Ди республикэм и Iэтащхьэ КIуэкIуэ Казбек Правительствэм и Унэм щыхуэзащ КъБР-м егъэджэныгъэмкIэ, щIэныгъэмрэ щIалэгъуалэм я IуэхухэмкIэ и министр Езауэ Анзор. Псалъэмакъыр теухауэ щытащ ди щIыналъэм и курыт еджапIэхэр къэрал къэпщытэныгъэхэм зэрыхуэхьэзырым.
Гъэ еджэгъуэм и кIэухым, хабзэ хъуауэ, ирагъэкIуэкI къэрал экзаменхэр къызыхуэтыншэу къызэгъэпэщыным икIи егъэкIуэкIыным республи- кэ бюджетым къыхэкIыу мы илъэсым хухахауэ щытащ сом мелуан 58-м щIигъу. Абыхэм ящыщу сом мелуан 31-р хэхауэ щIагъуащ къэпщытэныгъэ лэжьыгъэхэр пыIудзауэ егъэкIуэкIыным пыщIа Iуэхугъуэхэр къызэрагъэпэщыну. Апхуэдэу а мылъкум щыщ хуаутIыпщащ мы гъэм 9-нэ классыр къэзыух ныбжьыщIэхэр зыхэтыну къэпщытэныгъэхэри тэмэму егъэкIуэкIыным, химиемкIэ ятыну экзаменым папщIэ зыхуэныкъуэ лабораторэ Iэмэпсымэхэр кърыращэхуным.
- Мыгъэрей къэрал къызэрыщIагъэкI къэпщытэныгъэхэм хэтынущ цIыху мин 13-м щIигъу. Къэрал экзамен нэхъыщхьэр ятынущ 9-нэ классыр къызыух ныбжьыщIэ 8554-м. Ахэр щекIуэкIынущ щIыпIэ (ППЭ) 46-м. Зыуэ щыт къэрал экзаменым мы гъэм хэтынущ курыт школыр къэзыух ныбжьыщIэу 4582-рэ. ЕГЭ-р къыщызэдгъэпэщынущ къэпщытэныгъэхэр щекIуэкIыну щIыпIэ 23-м. Мы зэманым а псоми яужь щитщ къытпэщылъ къэрал къэпщытэныгъэхэм къызыхуэтыншэу зыхуэгъэхьэзырыным епха лэжьыгъэхэм, - къыхигъэщащ Езауэ Анзор.
Министрым зэрыжиIамкIэ, мыгъэрей къэпщытэныгъэхэм апхуэдэу хэтынущ IэщIагъэлI мини 4,5-рэ. Абыхэм иджыпсту зыхуагъасэ экзамен зэрегъэкIуэкIыпхъэ мардэхэм ехьэлIа щхьэхуэныгъэхэм. КъищынэмыщIауэ, КъБР-м ЕгъэджэныгъэмкIэ, щIэныгъэмрэ щIалэгъуалэм я IуэхухэмкIэ и министерствэр абы теухуауэ ядола-жьэ УФ-м и МВД-м КъБР-м щиIэ IэнатIэм, КъБР-м Узыншагъэр хъумэнымкIэ и министерствэм, «Ростелеком»-м я IэщIагъэлIхэм.
Езауэ Анзор зи пашэ IэнатIэр къэ-рал къэпщытэныгъэхэм зэрыхуэхьэзырым щыгъуазэ хуэхъуа нэужь, КъБР-м и Iэтащхьэ КIуэкIуэ Казбек арэзы техъуащ Iуэхур зыIутым. Абы къыхигъэщащ республикэм и курыт школхэр къапэщылъ къэрал къэпщытэныгъэхэм зэрыхуэхьэзырыр зэригуапэр. КIуэкIуэм министрым иджыри зэ гу лъригъэтащ экзаменхэр къызыхуэтыншэу, тэмэму, пэжыр я лъабжьэу, яубзыхуа техникэ мардэхэм изагъэу егъэкIуэкIын зэрыхуейм. Апхуэдэуи жиIащ федеральнэ жылагъуэ кIэлъыплъакIуэхэм экзаменхэм пы-щIа я къалэнхэр тэрэзу зэфIахын папщIэ, зыхуэныкъуэ Iэмал псори къахузэгъэпэщын зэрыхуейр.
- Къэрал къэпщытэныгъэр шынагъуэншэу, къызыхуэтыншэу екIуэкIын папщIэ, абы хэтыпхъэ ведомствэхэр, министерствэхэр зэпыу ямыIэу зэдэлэжьэн хуейщ, - къыхигъэщащ КIуэкIуэм. - Зи гугъу сщIыр УФ-м и МВД-м КъБР-м щиIэ IэнатIэм, КъБР-м Узыншагъэр хъумэнымкIэ и министерствэм, «Ростелеком»-м я лэжьакIуэхэм-рэ КъБР-м ЕгъэджэныгъэмкIэ, щIэныгъэмрэ щIалэгъуалэм я IуэхухэмкIэ министерствэм я IэщIагъэлIхэмрэ мыхьэнэшхуэ зиIэ а къэрал Iуэхур зэгъусэу, зэдэIэпыкъуу зэфIагъэкIын зэрыхуейращ.