Лисэ Сэхьид

Лисэ Сэхьид жаIэ щхьэкIэ, абы и унэцIэр Гъуэгунокъуэт. Иджыпсту слъагъу хуэдэу сщIэж Сэхьид, джэдыгу хужь зэфIэтхъа щылэлу щыгърэ, къуажэр къикIухьу дэтт.
Абы къуищ иIащ: Тэркъан, Темыркъан, Лэкъумэн. И къуэхэр балигъыпIэ иува пэтми, апхуэдизкIэ тхьэмыщкIэхэти, гъуэншэджыншэу дэтт.
Нэхъыжь Тэркъаным и къэшэгъуэ блэкIырти, гъунэгъухэр зэхыхьэри, фыз къыхуашэну джылахъстэней хъыджэбз гуэрым хуэлъыхъуащ. Апхуэдэу къэхъурт – игъащIэм имылъэгъуа хъыджэбз къыхуашэу е имылъэгъуа, имыцIыху щIалэм хуашэу.
- Ди пхъур зэттынур зыхуэдэм деплъынщ! – жаIэри, джылахъстэней щIалэ зытIущ къэкIуащ.
- Джылахъстэнейхэр къокIуэ, Сэхьид, - жари гъунэгъухэр Сэхьидым деж щIэлъэдащ. Сэхьидыр унаплъэ къэкIуауэ къытеуахэм нэгъуэщI яригъэлъэгъуэн дэнэ къэна, и къуэ къэзышэнур гъуэншэджыншэу щIэсти, щIэжу зигъэпщкIуну пщIантIэм Iэмал кърамыту, унэжь цIыкIум щIаубыда щыхъум, гузэващ:
- ЩIэпщхьэ, насыпыншэ, гъуэлъыпIэ щIагъым, - жиIэри игъэпщкIуащ.
Джылахъстэней нэс къикIыу унаплъэ къэкIуахэр къыщIыхьащ.
Унэм хьэпшыпи унэлъащIи щIэлътэкъым. КъэкIуахэм ар я жагъуэ хъуащ. «ЩымыхъужкIи ди малъхъэ хъунур зэдгъэлъагъунщ» хьисэпу:
- Ди малъхъэ хъунур тлъэгъуамэ арат! – щыжаIэм:
- Ар сытми иджы хуэдэм дэс? Къурш ажэти, къурш бжэнти, жери нэхумыщу къыщылъэтри, фэхум ихьэжауэ мэщакIуэ! – жи Сэхьид.
«Къулейсызми, апхуэдэм дипхъу хуэгъэпсэуну къыщIэкIынщ», - жаIащ ягукIэ унаплъэ къэкIуахэм.
- Хъунщ, мыпхуэдэ махуэм фызышэр нэвгъакIуэ! – жаIэри, пIалъэ къратри кIуэжахэщ. 
ПIалъэр къыщысым, хьэблэр зэхыхьэщ, Тэркъаным гъуэншэдж къыхуагъуэтри, фызри къыхуашат.

*   *   *

Зэгуэрым жанхъуэтхьэблэдэсхэм чий ящIауэ Къурей губгъуэшхуэм адэкIэ ис урыс станицэхэм гуэдзкIэ ирахъуэжыну яшэрт. Сэхьиди абыхэм яхэту чий гулъэ ишэрти и къуэ нэхъыщIэ цIыкIури здищтащ. Къурей губгъуэшхуэм нэху къыщекIын хуей хъуахэщ. ЩIыIэт. Джанэ кIэщIыжь тIэкIу фIэкIа щыгътэкъыми, «уэрырыр мыгъуэ» жиIэу и дзэр зэтеуэу щIыIэм ису хуежьащ Темыркъан.
- ЩIыIэ мыгъуэм уисрэ, Темыркъан? – еупщIащ Сэхьид.
- Сес мыгъуэ, тэтэ! – жиIащ щIалэ цIыкIум.
Сэхьидым и къуэм вытIощыщIэр трилъхьащ.
- Иджыри уисрэ?
- Сес.
КIапсэшхуэр трипIащ.
- Иджыри уисрэ?
- Сес мыгъуэ.
Дамэкъуэ шыхьар трилъхьащ.
- Иджыри уисрэ?
- А, сес мыгъуэ, тэтэ! – щыжиIэм, выуэчыр трилъхьащ.
- Мы къомыр птепIауэ уисын хуейкъым, си щIалэ!
- Сес мыгъуэ! – щыжиIэм, выуэчыр къищтэжри, абыкIэ и къуэм еуэу щIидзащ.
ВыуэчымкIэ фIыуэ зэпилъэщIыхьауэ…
- Иджыри уисрэ? – жиIэу щеупщIым:
- Хьэуэ, иджы сисыжкъым, укъызэмыуэ мыгъуэ! - жиIащ Темыркъан цIыкIу.
Ар ди къуажэдэсхэм псалъафэу къахуэнащ.
 

КъардэнгъущI Зырамыку.
Поделиться:

Читать также:

25.03.2024 - 15:30 Си жэнэт
21.03.2024 - 11:30 Ахъмэт и фо изщ