыншагъэр хъумэнымкIэ и комитетым и унафэщI Къэжэр Хъусен жиIащ къэрал, уней аптекэхэри медицинэ IуэхущIапIэхэри къэпщытэн хуейуэ къызэрилъытэр, хабзэр къызэпызыуд Iуэхухэр е хущхъуэхэр ирикъуу зэрамыIэр къыщIагъэщын папщIэ.
Депутатхэм ягъэбелджылащ зытепсэлъыхьа Iуэхухэм ятеухуауэ КъБР-м и Правительствэм, республикэм Узыншагъэр хъумэнымкIэ и министерствэм, Узыншагъэр хъумэным ехьэлIа Iуэхухэм кIэлъыплъынымкIэ федеральнэ IэнатIэм и Къэбэрдей-Балъкъэр щIыналъэ IуэхущIапIэм гулъытэ зыхуащIыпхъэ лэжьыгъэхэр.